Read chopi Johani 6 Bible Online

Johani 6 - chopi bible

Johani 6

¹Msana keto, Jesu a to tsula mtxhatuko ka Linene la Galileya, li dhanwako kambe ku i Tibheriyadhe.

²Va txi mu londetela vathu, ngu kuwona sixamaliso si a nga ti si maha ka valwali.

³Jesu a to kwela mmangoni, eya khalahatsha koneyo ni vagondiswa vakwe.

⁴Yi ti hafuhi Pasika, i ku M'buso wa Vajudha.

⁵Sekoko a di gute maso e wona vathu votala, va txi ta kwakwe, Jesu a to gela Filipi a txi khene: “Ngu hani hi no ya xava mapawu a kuvaninga ve dya kani?”

⁶A wombisile tiya, kufela ku mu duka, nguko ene a txi ziva tiya a nga txi fanela kumahisa tona.

⁷Filipi a to angula a txi khene: “Mapawu a 200 wa madhenari kha ma na mbi va dingana, taku mmweyo ni mmweyo e amukela txikhwemu.”

⁸Se Andreya, mwanawe Simoni Pedro, mmweyo wa vagondiswa va Jesu, a to khene kwakwe:

⁹“Ahawa ku na ni mfana a ku ni mtxhanu wa mapawu a mahila ni sihaka simbidi; kambe ina va nga enela votshe vathu vava votala ngu sona siya kani?”

¹⁰Jesu a to xamula, a txi khene: “Va geleni vathuvo ve khalahatsha.” Ku ti ti ni mwasi wawungi ka wukhalo wule. Vathu koko va to khalahatshela, ngu mtengo wa hafuhi ka 5.000.

¹¹Ti di ngeto, Jesu a to teka mapawu, se a di gwitile kubonga, a to ma avela ka vale va nga ti khalahatshile, a txi avelisa toneto ni sona sihaka. Va dyite nga ti va nga txi ti lavisa tona.

¹²Mbimo yi va nga khura, Jesu a gete vagondiswa a txi khene: “Rolelani maruru awa ma nga sala, kasi ku si luzeki txilo.”

¹³Vona va rolete ve tata digumi da sirundu ni simbidi ngu maruru a kusala ka mtxhanu wa mapawu a sevhadha, a kusiwa ngu vale va nga dya.

¹⁴Vathu vale koko va di woni txixamaliso txile Jesu a nga ti txi mahile, va to kha vona: “Kha ditshuri awu ngene Mprofeti wu a fanelako kuta ha ditikoni.”

¹⁵Se ngako Jesu a di woni ti to va na nda ta kuta mu maha mfumeli, a to khukha, da wumbidi, ene ekha, e tsula mmangoni.

¹⁶Ni minova, vagondiswa vakwe va to relela lineneni.

¹⁷Se va to kwela ngalavani, veya Kapernawume. Se di to phuma, na Jesu a sinzi kuwuya.

¹⁸Kambe linene li to vhiluka ngu mhaka ya diphuho da hombe di nga txi futeta.

¹⁹Ku ti ngako va di txungete mnava wa kudingana mtxhanu mwendo mtxhanu wa makilometru ni dimwedo, va to wona Jesu, a txi tsimbila txitimwi ka mati, a txi tshuketela hafuhi ni ngalava, se ve thava.

²⁰Kambe ene a ti khene kwawe: “Ngani, mi nga thaveni!”

²¹Sekoko vona va txi lava ku mu amukela ngalavani, aniko ngalava yi to kuluveta yi hoka mabambe hawa yi nga txi ya kona.

²²Mangwanani ka kona, dibutho di di nga ti sate mtxhatuko ka linene, di to wona ti to kha ku nga ni yimwani ngalava konaho, hahanze ka yile vagondiswa vakwe va nga wulela ka yona, ni ti to Jesu a ti sa wulela navo, aniko vagondiswa vakwe va ti tsute vokha.

²³Hambi keto, timwani tingalava, ta kuta ngu Tibheriyadhe, ti ti hokile hafuhi ni hawa va nga dyela kona mapawu, ngako Mkoma a di bongile.

²⁴Se ngako dibutho di di woni ti to Jesu a ti si nga ho haleya, hambi ni vagondiswa vakwe, va to wulela tingalavani ve teka nzila ya kuya Kapernawume, va txi lava Jesu.

