Read chopi Mithumo 13 Bible Online

Mithumo 13 - chopi bible

Mithumo 13

¹Ka Dibanza da Antiyokiya ku ti ti ni vaprofeti vokari ni vagondisi: I ti Bharnabhasi ni Simiyoni, awu a dhanwako ku i Nigere, ni Lukiyo wa Kirene, ni Manaheni, awu a nga kula kumweko ni mfumeli Herodha, ni Sawule.

²Ka ditshiku dokari, ngako va txi khozela ka Mkoma, na va txi ti tona sakudya, Moya wo Sawuleka wu to womba wu txi kha wona: “Ni sawuleleni Bharnabhasi ni Sawule, kasiku ni va ninga mthumo wu ni nga va dhanela wona.”

³Sekoko ngako va di gwitile kutitona sakudya ni kukhongela, va to va sanzeka manza ve va ruma.

⁴Vona ngako va di rumilwe ngu Moya wo Sawuleka, va to kwitima veya Selewukiya, se ngu koneyo va ti ya txhatuka ngu txitimela veya Kipra.

⁵Ngako va di hokile Salamina, va to ya txhumayela dipswi da Txizimu masinagogani ka Vajudha. Va ti ni Johani, m'vhuneteli wawe.

⁶Ngako va di tshawunyetile txotshe txitondolo ve hoka Pafo, koneyo va to ya mana Mujudha wokari, i nga ti msalamusi ni mprofeti wa makuhu, awu a nga ti dhanwa ku i Bhari-Jesu.

⁷Ene a ti lumba m'ti wa nganakana Sergiyo Paulo, wamwamna wo ziva, awu a nga dhana Bharnabhasi ni Sawule, ngu kunavela kuengisa dipswi da Txizimu.

⁸Kambe Elima, msalamusi, ngu toneto di wombako ditina dakwe ngako di txi txhamuselwa, a to mu tsimba, e zama kutimeta nganakana ti to yi si kholwi.

⁹Aniko Sawule, i ku ene Paulo, a di tate ngu Moya wo Sawuleka, a to mu wonisisa awule wa msalamusi,

¹⁰a txi khene: “Awe u nga tala ngu wukanganyisi ni wubihi wotshe, mwanana wa Sathani, mlala wa sotshe so lulama, khu leki kugombonyisa tinzila ta Mkoma, ati i ku to lulama kani?

¹¹Wona, konkuwa diwoko da Mkoma di txitimwi kwako. U na maha dibhofu, se ngu mbimo yokari, khu na mbi ngadi u txi wona ditambo.” Kunukunuko, kuphuma ni txidema si to mu khubhunyeta; se e tenderukela e lava wo mu ñoleta ngu diwoko.

¹²Sekoko nganakana, ngako yi di woni ti ti nga humelela, yi to kholwa, nguko gondo ya Mkoma yi ti mu xamalisile ngutu.

¹³Paulo ni va a nga ti navo, va to khukha Pafo ngu txitimela, veya hoka Perga ka Panfiliya. Aniko Johani a to va leka e tshumelela Jerusalema.

¹⁴Vona va to tshawunyeta ve pinda Perga, ve tsimbila veya hoka Antiyokiya ka Pisidhiya. Ngu ditshiku da Sabbata va to wulela disinagogani ve khalahatsha.

¹⁵Msana ka kugondwa dibhuku da Mlayo ni Vaprofeti, vathangeli va disinagoga, va to rumela dipswi, va txi kha vona: “Vanathu, ngako mi di ni dipswi do laya vathu, mi ngadi womba.”

¹⁶Paulo a to khukha, a txi maha txikombiso ngu diwoko, a txi khene: “Vavamna va ka Israyeli ni nanu mi thavako Txizimu, engisani:

¹⁷Txizimu txa ditiko diya dathu va ka Israyeli, txi sawute vatate vathu, txi va guleta vathu vava, va di ngadi ditikoni ka Egipta.

¹⁸Se ngu mtamo wa diwoko da txona txi va humisile ka ditiko dileya, txi va mahela wumbilu txiwulani, mndani ka malembe o lava kudingana mune wa magumi.

¹⁹Ngako txi di fuvisile mtxhanu wa mifumo ni yimbidi ditikoni ka Kanana, txi to va ninga ditiko dile, di maha thomba yawe,

²⁰ngu mbimo ya kudingana 450 wa malembe. Msana keto, Txizimu txi va vekete valamuli kala kuhoka ka mprofeti Samuwele.

²¹Msana keto, va to kombela mfumeli; se Txizimu txi va ninga Sawule, mwana Kixi, wa lihunzu la Bhenjamini, awu a nga fuma mune wa magumi a malembe.

²²Msana keto, Txizimu txi va fumisete Dhavhidha, txi mu maha mfumeli, awu txi nga mu fakazela kwawe, txi womba tiya: ‘Ni mani Dhavhidha, mwana Jese, i ku wo randeka ka mbilu yangu, awu a nota maha totshe ti ni ti xuvako.’

²³Ngu ka lihunzu lakwe Txizimu txi humisile Jesu, Muhanyisi wa vanana va ka Israyeli, nga ti txi nga ti thembisile tona.

²⁴ Na Jesu a sinzi kuhumelela, Johani a to thanga e txhumayela ngu txibhabhatiso txi txi yisako kuhundulukani ka sionho ka yotshe ngamu ya ka Israyeli.

²⁵ A di hafuhi ni kuheta mthumo wakwe, Johani a ti khene: ‘Ani kha ni nga ene wu mi mu pimiselako; aniko msana kwangu, wata mmwani, awu ani ni ku si nga ni fanelo yo thukunyula tingoti ta masandazi akwe.’ ”

²⁶“Vanathu, vanana va liveleko la Abrahamu! Ni nanu vamwani mi thavako Txizimu! Dipswi diya da kuhanyisa di rumetwe kwathu.

