Read chopi Johani 8 Bible Online

Johani 8 - chopi bible

Johani 8

²Ngu mbimo ya mixo, a to tshumela eya woneka Dithepeleni, se votshe vathu va to ya tshangana hafuhi kwakwe. Ene a to khalahatsha a txi va gondisa.

³Konako, vabhali ni Vafarisi va to mu tisela wamsikati, a nga manwa wugangoni, se va to mu veka hagari ka vathu.

⁴Va txi kha vona ka Jesu: “M'gondisi, awu wamsikati a to manwa a txi maha wugango.

⁵Aniko Mosi, amu ka Mlayo, a hi rumile kufayetela ngu marigwi vavasikati vo nga tiya. Se awe u khawe txani ngu tona kani?”

⁶Va wombile tiya, ngu ku mu riyela, kasiku ve sikota kumana mhaka ya ku mu mangalela ngu yona. Aniko Jesu a to nama, a txi bhala ha mafuni ngu litiho.

⁷Kota ngako va nga txi phikiza ngu ku mu wotisa, a to lulama, a txi va gela ku khene: “Awule hagari kwanu a manekako a si nga ni txionho, a na thange ene a txi mu rinza dirigwi.”

⁸Se a di namile da wumbidi, a to khateta kubhala kambe ha mafuni.

⁹Konaho, va di engisile mhaka yiya, va to khata kupfhuka, mmweyo ngu mmweyo, kukhata ngu vale va hombe. Se a to sala ekha awule wamsikati, a nga ti zumbile hagari.

¹⁰Jesu a to lulama, a txi mu gela ku khene: “Wamsikati, kasi va hani? Kha nga ho ni wammweyo a nga ku abanisa kani?”

¹¹Ene a to angula a txi khene: “Mkoma, kuwalo ni wammweyo!” Jesu a to womba a txi khene: “Hambi ani kha ni ku abanisi. Tsula, aniko u nga engete kambe u txi onha.”

¹²Jesu a to tshumela a txi womba-womba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.”

¹³ Vafarisi va to mu gela, va txi kha vona: “Awe wo ti fakazela upune. Wufakazi wako hi nga wa wunene.”

¹⁴Jesu a to va xamula a txi khene: “Hambi ni txi ti fakazela nipune, wufakazi wangu mbwa wunene, nguko na kuziva amu ni tako ngu kona, ni mu ni yako kona.

¹⁵Anu mi lamula ngu malamulelo a vathu. Ani kha ni lamuli m'thu.

¹⁶Kambe ni txi lamula, kulamula kwangu nga kunene, nguko kha ni zumbi nokha, aniko nina ni Tate wu a nga ni ruma.

¹⁷Nikona Mlayoni kwanu, kubhatwe ti to wufakazi wa vathu vambidi mbwa wunene.

¹⁸Ani na ti fakazela nipune. Nene Tate wu a nga ni ruma, wa ni fakazela.”

¹⁹Se va to mu gela va txi kha vona: “Tate wako kasi ahani?” Jesu a to va xamula a txi khene: “Ani kha mi ni zivi, hambi ni Tate wangu kha mi mu zivi. Idiku mi ti ni zivile, hambi ni Tate nga mi ti mu zivile.”

²⁰Mapswi awa a ma wombile a di ka wukhalo wa miningelo, na a txi gondisa Dithepeleni. Kambe kha ka nga va ni m'thu wu a nga mñola nguko txikhati txakwe txi ti sanzi kuhoka.

²¹Jesu a to tshumela a txi va gela ku khene: “Ani na tsula, se mi na ni lava, aniko mi na fela txionhoni kwanu. Amu ni yako kona, anu kha mi na kusikota kuta.”

²²Vajudha va txi kha vona, “Eko wolava ku ti tshongisa kani? Aku u ku khawe: ‘Amuwa ni yako kona, anu txima kha mi na kusikota kuta kani?’ ”

²³Se a to va gela a txi khene: “Anu mi va hahatshi, ani ni wa txitimwi. Anu mi va mafu awa, ani kha ni nga wa mafu awa.

²⁴Ngu toneto, ni nga mi gela ni txi khani: ‘Mi na fela sionhoni kwanu’, nguko, ngako mi si kholwi ti to ‘Ngani wuwa’, mi na fela sionhoni kwanu.”

²⁵Se va to mu gela va txi kha vona: “Kasi awe ngawe mani kani?” Jesu a to va xamula, a txi khene: “Toneto ni nga mi gela kukhatani.

²⁶Ni nato ta tingi to womba ngu nganu ni lamula, kambe awu a nga ni ruma mbwa ditshuri, se nani ati ni nga tiengisa kwakwe, ngu tona ni ti wombako ka vathu.”

²⁷Vona kha va tiziva ti to a ti ti womba-womba ngu Tate.

²⁸Jesu a to va gela a txi khene: “Mbimo yi mi no guleta Mwanana wa M'thu, ngu konaho mi no tiziva ti to ‘Ngani Wuwa’, ni ti to kha ni thumi txilo ngu txangu nokha, aniko ni womba ti ni nga gondiswa ngu Tate.

²⁹Se awu a nga ni ruma, ana ni nani; kha ni leka nokha, nguko ani, otshe masiku, ni thuma ti ti mu tsakisako.”

³⁰Na a di ngadi a txi womba toneto, vavangi va to kholwa kwakwe.