²⁵Se mbimo yi va nga ya mu mana mtxhatuko ka linene, va to womba kwakwe va txi kha vona: “M'gondisi, u bwakile txikhati muni hawa kani?”

²⁶Jesu a to va angula a txi khene: “Ngu ditshuri, ngu ditshuri, na mi gela taku, kha mi ni laveli mhaka ya sidiwukiso si mi nga si wona, aniko mi ni lava ngu ku mi nga dya mapawu, mi khura.

²⁷Mi nga karatekeni ngu kuthumela sakudya si si pindako, aniko thumelani asi si no va si diho kala kuhoka ka wutomi wo mbi guma, asiya Mwanana wa M'thu a no mi ninga, nguko Ene wu, ngene a nga vekelwa txixambanyo ngu Txizimu Tate.”

²⁸Konaho va to womba kwakwe, va txi kha vona: “Nji txani hi fanelako kumaha kasi kuthuma mithumo ya Txizimu kani?”

²⁹Jesu a to angula kwawe a txi khene: “Mthumo wa Txizimu ngu wuwa: Kholwani ka wule Txizimu txi nga mruma.”

³⁰Vona va to womba va txi kha vona: “Nzidiwukiso muni, u si mahako, kasiku, hi txi si wona, hi na kholwa kwako kani? Njilo muni u txi mahako kani?

³¹ Vatate vathu va dyite manna txiwulani, nga ti, ti nga bhalwa, va txi kha vona: ‘A va ningile sakudya sa dipawu da kuta ngu nzumani.’ ”

³²Jesu a to va xamula a txi khene: “Ngu ditshuri, ngu ditshuri, na mi gela ni khani: Hi nga Mosi a nga mi ha dipawu da kuta ngu nzumani. Tate wangu ngene a mi hako dipawu da ditshuri da kuta ngu nzumani,

³³nguko dipawu da Txizimu ngu dona di txhikako ngu nzumani, di ta hanyisa ditiko.”

³⁴Se vona va to womba va txi kha vona: “Mkoma, hi he yotshe mbimo dipawu donedo.”

³⁵Jesu a to va angula a txi khene: “Ani ngani dipawu da wutomi. Awu a tako kwangu, kha na mbiswa a txi pfa nzala; awu a kholwako kwangu kha na mbiswa a txi pfa ditora.

³⁶Aniko ani ni mi gete ku khani: Anu mi ti woni, kambe kha mi tumeli.

³⁷Votshe va ni nga ningwa ngu Tate, va nata kwangu, se awu a tako kwangu, kha ni na mbi mu tshotsha hahanze.

³⁸Nguko ni txhikile ngu nzumani, i si nga ngu ku tela ku ta maha kuranda kwangu, aniko ngu ku tela ku ta maha kuranda ka wu a nga ni ruma.

³⁹Kambe kuranda ka wu a nga ni ruma, ngu ti to ni si tshotshi ni wammweyo wa votshe va a nga ni ninga, aniko ni na va wusa ngu ditshiku da magwito.

⁴⁰Ngu toneto, kuranda ka Tate ngu kuwa: Wuhi ni wuhi a wonako Mwanana e kholwa kwakwe, eva ni wutomi wo mbi guma; se ani ni na mu wusa ngu ditshiku da magwito.”

⁴¹Vajudha va to khata kungungurukela ngu kuwa ene a nga womba, a txi khene: “Ani ni dipawu di di nga txhika ngu nzumani.”

⁴²Vona va ti ti kha vona: “Ina hi nga Jesu wuwa, mwana Josefa, awu hi zivako tate wakwe ni mame wakwe kani? Ngu kutxani koko a txi khene: Ni txhikile ngu nzumani kani?”

⁴³Jesu a to va xamula, a txi khene: “Mi nga ngungurukeleni!

⁴⁴A walo wu a sikotako kuta kwangu, ngako a sa dhanwa ngu Tate wu a nga ni ruma; se ani ni na mu wusa ka ditshiku da magwito.

⁴⁵Ti bhatwe ka mabhuku a vaprofeti, va txi kha vona: Votshe va na gondiswa ngu Txizimu. Wuhi ni wuhi a nga engisa Tate, a txi amukela sileleto sakwe, wata kwangu.

⁴⁶Hi nga ti to ku na ni m'thu wu a nga wona Tate, hahanze ka wu a tako ngu ka Txizimu, eyo ngene a nga wona Tate.”