²⁷Nguko ava va nga aka ditikoni ka Jerusalema, ni vathangeli vawe, ngako va nga mbi ti lava ku m'ziva Jesu, va mu abanisile, ve ninga kutatiseka ka mapswi a vaprofeti, aawa ma gondwako Sabbata ni Sabbata.

²⁸ Se hambiko va nga mbi mana mnandu ni wawumwewo kwakwe, wo dingana ku efa, va kombete ka Pilato ti to e dawa.

²⁹ Ngako va di hetile totshe timhaka ti ti nga bhalelwa ene, va to mu hawula ha phandeni ve mu tshotsha diyivani.

³⁰Aniko Txizimu txi mwusile kufani.

³¹Se ngu masiku o tala a ti wonekisile ka vale va nga ti kwete nayo kukhukhela Galileya kala kuya hoka Jerusalema, vonavo konkuwa i ku tifakazi takwe hagari ka ditiko:”

³²“Nanathu ha mi zivisa mahungu awa amanene: Txithembiso txi txi nga mahwa ka vatate vathu.

³³ Txizimu txi tatisile txithembiso txiya kwathu, vanana vawe, ngu kuwusa Jesu, nga ti ti nga bhaliswa tona amu ka dibhuku da Masalmo, va txi kha vona: ‘Awe u mwanana wangu, ni ku velekile nyamsi.’ ”

³⁴“Ati to Txizimu txi mwusile ka vakufa, ni ti to ene kha na mbi ngadi e tshumelela kusinani, txona Txizimu txi ti wombile toneto ngako txi txi womba tiya: ‘Ni na mi ninga makatekwa o sawuleka, o tsana, ayawa ma nga thembiswa ka Dhavhidha.’

³⁵Ngu toneto, Txizimu txi wombile ka wumwani wukhalo, txi txi kha tona: ‘Awe khu na mbi leka Msawuleki wako a txi eyeta kusina.’ ”

³⁶“Kasi i di Dhavhidha, ngako a di hetile, ka mbimo ya kuhanya kwakwe, mthumo wu Txizimu, ngu makungo a txona, txi nga ti msikete ona, ene a to otela, se e tshotshwa hafuhi ni vatate vakwe, e sina.

³⁷Kambe awu Txizimu txi nga mu wusa, kha ziva kusina.

³⁸Vanathu, ti ziveni ti to kudivalelwa ka sionho ku nuwelwa kwanu ngu ngene m'thu wuwa.

³⁹Se kululama ko hetiseka, akuwa mi nga mbi sikota kuningwa ngu Mlayo wa Mosi, wuhi ni wuhi a kholwako wa kumana ngu Jesu.

⁴⁰Ngu konaho, ti woneleni kasiku ti si mi humeleli ati ti nga wombwa ngu vaprofeti, tito:

⁴¹‘Wonani, anu vakanyisi, xamalani mi va mi lova! Nguko ka masiku anu, ni na maha mthumo, awu mi ndinova mi si wu tumeli, idiku mo ziviswa ngu m'thu.’ ”

⁴²Ngako Paulo ni Bharnabhasi va txi huma ngu disinagogani, vathu va to kombela ti to ka Sabbata yi yi tako ve va gondisa kambe timhaketo.

⁴³Ku ti ngako msengeletano wu di hangalakile, Vajudha vavangi ni valondeteli va va thavako Txizimu, va to londisa Paulo ni Bharnabhasi; vona, ngu mabhulo awe navo, va to va khongotela kasiku ve simama kuhanya amu ka kateko ya Txizimu.

⁴⁴Ngu ditshiku da Sabbata yi yi gametako, votshe vathu va didhoropa, kuleka ngu vavadotho, va to tshangana kasi kuya engisa dipswi da Txizimu.

⁴⁵Sekoko ngu kuwona dibutho da vathu, Vajudha va to tala ngu kubavela, se va txi angula ngu siruko ka timhaka tiya Paulo a nga ti womba-womba ngu tona.

⁴⁶Aniko Paulo ni Bharnabhasi, na va si thavi txilo, va to womba, va txi kha vona: “Ku ti fanete kuthanga ngu kwanu hi txi huwelela dipswi da Txizimu. Aniko ngako mi di rethelako kule ni nanu mipune, mi ti pfako mi si nga ni fanelo ya wutomi wo mbi guma, senikoko athu ha tshumelela ka vamatiko.

⁴⁷Nguko Mkoma a hi rumisile toneto, a txi khene: ‘Ni kuvekile kuva liwoningo ka vamatiko, kasi ku uva wo hanyisa kala magwito ka mafu.’ ”

⁴⁸Va di engisile toneto, vamatiko va to tala ngu litsako, ve dhumisa dipswi da Mkoma. Ni votshe vale va nga ti ni fanelo ya wutomi wo mbi guma, va to amukela likholo.

⁴⁹Ngu kota yeto, dipswi da Mkoma di to hangalaka ka dotshe ditiko dile.

⁵⁰Aniko Vajudha va to kujetela vavasikati va kutiningetela mu ka wukhongeli, na i di va kuxonipheka amule didhoropani, ti to ve va humisa ditikoni kwawe.

⁵¹ Vona va to huphutela lithulu la mikondoni kwawe ngu ku va sola, ve tsula Ikoniyo.

⁵²Ngu didhawa da vagondiswa, vona va to sala va di tate ngu litsako ni Moya wo Sawuleka.