Read chopi Mithumo 1 Bible Online

Mithumo 1 - chopi bible

Mithumo 1

¹Awe Teyofilo, ka dibhuku dangu do khata, ni xawutete totshe ti Jesu a nga thuma ni kugondisa, kukhukhela kukhatani,

²kala ka ditshiku di a nga kweliswa ngu dona nzumani, msana ka kuva a di leletile, ngu Moya wo Sawuleka, vapostoli va a nga va sawula.

³Ka vona kambe a ti wonekisile ngu sikombiso so tala, msana ka kuxaniseka kwakwe, ti to wa hanya. A ti wonekisile kwawe mndani ka mune wa magumi a masiku, na a txi va txhumayela ngu timhaka ta Mfumo wa Txizimu.

⁴Hagari ka kuva a di khalahatshile navo ha sakudyani, a to va gela, a txi khene: “Mi nga khukheni muwa Jerusalema, aniko verelani Txithembiso txa Tate, i ku wule ni khalako ni txi womba-womba ngu ngene.

⁵ Johani a bhabhatisile ngu mati, aniko anu mndani ka mbimo yokari, mi na bhabhatiswa ngu Moya wo Sawuleka.”

⁶Avale va nga ti tshanganile va to mu wotisa, va txi kha vona: “Mkoma, ina ngu yona yi mbimo u lavako kuwusa mfumo wa Israyeli, kani?”

⁷Ene a to va xamula, a txi khene: “Kha ti lumbi anu kuziva sikhati mwendo timbimo ti ene Tate a nga ti emisela ngu wuhombe wakwe.

⁸ Aniko, mi na amukela mtamo wa Moya wo Sawuleka, wu no txhika txitimwi kwanu, se mi na va mi di tifakazi tangu ahawa Jerusalema ni ka dotshe ditiko da Judheya ni Samariya, kala magemeta-mitshi ka ditiko.”

⁹A di wombile timhaka tiya, a to guleka na va txi mu wona, se direfu di mu tsivela, va si swi va txi mu wona.

¹⁰Na va di ngadi va txi wonetela nzumani, mbimo yi ene a nga txi tsula, konaho ku to humelela majaha mambidi, ma nga ti ambate tinguwo to basa,

¹¹ayawa ma nga va gela, ma txi kha ona: “Majaha a Galileya, nji txani mi zumbako mi txi wonetela nzumani kani? Ene Jesu wu a nga gulwa hagari kwanu e kwela nzumani, a na wuyisa tona tiya mi nga mu wonisa tona a txi tsula nzumani.”

¹²Sekoko va to khukha ka mmango, wu dhanwako ku mbwa Miolivha, awu wu ku hafuhi ni Jerusalema, mnava wa kudingana nzila ya ditshiku da Sabbata, se ve tshumelela Jerusalema.

¹³ Ku ti ngako va di hokile konaho, va to kwela veya ka nyumba yi ya txitimwi, ahawa ku nga ti zumba Pedro, ni Johani, ni Jakobe, ni Andreya, ni Filipi, ni Tomasi, ni Bhartolomewu, ni Matewu, ni Jakobe mwana Alfewu, ni Simoni Muzelote, ni Judha mwana Jakobe.

¹⁴Vona votshe va ti simama ve khongela ngu mbilu yimweyo kumweko ni vavasikati vokari, ni Mariya mame wa Jesu ni vanawe.

¹⁵Ka ona ale masiku, Pedro a to khukha a txi ema hagari ka msengeletano wa vanawe, avava mtengo wawe wu nga ti lava kuhoka ka 120, a txi khene:

¹⁶“Vavamna va khe kwathu, yi ti ni fanelo ya kutatiseka Mibhalo yi yi nga profetwa kale ngu Moya wo Sawuleka, ngu txisofu txa Dhavhidha, ayi yi wombako ngu Judha, awu a nga ti maha mthangeli wa vale va nga ñola Jesu.

¹⁷Ene i ti ti mmweyo wathu, se a ti ti ningilwe txyavelo txa mthumo wathu.

¹⁸(Se Judha a xavile thembwe ngu male ya wubihi wakwe; a wite ngu mrumbu, a txi bhandeka ngu hagari, ma nje kuhuma masembe akwe otshe.

¹⁹Mhakeyo yi zivilwe ngu votshe va va nga aka Jerusalema, ahawa koza ve ninga thembwe yileya ditina daku i Hakeldhama, atiya, ngu lidimi lawe, ti wombako ku ‘Thembwe ya Mnoha’).

²⁰ Nguko dibhukuni ka Masalmo, kubhatwe taku: ‘M'ti wakwe wu na maha dirumbi; kha ku na mbi ngadi ku va ni m'thu wu a zumbako kona.’ ‘Se mmwani a na teke txikhunja txakwe.’

²¹ Ngu konaho, ta laveka tito, hagari ka vavamna va va nga tsimbila ni nathu, yotshe mbimo yi Mkoma Jesu a nga ti zumba ni nathu,

²²kukhukhela ka mbimo ya kubhabhatisa ka Johani, kala kuhoka ditshiku diya a nga guletwa hagari kwathu e tsula nzumani; mmweyo wawe a fanete kusengela ni nathu e va fakazi ya kuwuka ka Mkoma.”

²³Se va to humisa vavamna vambidi: Josefa, awu a dhanwako ku i Bharsabha, dimwani va txi i Justo, ni Matiyasi.

²⁴Se ve khongela, va txi kha vona: “Mkoma, awe u zivako timbilu ta votshe, kombisa awu u nga mu sawula ka va va vambidi,

²⁵kasiku e teka wukhalo wa Judha, mthumoni ka wupostoli, awu a nga wu leka e tsula mu kulumbako ene.”

²⁶Konako va to xaxuva tixolo, se dikato di wela Matiyasi se kukhukhela konaho a to patwa kumweko ni vapostoli va digumi ni mmweyo.