³¹Ngu toneto, Jesu a to gela Vajudha va va nga ti khotwe kwakwe, a txi khene: “Ngako mi txi zumba ka dipswi dangu, mi na va vagondiswa vangu ngu ditshuri.

³²Mi na ziva ditshuri, se ditshuri di na mi khulula.”

³³ Va to xamula va txi kha vona: “Athu hi liveleko la Abrahamu. Kha hi zivi ku nga va tikhumbi ta m'thu. U wombisa kutxani tito: ‘Mi na khululwa kani?’ ”

³⁴Jesu a to va xamula a txi khene: “Ngu ditshuri, ngu ditshuri, ni khani: Wuhi ni wuhi a mahako txionho, i khumbi ya txionho.

³⁵Se khumbi kha yi zumbi m'tini otshe masiku. Mwanana ngene a zumbako m'tini otshe masiku.

³⁶Ngu toneto, ngako Mwanana a txi mi thusa, mi na va mi di thusekile kha ditshuri.

³⁷Na tiziva ti to mi liveleko la Abrahamu, kambe mi lava ku ni daya, nguko dipswi dangu kha di wuleli mndani kwanu.

³⁸Ani ni womba ati ni nga ti wona ka Tate wangu; nanu mi maha ati mi nga tiengisa ka tate wanu.”

³⁹Va to xamula va txi kha vona kwakwe: “Tate wathu ngu Abrahamu.” Se Jesu a txi khene kwawe: “Ngako mi di vanana va Abrahamu, mahani mithumo ya Abrahamu.

⁴⁰Aniko anu mi lava ku ni daya, ani ni mi gelako ditshuri di ni ngadi engisa ka Txizimu. Abrahamu kha ti maha tiya.

⁴¹Anu mi maha mithumo ya tate wanu.” Konaho va to kha vona kwakwe: “Athu kha ha velekwa wugangoni. Hi na ni tate mmweyo, i ku Txizimu.”

⁴²Jesu a to va gela ku khene: “Idiku Txizimu i Tate wanu, mi ndi na ni dhunda, nguko ni ta ngu ka Txizimu, ni huma ngu ka txona, nguko kha na ti tela nipune, aniko ngu txona txi nga ni ruma.

⁴³Kha mi ma pfi ngu txani mawombawombelo angu kani? Nguko mi si sikotiko kuengisa dipswi dangu.

⁴⁴Tate wanu ngu Sathani. Se mi randa kumaha kunavela ka tate wanu. Ene i m'dayi kukhukhela kukhatani, kha zumba ditshurini, nguko kwakwe kuwalo ditshuri. Ngako a txi womba-womba makuhu, a womba-womba ngu ti i ku takwe, nguko i m'hembi ni tate wa makuhu.

⁴⁵Aniko ani, ngu kuwa ni wombako ditshuri, kha mi kholwi kwangu.

⁴⁶I mani kwanu a no ni kona ku nina ni txionho kani? Se ngako ni txi womba ditshuri, njani mi si ni tumeli kani?

⁴⁷Awu i ku wa Txizimu, a engisa mapswi a Txizimu. Anu kha mi engisi, nguko kha mi nga va Txizimu.”

⁴⁸Vajudha va to xamula, va txi kha vona kwakwe: “Ina kha hi wombi tona ti to khathu, awe u Msamariya, ni ti to khathu u na ni didhimoni kani?”

⁴⁹Jesu a to xamula a txi khene: “Ani kha ni nga ni didhimoni; aniko ani na xonipha Tate, kasi anu kha mi ni xoniphi.

⁵⁰Ani kha ni ti laveli wudhumo nipune: Wa ho wu a lavako ku ni dhumisa, ngene a lamulako.

⁵¹Ngu ditshuri, ngu ditshuri na mi gela ku khani: Ngako m'thu a txi veketa dipswi dangu, txima kha na mbi wona lifo ni ditshiku ni da dimwedo.”

⁵²Vajudha va txi kha vona kwakwe: “Konkuwa se ha tiziva ti to u na ni didhimoni. Abrahamu a fite, vaprofeti ni vona va fite; se awe u khawe: ‘Ngako m'thu a txi veketa dipswi dako, kha na mbi wona lifo ni ditshiku ni da dimwedo.’

⁵³Ina u wa hombe awe, kupinda Tate wathu Abrahamu, awu a nga fa kani? Ni vaprofeti ni vona va nga fa. Awe u ti maha mani kani?”

⁵⁴Jesu a to va xamula a txi khene: “Ngako ni txi ti dhumisa, ku ti dhumisa kwangu hi nga ka txilo. Awu a ni dhumisako i Tate, awu anu mi ku khanu i Txizimu txanu,

⁵⁵kuve kha ma m'ziva; aniko ani na m'ziva. Ngako ni txi khani kha ni m'zivi, ni ndi nava wa makuhu kufana ni nanu. Aniko ani na m'ziva, se na veketa dipswi dakwe.

⁵⁶Abrahamu, tate wanu, a tsakete kuwona ditshiku dangu, se a di woni e nengela.”

⁵⁷Konaho Vajudha va to kha vona kwakwe: “Awe khu si kuva ni mtxhanu wa magumi a malembe, se u woni Abrahamu kani?”

⁵⁸Jesu a to khene kwawe: “Ngu ditshuri, ngu ditshuri, na mi gela ku khani: Na Abrahamu a sinzi ku va ho, ‘Ani ngani Wuwa.’ ”

⁵⁹Sekoko vona va to rola marigwi kasi ku mu rinzetela, aniko Jesu a to sisala, e huma Dithepeleni.