Read chopi Johani 7 Bible Online

Johani 7 - chopi bible

Johani 7

¹Msana ka toneto, Jesu a ti tsimbilela Galileya, asi dhundi kutsimbilela Judheya, nguko Vajudha va txi lava ku m'daya.

²Kambe m'buso wa Vajudha wa Midhuti wu ti hafuhi.

³Se vanawe va ti kha vona kwakwe: “Khukha hawa, u txi tsula Judheya kufela ku vagondiswa vako ve wona mithumo yi u yi mahako.

⁴Nguko kha ku na m'thu wu a mahako txilo kusisalani, ngako a txi dhunda kuziwa. Ngako u txi maha mithumo yo ngeto, ti kombise ka ditiko.”

⁵Nguko ni vona vanawe va ti si kholwi kwakwe.

⁶Ngu toneto, Jesu a ti khene kwawe: “Mbimo yangu kha yi nzi kuhoka; kasi i di anu, mbimo yanu yi ho otshe masiku.

⁷Ditiko kha di na ku mi vengela, kambe ani da ni vengela, nguko na fakaza ti to mithumo ya dona yi bihile.

⁸Tsulani anu, m'busoniyo, nguko mbimo yangu kha yi nzi kuhetiseka.”

⁹Ku ti ngako a di va gete timhaketo, a to ti salela Galileya.

¹⁰Kambe ngako vanawe va di tsute m'busoni, ene a to tsula asi ti wonekisi, aniko a to tsula kusisalani.

¹¹Se Vajudha va ti mu lava m'busoni, va txi kha vona: “Ahani ene kani?”

¹²Se ku ti ni kukanetisana ka hombe hagari ka dibutho, vamwani va txi kha vona: “I m'thu wamnene.” Vamwani va txi kha vona: “Ahim-him, wa kanganyisa vathu.”

¹³Hambi keto, va ti si wombawombi ngu ngene ha kubasani, ngu kuthava Vajudha.

¹⁴Hagari ka m'buso, Jesu a to kwela eya Dithepeleni, eya gondisa kona.

¹⁵Se Vajudha ve xamala, va txi kha vona: “Awuwa a yi zivisa kutxani Mibhalo, kuve kha gonda kani?”

¹⁶Jesu a to va xamula a txi khene: “Gondo yangu hi nga yangu, aniko nja wule a nga ni ruma.

¹⁷Ngako m'thu a txi lava kumaha kuranda ka Txizimu, a na tiziva ti to gondo yangu yi huma ka Txizimu, mwendo no ti wombela tangu ngu wutumbu.

¹⁸Awu a wombawombako ngu ta wutumbu wakwe, a lava kudhumiswa; aniko awu a lavako kudhumiswa ka wule a nga mruma, eyo ngene i ku wa ditshuri, kwakwe kha ku nga ho kukanganyisa.

¹⁹Ina Mosi kha mi ninga Mlayo kani? Aniko, hambi keto, kha ku nga ni wammweyo, hagari kwanu, a gongako Mlayo. Ngu kutxani, mi lavako ku ni daya kani?”

²⁰Dibutho di to xamula di txi kha dona: “Awe u na ni didhimoni. I mani a lavako ku kudaya, kani?”

²¹Jesu a to va xamula, a txi khene: “Ni mahile mthumo wawumwewo dwe, se motshenu mi xamala.

²²Mosi a mi ningile wukwera (na i si nga ti to wukwera wu khatilwe ngu Mosi, aniko wu huma ka vakokwani), se ma yisa wukwerani m'thu ngu Sabbata.

²³ Sekoko, ngako m'thu a yiswako wukwerani ngu Sabbata, ti txi maneka i si nga kundaka Mlayo wa Mosi, mi ni henyela ngu txani, ngako ni di hanyisile m'thu, mmidi wakwe wotshe, ngu Sabbata kani?

²⁴Mi nga lamuleni ngu kuwona khohe dwe, aniko lamulani ngu nzila yo lulama.”

²⁵Sekoko vathu vokari va Jerusalema va txi kha vona: “Ina hi nga ene wuwa va lavako ku m'daya kani?

²⁶Se ndiyo wa womba-womba ha kubasani, kambe kha va mu anguli txilo. Ina vafumeli vathu va nga va va di ti zivile ngu ditshuri ti to ngene Mesiya apune kani?

²⁷Aniko awuwa, ha kuziva mu a humako kona, kasi Mesiya kha na mbi ziwa mu a tako ngu kona, mbimo yi a nota.”

