Read chopi Johani 5 Bible Online

Johani 5 - chopi bible

Johani 5

¹Msana ka toneto, ku to mahwa m'buso wokari, wa Vajudha, se Jesu e kwela Jerusalema.

²Aniya Jerusalema ku ti ni diziva do sambela ka dona, hafuhi ni Txike txa Tinvuta, adiya di dhanwako ngu Txihebheru ku i Bhetesdha. Diziva diya di ti ni mtxhanu wa sike.

³Ka sona sike sileya ku ti zumbile dibutho da hombe da valwali, mabhofu ni vo khwita ni va kuoma sihango, na va txi verela kuvhiluka ka mati.

⁴Nguko, ngelozi yi ti txhikela dizivani ngu mbimo yokari, yi ta vhilusa mati; se awu a nga txi thanga ene e wulela, na mati ma di ngadi kuvhiluswa, a ti ti hanyiswa ka wulwati wakwe, hambi wuhi ni wuhi.

⁵Se a ti ho konaho m'thu wu a nga lwala magumi mararu a malembe ni mtxhanu ni mararu.

⁶Jesu, ngako a txi mu wona a di otete, ngu kuziva ti to i kale a txi lwala, a to khene kwakwe: “Wa ti lava kuhanyiswa kani?”

⁷Mlwali a to xamula a txi khene: “Mkoma, kha ni nga ni m'thu wo ni beta dizivani, mbimo yi mati ma khatako kuvhiluswa; kambe na ni di ngadi ni txi ya kona, mmwani e ni thangela e kwitima.”

⁸Jesu a to khene kwakwe: “Khukha, u teka ditaho dako u txi tsula.”

⁹Se kunukunuko, m'thu wule a to hanyiswa, e teka ditaho dakwe, a txi tsula. Aniko ditshikudo i ti Sabbata.

¹⁰Sekoko Vajudha va txi kha vona ka wu a nga hanyiswa: “Khu nga ni fanelo yo rwala ditaho dako ngu ditshiku da Sabbata.”

¹¹Ene a to xamula a txi khene: “Awu a nga ni hanyisa, ngene a nga ni gela ku khene: ‘Teka ditaho dako u txi tsula.’ ”

¹²Vona va to mu wotisa va txi kha vona: “I mani eneyo a nga khene: ‘Teka ditaho dako u tsula kani?’ ”

¹³Aniko awu a nga hanyiswa a ti si mu zivi, nguko Jesu a ti khukhile hagari ka dibutho di di nga ti konaho.

¹⁴Msana ka tiya, Jesu a to mu mana Dithepeleni a txi khene kwakwe: “Wa ti wona, u hanyisilwe; u nga engete u txi onha, kasiku di si ku humeleli dikhombo da hombe kupinda di do thanga.”

¹⁵M'thu wule a to gela Vajudha a txi khene i Jesu a nga mu hanyisa.

¹⁶Ngu konaho, Vajudha va to khata kuvengela Jesu, ngukuva a di mahile tile ngu ditshiku da Sabbata.

¹⁷Aniko Jesu a to va xamula a txi khene: “Tate wangu a ngadi a txi thuma ni konkuwa, nanani na thuma.”

¹⁸Ngu toneto, va to xota ku m'daya, i si nga ngu mhaka ya kundaka mlayo wa Sabbata dwe, aniko ngutu-ngutu ngu kuwa a nga khene Txizimu i Tate wakwe ngu wutumbu, e ti dinganisa ni Txizimu.

¹⁹Jesu a to xamula a txi khene kwawe: “Ngu ditshuri, ngu ditshuri, na mi gela ku khani: Mwanana ene apune kha sikoti kukhata e thuma txilo, hahanze ka tile a nga ti wona ti txi thumwa ngu Tate wakwe; nguko totshe ti ti nga mahwa ngu Tate, Mwanana a ti mahisa toneto.

²⁰Nguko Tate wa randa Mwanana, wa mu kombisa totshe ti a ti mahako; se a na mu kombisa mithumo ya hombe kupinda yiya, kasiku mi txi xamala.

²¹Nga kuwa Tate a wusako vafi e va hanyisa, nene Mwanana wa hanyisa ava a va randako.

²²Tate kha lamuli m'thu ni wammweyo, aniko a ningile Mwanana kulamula kotshe.

