Read chopi Mithumo 14 Bible Online

Mithumo 14 - chopi bible

Mithumo 14

¹Ikoniyo ni kona, Paulo ni Bharnabhasi, va to wulela disinagogani ka Vajudha ve gondisa, ahawa koza dibutho da hombe da Vajudha ni Vagriki ve kholwa.

²Aniko Vajudha va va nga mbi kholwa va to kujetela vamatiko kasiku timbilu tawe ti txi wukela vanathu.

³Hambi keto, Paulo ni Bharnabhasi va zumbile masiku o tala, ve womba-womba va si thavi txilo ngu kuthemba Mkoma, a nga ti tsanisa dipswi da kateko yakwe ngu kumaha sikombiso ni sidiwukiso ngu manza awe.

⁴Vathu va didhoropa dile ve hambana: Vamwani va txi ema ni Vajudha, vamwani va txi emela Vapostoli.

⁵Se vamatiko ni Vajudha ni tinduna tawe va to langana ku va mahela tshofu ni ku va balisela ngu marigwi.

⁶Vona, ngako va di ti zivile, va to thavela madhoropani ka Likawoniya, Listra ni Dherbhe ni ka maphambo a hafuhi.

⁷Konamo ni kona va ti ti txhumayela Evhangeli.

⁸A ti ti ho m'thu didhoropani ka Listra, awu a nga ti lemate minenge; nguko i ti txilima kukhukhela kuvelekwani kwakwe, txima a ti si zivi kutsimbila.

⁹A ti ti engisela ti ti wombwako ngu Paulo. Se ene ngako a txi mu wonisisa, e wona ti to ana ni kukholwa ko dingana ku e hanyiswa,

¹⁰a to guleta dipswi, a txi khene kwakwe: “Khukha u txi ema ngu minenge yako!” Ene a to ndaka e khata kutsimbila.

¹¹Dibutho da vathu, ngako va di woni ti ti nga mahwa ngu Paulo, va to huwelela ngu lidimi la Txilikawoniya, va txi kha vona: “Sizimu si tekile tikhohe ta vathu, si txhikela kwathu!”

¹²Se Bharnabhasi va ti m'dhana ku i “Zewusi,” Paulo ene va txi i “Herme,” nguko ngene i nga ti mthangeli wa dipswi.

¹³Konako mphaxeli wa Zewusi, awu dithepele dakwe di nga ti hahanze ka didhoropa, a to neha marole na ma di bombisilwe ngu mibhoti ya siluva, na a txi xuva kuphaxa mhamba kumweko ni dibutho.

¹⁴Ngako Vapostoli Bharnabhasi ni Paulo va di zivisilwe toneto, va to vharula tinguwo tawe ve ti rinza hagari ka vathu, ve kwangula, va txi kha vona:

¹⁵ “Vavamna! Mi mahela txani toneto kani? Anathu hi vathu vo fana ni nanu ngu mtumbuluko; mahungu amanene awa hi mi tiselako ona, ngu ti to mi leka mithumo yi ya kukhozela sa walo, mi tshumelela ka Txizimu txi txi hanyako, txi nga maha nzuma ni mafu ni linene, ni sotshe simaha si si ku ka sona.

¹⁶Ka tixaka ti ti nga pinda, Txizimu txi tumete ti to mfumo ni mfumo wu tsimbila ngu nzila ya wona;

¹⁷hambi keto, kha txa leka kufakaza ti to txona txa ho, ngu ku mahela ta tinene vathu, txi wisa mati a nzuma, ni ku mi ninga tinyango to pfuna, txi khurisa timbilu tanu ngu sakudya ni litsako.”

¹⁸Hambiko va nga womba mapswi awa, kha ta va hehukela kutsimba dibutho ti to di si va maheli mhamba.

¹⁹Ti di mahile eto, ku to bwaka Vajudha va kuta ngu Antiyokiya ni Ikoniyo ve ta kujetela mabutho a vathu ti to ve balisela Paulo ngu marigwi, se ve mu ruruvisa ve mu yisa hahanze ka didhoropa, na va txi alakanya ti to a fite. Kambe ngako vagondiswa va di mu ranganyetile, a to wuka e wulela didhoropani.

²⁰Se mangwanani ka kona, a to khukha e tsula Dherbhe, kumweko ni Bharnabhasi.

²¹Ngako va di txhumayete Evhangeli ka didhoropa diya ni kumaha mtengo wa hombe wa vagondiswa va to tshumelela Listra ni Ikoniyo ni Antiyokiya.

²²Va ti tsimbila va txi tsanisa timbilu ta vagondiswa ni ku va laya ti to ve timisela amu ka likholo, nguko, kha vona, hi fanete kuamukela sixaniso sasingi, kasiku hi sikota kuwulela Mfumoni ka Txizimu.

²³Msana ka kuva va di vekile madhota masoni ka otshe mabanza, ngu ku va sanzeka manza ni ku va khongelela ni kutitona sakudya, va to va veka manzani ka Mkoma, awu va nga kholwa kwakwe.

²⁴Sekoko, va to tshawunyeta Pisidhiya, va txi hoka Panfiliya.

²⁵Se va di huwelete Dipswi aniya Perga, va to relela va txi ya Ataliya.

²⁶Va txi khukhela koneyo, va to tsula ngu txitimela va txi ya Antiyokiya, ahawa va nga khatela kona, na va txi themba kateko ya Txizimu, ka mthumo wule va nga gwita ku wu maha.

²⁷Ngako va di hokile, va to tshanganisa Dibanza, va txi txhamusela totshe ti Txizimu txi nga thuma ngu vona, ni tiya txi nga tulelisa tona vamatiko ditimba da likholo.

²⁸Se va to zumba kona mbimo yo lapha ni vagondiswa.