Read chopi Mithumo 11 Bible Online

Mithumo 11 - chopi bible

Mithumo 11

¹Kambe vapostoli ni vanawe, ava va nga aka ditikoni ka Judheya va ti engisile ti to vamatiko ni vona va amukete dipswi da Txizimu.

²Ngako Pedro a di tshumelete Jerusalema, makholwa awa a wukwera ma to kanetisana nayo,

³ma txi kha ona: “Awe u wulete mitini ka makhutu udya nawo.”

⁴Se Pedro e khata ku va gela timhaka ngu ku ti longolokisa.

⁵A txi khene: “Ni ti didhoropani ka Jopa na ni txi khongela. Se ni to wona txiwoniso. Ni woni txiya txo nga nguwo ya hombe, yi nga ti txhika ngu nzumani, na yi di sungilwe ngu mu ka mune wa misulo, yi ta hoka kwangu.

⁶Ku ti ngako ni di yi solete, ni to wona sihari sa mune wa minenge ni sihari sa kutsimbila ngu mirumbu ni sinyana sa nzuma.

⁷Se ni to pfa dipswi, di nga ni gela, di txi kha dona: ‘Pedro khukha u txi ema! Daya u txi dya!’

⁸Se ani ni ti khani: ‘Ahim-him, Mkoma. Nguko txima kha kuzivi kuwulela txilo txo yila mwendo txo mbi basa mkanani kwangu!’

⁹Di to engeta di ta ngu nzumani dipswi, di txi kha dona: ‘Txilo txi txi nga basiswa ngu Txizimu u nga thuke u txi khawe txa yila.’

¹⁰Toneto ti wuyetilwe kuraru, se sotshe si tshumela si txi kwetwa nzumani.”

¹¹“Kunukunuko ku to humelela vavamna vararu ha txikeni ka nyumba yi hi nga ti ka yona: Vona va ti rumetwe kwangu, na va txi khukhela Khezareya.

¹²Se Moya wu to ni gela ti to ni na tsule navo, ni si kanakani; vanathu vava va mtxhanu ni mmweyo va to tsula kumweko ni nani. Se hi ti ya wulela m'tini ka ene Korneliyo wuwa.

¹³Ene a hi gete ku khene a woni ngelozi nyumbani kwakwe, yi di emile, yi txi kha yona: ‘Ruma vathu va txi ya Jopa, veya dhana Simoni, awu dimwani ditina i ku Pedro.

¹⁴Ene a na kugela timhaka ti u no hanyiswa ngu tona, awe ni wotshe mwaya wako.’

¹⁵Se ngako ni txi khata kuwombawomba, Moya wo Sawuleka wu to txhikela txitimwi kwawe, nga ti ti nga maheka kwathu kukhatani.

¹⁶ Se ni alakanya dipswi da Mkoma, a nga khene: ‘Johani a bhabhatisile ngu mati, kambe anu mi na bhabhatiswa ngu Moya wo Sawuleka.’

¹⁷Sekoko, ngako Txizimu txi nga va ninga txihiwa txo fana ni txathu, athu hi nga kholwa ka Jesu Kristu, ni mani ani wo ni nga sikota kulambela Txizimu kani?”

¹⁸Ngako va di pfite timhaketo, va to malala ve dhumisa Txizimu, va txi kha vona: “Kunene, ni vona vamatiko Txizimu txi va ningile kuhunduluka ku ku yisako wutomini.”

¹⁹ Ava va nga ti hangalakile ngu kuxaniswa ku ku nga humelela, mbimo yi Sitefani a nga dawa, va to ya masoni kala veya hoka Fenikiya, ni Kipra ni Antiyokiya, va txi txhumayela Dipswi ka Vajudha dwe.

²⁰Hambi keto, hagari kwawe, ku ti ni vavamna va Kipra ni va Kirene, avava va nga wulela Antiyokiya, ve womba-womba kambe ni ka Vagriki, ve va txhumayela Evhangeli ya Mkoma Jesu.

²¹Se diwoko da Mkoma di ti navo; vathu votala va to hunduluka ve kholwa ka Mkoma.

²²Timhaketo, ngako ti di hokile tinzeveni ka Dibanza da Jerusalema, va to ruma Bharnabhasi e tsula Antiyokiya.

²³Ngako a di hokile e wona kateko ya Txizimu, a to tsaka, e va laya votshe ti to ve tsanisela ka Mkoma ngu timbilu to khutala.

²⁴Bharnabhasi i ti wamwamna wamnene, awu a nga ti tate ngu Moya wo Sawuleka ni likholo. Ngu konaho, dibutho da hombe da vathu, di to namarela ka Mkoma.

²⁵Bharnabhasi a to tsula Tarso, a txi yela Sawule.

²⁶Ngako a di mu mani, a to mteka e tsula nayo Antiyokiya. Va ti ya zumba koneyo dilembe dotshe, va txi thuma votshe ka dibanza diya, ve gondisa vathu votala ngutu. Ngu kona Antiyokiya vagondiswa va nga khata kudhanwa ngu ditina daku i makristu.

²⁷Ka oneyo masiku, vaprofeti vokari va to kwitima ngu Jerusalema veya Antiyokiya.

²⁸ Mmweyo wawe, awu va ku i Agabho, a to khukha a txi ema, e profeta ngu Moya ti to nzala ya hombe yi na vaho ka dotshe ditiko. Kha ditshuri yi humelete kufumani ka Klawudhiyo.

²⁹Se vagondiswa va to engisana ka mhaka yi ya ku mmwani ni mmwani e rumela asi a si manako, kasi kuya vhuna vanawe va va zumbako ditikoni ka Judheya.

³⁰Kunene, va to mahisa toneto, ve si rumela ka madhota, ngu manza a Bharnabhasi ni Sawule.