²³Kasiku votshe ve thava Mwanana, nga ti va thavisako tona Tate. Awu asi thaviko Mwanana, kha thavi ni Tate wu a nga mruma.”

²⁴“Ngu ditshuri, ngu ditshuri, na mi gela ku khani: Awu a engisako dipswi dangu, ni kukholwa ka wu a nga ni ruma, ana ni wutomi wo mbi guma, se kha na mbi ngadi e ta kulamulwani, aniko a humile kufani e wulela wutomini.

²⁵Ngu ditshuri, ngu ditshuri, na mi gela ku khani: Yata mbimo, kambe yi hokile konkuwa, ayi vafi va no engisa dipswi da Mwanana wa Txizimu, se ava va no di engisa va na hanya.

²⁶Kufana ni kuwa Tate i ku txisima txa wutomi ngu toneto a ningile Mwanana kuva i di txisima txa wutomi nene.

²⁷Msana keto, a mu ningile mtamo wo lamula, nguko ene i Mwanana wa M'thu.

²⁸Mi nga xamaleni, ngu timhaka tiya: Nguko ya hoka mbimo, ayiya votshe vale va ku mayivani va no engisa dipswi dakwe;

²⁹Se ava va nga maha ta tinene, va na wukela kuya kuhanyani ko mbi guma; ani ava va nga maha to biha, va na wukela kuya kusungwani.”

³⁰“Ani ngu kwangu kha ni sikoti kumaha txilo, ani ni lamula madingano ni ti ni ti engisako; se kulamula kwangu ku lulamile, nguko kha ni lavi kumaha kuranda kwangu, aniko ni lava kumaha kuranda ka wu a nga ni ruma.”

³¹“Ngako ni txi ti fakazela nipune, wufakazi wangu hi nga wa ditshuri.

³²Wa ho wu a ni fakazelako, kambe na tiziva ti to wufakazi wu a wu mahako ngu ngani, mbwa ditshuri.

³³ Mi rumile mitumi ka Johani, se ene a mahile wufakazi wa ditshuri.

³⁴Ngako i di ani, kha ni amukeli wufakazi ka m'thu; aniko ni wombisa tiya, kasiku mi txi hanyiswa.

³⁵Johani i ti liwoningo li li turako, li woningako. Se anu mi randile kutsakela kuwoninga kwakwe ngu mbimoanyana.

³⁶Kambe ani nina ni wufakazi wa hombe ngutu kupinda wa Johani: I mithumo yi Tate a nga ni ninga kasiku ni yi maha. Mithumo yi ni yi mahako, ngu yona yi ni mahelako wufakazi wa ti to ni rumilwe ngu Tate.

³⁷ Nene Tate wu a nga ni ruma, a mahile wufakazi ngu ngani. Anu txima kha mi zivi kupfa dipswi dakwe, hambi ni kuwona txiemo txakwe ni ditshiku ni da dimwedo.

³⁸Ni dipswi dakwe kha di zumbi kwanu, nguko kha mi kholwi ka wu a nga mruma.

³⁹Anu mi wonisisa Mibhalo ngu kualakanya tito, mi na mana wutomi wo mbi guma ka yona, kasi ngu yona yi ni fakazelako.

⁴⁰Aniko anu kha mi tumeli kuta kwangu, kasi kumita mana wutomi.”

⁴¹“Hi nga ngu ka vathu ni amukelako wudhumo.

⁴²aniko ani na mi ziva kha kwati, anu kha mi nga ni lirando la Txizimu timbiluni kwanu.

⁴³Ni tile ngu ditina da Tate wangu, aniko kha mi ni amukeli. Ngako a txi ta mmwani ngu ditina dakwe, mi na mu amukela.

⁴⁴Mi nga kholwisa kutxani, anu mi dhumisanako ngu txanu, mi si laviko wudhumo wu wu tako ngu ka Txizimu txi i ku tximwetxo dwe.

⁴⁵Mi nga pimiseni ti to ngani ni no ya mi mangalela masoni ka Tata; awu a no ya mi mangalela i Mosi, awu anu mi thembako ene.

⁴⁶Idiku mi ti ko kholwa ka Mosi, nga mi ndi na kholwa ni kwangu, nguko ene a bhate ngu timhaka tangu.

⁴⁷Aniko ngako mi si kholwi ka Mibhalo yakwe, mi nga kholwisa kutxani ka mapswi angu kani?”