Read chopi Johani 9 Bible Online

Johani 9 - chopi bible

Johani 9

¹Ngako Jesu a txi pinda, a to wona m'thu wa dibhofu, kukhukhela kuvelekwani kwakwe.

²Se vagondiswa vakwe va to mu wotisa, va txi kha vona: “M'gondisi, i mani a nga onha, ngene mwendo mbaveleki vakwe, ku kala e velekwa i di dibhofu kani?”

³Jesu a to va xamula a txi khene: “Hi nga ene a nga onha, hambi ni vaveleki vakwe; atiya ti mahekile kasi kuwonekiswa mithumo ya Txizimu ngu ngene.

⁴Ta laveka ti taku ani ni maha mithumo ya wule a nga ni ruma, na i di ngadi mitshikari; wusiku wata, ahawa m'thu asi sikotiko kuthuma txilo.

⁵ Ngako ni ku ngadi ho ha ditikoni, ni liwoningo la ditiko.”

⁶A di wombile tiya, a to thura lure hahatshi, e maha ndope ngu lure, e tota ngu yona maso a dibhofu dileya;

⁷e di gela ku khene: “Tsula u txi ya samba dizivani ka Silowame (ti ti wombako ku ‘Txirumwa’).” Ti di mahile eto, ene a tsute eya samba, se e wuya a txi wona.

⁸Sekoko vaakelani vakwe ni vale va nga ti m'wonile ti to a hanya ngu kukombela, va to womba va txi kha vona: “Ina hi nga ene wule a nga ti khalahatshile e kombela kani?”

⁹Vamwani va txi kha vona: “Ngene wuwa.” Aniko vamwani va txi kha vona: “Wo fana nayo.” Se ene a nje kutiangulela, a txi khene: “Ngani.”

¹⁰Sekoko, va txi mu wotisa, va txi kha vona: “Nji txani txi nga maheka, kasiku maso ako me mana kuwona kani?”

¹¹Ene a xamute a txi khene: “M'thu wule a dhanwako ku i Jesu, a to maha ndope e ni tota ngu yona mu ka maso, e ni gela tiya: ‘Tsula dizivani ka Silowame, u txi ya samba.’ Se konako ni to tsula ni ya samba, se ni khata kuwona.”

¹²Vona va to womba va txi kha vona: “Ahani ene?” Ene a to xamula a txi khene: “Kha ni tizivi.”

¹³Se va to mteka awule i nga ti dibhofu, ve mu yisa ka Vafarisi.

¹⁴Kambe ditshiku di Jesu a nga vhuva ngu dona ndope e mu tula maso, i ti ditshiku da Sabbata.

¹⁵Se Vafarisi va to engeta kambe ve mu wotisa ti to ti mahisile kutxani kumana kuwona kani; ene a to womba a txi khene: “A to ni tota ndope mu ka maso, ni txi ya samba, se konkuwa na wona.”

¹⁶Sekoko vamwani Vafarisi va to womba va txi kha vona: “Awuwa m'thu hi nga wa ka Txizimu, nguko kha veketi Sabbata.” Vamwani va txi kha vona: “Ti nga mahisa kutxani ka m'thu wu i ku muonhi, kumaha sidiwukiso siya kani?” Se va to khata kuphikizana ngu txawe.

¹⁷Va to engeta kambe ve womba ka dibhofu, va txi kha vona: “Awe u wona txani ngu wule a nga kutula maso kani?” Ene a va xamute a txi khene: “Mprofeti.”

¹⁸Hambi keto, Vajudha kha va kholwa ti to ngu ditshuri ene i ti dibhofu ni ti to a nga va a di tulekile maso, kala kuza ve dhana vaveleki vakwe wule se a wonako.

¹⁹Va va wotisile va txi kha vona: “Ngene wuwa mwanana wanu, mi ku khanu a velekilwe i di dibhofu kani? Ti mahisile kutxani kumana kuwona kani?”

²⁰Se vaveleki va va xamute va txi kha vona: “Ha tiziva ti to awuwa ngene mwanana wathu, ni ti to a velekilwe i di dibhofu.