⁴⁷“Ngu ditshuri, ngu ditshuri, na mi gela, ni khani: Awule a kholwako kwangu, ana ni wutomi wo mbi guma.

⁴⁸Ani ni dipawu da wutomi.

⁴⁹Txiwulani, vatate vanu va dyite manna kambe va fite.

⁵⁰Aniko dipawu di di nga txhika ngu nzumani di maha ti to awu a di dyako, asi fi.”

⁵¹“Ani ni dipawu da kuhanya di nga txhika ngu nzumani. Awu a dyako dipawu diya a na hanya wutomi wo mbi guma. Dipawu di ni no mninga, ngu mmidi wangu ni no wu ningela ngu kulava kuhanyisa ditiko.”

⁵²Vajudha va to kanetisana ngu txawe, va txi kha vona: “Se ene a nga hi ningisa kutxani mmidi wakwe hidya kani?”

⁵³Jesu koko a to khene kwawe: “Ngu ditshuri, ngu ditshuri, na mi gela, ni khani: Ngako mi si dyi mmidi wa Mwanana wa M'thu, ni kungako mi si seli mnoha wakwe, anu kha mi na mbi va ni wutomi mndani kwanu.

⁵⁴Awu a dyako mmidi wangu ni kusela mnoha wangu, ana ni wutomi wo mbi guma, se ani ni na mu wusa ka ditshiku da magwito.

⁵⁵Nguko mmidi wangu nzakudya sa ditshuri, ani mnoha wangu nzakusela sa ditshuri.

⁵⁶Awu a dyako mmidi wangu, a txi sela ni mnoha wangu, a zumba kwangu, se nanani ni zumba kwakwe.

⁵⁷Ngako Tate wu a nga ni ruma, a hanyako, se nani ni hanyako ngu ngene, kufana ni tongeto, awu a ni dyako, a na hanya ngu ngani.

⁵⁸Ngu donedo dipawu di nga txhika ngu nzumani. Kha di fanani ni dile va nga dya vatate vanu; vona va fite; kasi awu a no dya dipawu diya a na hanya wutomi wo mbi guma.”

⁵⁹Jesu a wombile timhaka tiya na a txi gondisa disinagogani ka Kaperwume.

⁶⁰Vavangi koko ka vagondiswa vakwe, va di engisile timhaka tiya, va to kha vona: “Dipswi diya da nemela. I mani a no di engisa kani?”

⁶¹Ngako Jesu a di ti woni ti to vagondiswa vakwe va ngura-ngura, a to va wotisa a txi khene: “Ina mhaka yiya ya mi thela dikhodho kani?

⁶²Se mi na txani, mbimo yi mi no wona Mwanana wa M'thu a txi kwela e tsula muwa a nga ti kona kukhatani, kani?

⁶³Moya ngu wona wu hanyisako, kasi mmidi kha wu vhuni txilo. Mapswi awa ni nga mi gela i moya ni wutomi.

⁶⁴Kambe hagari kwanu vaho va, va si kholwiko.” Kha ditshuri, Jesu a txi tiziva kukhukhela makhatoni ti to mbamani ava va si kholwiko, ni ti to i mani wu a no mningela.

⁶⁵Se a ti ti khene: “Ngu tona eto, ni ti khani kwanu: A walo wu a sikotako kuta kwangu, ngako a sa ningwa ngu Tate.”

⁶⁶Kukhukhela konaho, vagondiswa vavangi va to khata kutshumelela msana, ve thindeka ku mu londetela.

⁶⁷Sekoko Jesu a to womba ka va digumi ni vambidi, a txi khene: “Nananu mi lava kutsula, kani?”

⁶⁸ Simoni Pedro a to angula a txi khene: “Hi na ya ka mani kani Mkoma kani? Awe ngawe u ku ni mapswi a wutomi wo mbi guma.

⁶⁹Ngu toneto, athu ha tumela ni ku tiziva ti to awe u Msawuleki wa Txizimu.”

⁷⁰Jesu a to xamula a txi khene: “Ina hi nga ani ni nga mi sawula, anu va Digumi ni Vambidi kani? Hambi keto mmweyo wanu i Sathani.”

⁷¹A wombile tiya, a txi konama Judha, mwana Simoni Iskariyoti; nguko eneyo i ti ene a no mningela, ene mmweyo wa va Digumi ni Vambidi.