²⁸Konako Jesu a to guleta dipswi e gondisa Dithepeleni, a txi khene: “Ma ni ziva! Ma kuziva ni mu ni tako ngu kona. Kha na ti tela nipune, aniko awu a nga ni ruma i ditshuri ngu wutumbu wakwe, awu anu mi si mu ziviko.

²⁹Ani na m'ziva, nguko ni ta ngu kwakwe, ni rumilwe ngu ngene.”

³⁰Se va to lava ku mñola, aniko kha ka nga va ni mmweyo a nga mu gwesa, nguko mbimo yakwe yi sanzi kuhoka.

³¹Kambe vavangi hagari ka dibutho va to kholwa kwakwe, va txi kha vona: “Ngako Mesiya a txi ta, ina a nata maha sixamaliso so pala si si mahwako ngu wuwa, kani?”

³²Vafarisi va to engisa ku dibutho di nga txi ngurangura ngu mhaka yakwe: Konako vaphaxeli va hombe ni Vafarisi va to ruma mahalamu kuya mu ñola.

³³Se Jesu a to khene kwawe: “Ni ngadi ni nanu mbimo ya yidotho, se na tsula ka wu a nga ni ruma.

³⁴Mi na ni lava, kambe kha mi na mbi ni mana, nguko aha ni ku kona, anu kha mi sikoti kuta.”

³⁵Ngu kota yeto, Vajudha va to khata kuwotisana, va txi kha vona: “O lava kuya hani, aku hi no tandeka ku mmana kani? O lava kuya ka va va nga hangalaka hagari ka Vagriki. O lava kuya gondisa Vagriki kani?

³⁶Di womba txani dipswi di daku khene: ‘Mi na ni lava, kambe kha mi na mbi ni mana’, ni ku khene: ‘Aha ni ku kona, anu kha mi sikoti kuta kani?’ ”

³⁷Ka ditshiku do gwitisa da M'buso, i ku ditshiku da hombe, Jesu a to khukha a txi ema, a txi gula dipswi a txi khene: “Ngako m'thu wokari a ti ni ditora, anate kwangu e ta sela.

³⁸Awule a kholwako kwangu, nga ti Mibhalo yi wombako, ‘minambo ya mati o hanya yi na khulunga, yi txi huma ngu mbiluni kwakwe.’ ”

³⁹Jesu a ti ti womba tiya, na a txi fanekisa Moya wu va nga txi fanela ku wu amukela avale va ndino kholwa kwakwe; nguko wona Moya wu ti sanzi kuta, nga ti Jesu a nga sanzi kupfaliswa.

⁴⁰Sekoko vavangi hagari ka dibutho, ku ti ngako va di engisile dipswido, va to womba, va txi kha vona: “Kha ditshuri, awuwa i Mprofeti.”

⁴¹Vamwani va txi kha vona: “Awuwa i Mesiya.” Aniko vamwani va ti ti kha vona: “Ina Mesiya a nga huma ngu Galileya kani?

⁴²Ina Mibhalo kha yi wombi ti to Mesiya a na huma ka lixaka la Dhavhidha, a txi velekelwa Bhetlehema, didhoropa di Dhavhidha, a nga tumbuluka ka dona, kani?”

⁴³Ngu toneto, dibutho di nga abaneka ngu mhaka yakwe.

⁴⁴Vamwani ka vona va to lava ku mñola, kambe kuwalo ni mmweyo a nga tsana ku mu gwesa.

⁴⁵Vawoneleli va to wuya ka vaphaxeli va hombe ni Vafarisi, se vona ve va wotisa, va txi kha vona: “Ngu kutxani mi nga mbi wuya nayo kani?”

⁴⁶Vathumi vale va to xamula, va txi kha vona: “Txima kha hi zivi kuwona m'thu wo wombisa ku nga wuwa!”

⁴⁷Se Vafarisi va to xamula, va txi kha vona: “Kasi nanu mi dyeletwe kani?

⁴⁸I mani ka va va hombe ni ka Vafarisi, a nga kholwa kwakwe kani?

⁴⁹Aniko dibutho diya di si ziviko Mlayo, di ruketetwe!”

⁵⁰ Nikodhemo, awu a nga nga ya ka Jesu ni wusiku, a to khene kwawe:

⁵¹“Ina Mlayo wathu wa lamula m'thu, na a sinzi kuengiswa ni kuziwa ti a nga ti maha kani?”

⁵²Vona va to mu xamula va txi kha vona: “Kasi nawe u huma Galileya kani? Xola, u na wona ti to kha ku na mprofeti wu a tako ngu Galileya.”

⁵³[Se va to hangalaka, m'thu ni m'thu e tsula m'tini kwakwe.]