²¹Aniko ati ti nga mahisa tona kala a txi mana kuwona, kha hi ti zivi, hambi ni wule a nga mu tula maso, kha hi m'zivi. Nene mbwa hombe, mu wotiseni, a na ti xamulela apune.”

²²Vaveleki vakwe va wombisile tiya ngu kuthava Vajudha. Nguko vona Vajudha va ti langanile tito, ngako m'thu wokari a txi womba ti to Jesu ngene Mesiya, a na tovelwa disinagogani.

²³Ngu toneto, vaveleki vakwe va nga womba va txi kha vona: “Nene mbwa hombe, mu wotiseni, a na ti xamulela apune.”

²⁴Ka wumbidi, va to engeta ve m'dhana m'thu wule i nga ti dibhofu, va txi kha vona kwakwe: “Dhumisa Txizimu! Athu ha tiziva ti to eyo m'thu muonhi!”

²⁵Kambe ene a xamute a txi khene: “Ati to muonhi, ani kha ni tizivi; mhaka yimweyo ni yi zivako ngu yiya ya ku ani ni ti dibhofu, aniko se na wona,”

²⁶Va to engeta kambe va txi kha vona: “A to kumaha txani Ene kani? A mahisile kutxani ku kutula maso kani?”

²⁷Ene a va xamute a txi khene: “Ni wombile, mi txi tiengisa, i mhaka muni mi lavako ku tiengisa kambe kani? Kasi na nanu mi lava kumaha vagondiswa vakwe kani?”

²⁸Sekoko va to khata ku mruketela, va txi kha vona: “Mgondiswa wakwe ngawe wekha, athu hi vagondiswa va Mosi.

²⁹Ha tiziva ta tinene ti to Txizimu txi wombawombile ni Mosi, kambe awu kha hi ti zivi ti to a ta ngu hani.”

³⁰Se mu'thu wule a to ti angulela a txi khene: “Ta xamalisa ngutu kha ditshuri tito, anu kha mi m'zivi emo a tako ngu kona, na kasi ngene a nga ni tula maso.

³¹Kambe ha tiziva ti to Txizimu kha txi engisi vaonhi; aniko awule a txi khozelako, a txi maha kuranda ka txona, eyo txona Txizimu txa mu engisa.

³²Kha hi zivi ku tipfa ti to nombwe wokari a tute maso m'thu wo velekwa i di dibhofu.

³³Idiku Ene i ti si nga wa Txizimu, nga a sa sikota kumaha txilo.”

³⁴Se vona va txi mu angula, va txi kha vona: “U veleketwe txionhoni, ngu wutumbu wako wotshe, se u lava ku hi gondisa kani?” Konaho va to mu humisa hahanze.

³⁵Jesu a ti engisile ti to va mu humisile hahanze, se ngako a di manani nayo, a to mu wotisa a txi khene: “Wa kholwa ka Mwanana wa M'thu kani?”

³⁶Se ene a txi khene: “Ngu mani, Mkoma, kufela ku ni kholwa kwakwe kani?”

³⁷Jesu a nje khene: “Awe se u mu woni; ngene wu a wombawombako ni nawe,”

³⁸Ene a to xamula a txi khene: “Na tumela, Mkoma!” Se a to khizama, a txi mu khozela.

³⁹Konaho Jesu a to womba a txi khene: “Ani ni tete ku ta lamula ha ditikoni, kufela ku ava va si woniko ve mana kuwona, ani vale va wonako ve maha mabhofu.”

⁴⁰Se Vafarisi vokari, va nga ti kumweko nayo, ngako va di engisile tiya, va to mu wotisa, va txi kha vona: “Ina hi mabhofu nathu kani?”

⁴¹Jesu a to va xamula, a txi khene: “Idiku kha mi nga mabhofu, nga mi si nga ni mnandu. Aniko ngako mi ku khanu: ‘Ha wona!’ Ngu toneto, txionho txanu txi namarete.”