Read chopi Mithumo 21 Bible Online

Mithumo 21 - chopi bible

Mithumo 21

¹Ku ti ngako hi di hambanile navo, hi to wulela txitimelani, hi tsimbila ngu mati, hi txi konama Kose; mangwanani ka kona hi hoka Rodhe, se hi txi ya pinda eho, hi txi ya Patara.

²Ngako hi di mani txitimela yi txi khukha kuya Fenikiya, hi to wulela ka yona hi tsula.

³Ngako hi di hokile ahawa ku wonekako Kipra, hi to txi pinda txitondolo txiya ngu didhawa ka txibhabha, hi tsula Siriya, hi txi ya hoka Tiro, nguko eyo ku ti ni siya si nga ti fanela kurulwa ngu txitimela.

⁴Ngako hi di mani vagondiswa, hi to zumba konaho mtxhanu wa masiku. Ngu kususumetelwa ngu Moya wa Txizimu, vona va ti ti gela Paulo ti to asi thuki e kwela eya Jerusalema.

⁵Kambe ngako ma di gumile masiku ale, hi to longela kasiku hi khukha. Hi khukhile na hi txi heleketwa ngu vavasikati ni sivananana. Ngako hi di humile hahanze ka didhoropa, hi to khizama mabambe ka mati hi khongela.

⁶Msana ka kusalisana hi to wulela txitimelani, se vona ve tshumela ve tsula mitini kwawe.

⁷Se athu, ngako hi di txhatukile, hi to pinda Tiro hi txi ya Pitolomayi, se msana ka kulosana ni vanathu, hi to zumba ditshiku dimwedo navo.

⁸ Mangwanani ka kona hi to pinda hi ya Khezareya. Se hi ti ya temela m'tini ka mvangeli Filipi, i nga ti mmweyo wa vale va mtxhanu ni vambidi.

⁹Ene a ti ni mune wa vanana va sihoranana, ava va nga ti profeta.

¹⁰ Ngako hi nga zumba konaho masiku amangi, a to relela na a txi ta ngu Judheya mprofeti wu a dhanwako ku i Agabho.

¹¹Ene a to hi tshuketela e teka libhande la Paulo, a txi ti sunga ngu lona minenge ni mawoko, a txi khene: “Moya wo Sawuleka wu womba tiya: ‘Vajudha va na ya sungisa tona tiya, Jerusalema, dijaha di i ku nyamne wa libhande liya, se va na di ningela manzani ka vamatiko.’ ”

¹²Ngu konaho ka mapswi awa, hotshe kumweko ni va ditiko donedo, hi to khata kukhongotela Paulo ti to asi kweli eya Jerusalema.

¹³Konaho ene a to angula, a txi khene: “Mi dilela txani, mi ni tholako mbilu, kani? Ni ti emisete, i si nga kuya sungwa dwe, aniko hambi kuya fa Jerusalema ngu mhaka ya ditina da Mkoma Jesu.”

¹⁴Ngako yi nga ti pwateka nzila ya ku mu thindekisa, hi to leka ku mkhongotela, hi txi khathu: “Ku na mahwe kuranda ka Mkoma.”

¹⁵Msana ka masiku okari, ngako hi di gwitile kulongela, hi to kwela hi ya Jerusalema.

¹⁶Va hi heleketile vagondiswa vokari va Khezareya, va txi hi yisa m'tini ka mthuyo a dhanwako ku i Menasoni, wa Kipra, mmweyo wa vagondiswa vo thanga, ahawa hi nga ti fanela kuamukelwa hi zumba kona.

¹⁷Ngako hi di hokile Jerusalema, vanathu va hi amukete ngu kutsaka.

¹⁸Mangwanani ka kona Paulo a tsute ni nathu m'tini ka Jakobe, ahawa ma nga tshangana otshe madhota.

¹⁹Msana ka kulosa, a to khata kutxhatxhameta masoni kwawe, yimweyo ngu yimweyo, totshe ti Txizimu txi nga ti maha ngu ngene hagari ka vamatiko.

²⁰Vona va ti dhumisa Txizimu ngu tile va nga ti tiengisa. Va txi gela Paulo, va txi kha vona: “Wa ti wona, mwanathu, ti to magumi a mazana a Vajudha va amukete likholo, hambiko votshe i ku vakhutaleli va Mlayo;

²¹Se va ti engisile ti to awe wa gondisa Vajudha va va nga hangalaka hagari ka vamatiko ti to va na leke kulondetela Mlayo wa Mosi, u txi va gela ku khawe va nga swe ve yisa wukwerani vafana vawe, va si londeteli kambe mikhuwo yathu.

²²Hi na maha txani kani? Kunene, dibutho di na rambana, ngako di txi tipfa ti to u bwakile.

²³Ngu toneto, maha ti hi no kugela. Ahawa hi na ni mune wa vavamna va nga maha txixambanyo.

²⁴Tsula navo, ti basise kumweko navo, u txi va hakelela asi si lavekako, kasiku ve yolwa misisi. Ngu toneto, votshe va na tiziva ti to mahungu awa va ma wombako ngu ngawe nga makuhu, ni ti to awe nawe kasi u mxayisi wa Mlayo.”

²⁵ “Vamatiko vava va nga amukela likholo, hi khala hi txi va bhalela ati hi nga sunga tona: Ti to va na ti wonele ka tinyama to phaxwa ka sithombe, ka mnoha ni ka tinyama to dawa ngu kukamwa mkolo, ni ka mithumo ya wugango.”

²⁶Sekoko ti di mahile eto, na di ti txite, Paulo a to teka vavamna vale e tsula navo, se msana ka kuva a di ti basisile navo, a to wulela Dithepeleni, aha a nga ya zivisa mbimo yi mmweyo ni mmweyo wawe a no ningela mhamba yakwe ngu yona, msana ka masiku a kubasiswa.

²⁷Ngako ma di hafuhi ni kuguma masiku ale a mtxhanu ni mambidi, Vajudha va Aziya, ngako va di mu engisile Dithepeleni, va to kujetela dibutho, va txi mñola,

²⁸va txi viketa, va txi kha vona: “Vavamna va ka Israyeli, hi vhuneni! Ndiyo m'thu wuwa a lwako ni va ka kwathu, ni Mlayo ni wukhalo wuwa, ngu ti a gondisako ka otshe makhalo ni ka votshe vathu. Se kupinda tiya, a wuletile Vagriki Dithepeleni muwa, e nyeta wukhalo wuwa wo Sawuleka.”

²⁹Kunene, vona va ti thangile ngu kuwona muefesu Trofimo kumweko nayo didhoropani, ve pimisa ti to Paulo a mu wuletile Dithepeleni.

³⁰Dotshe didhoropa di to tala ngu kuhenya, vathu va txi sengeletana, na va txi huma ngu otshe makhalo. Va to ñola Paulo va txi mu ruruvisela hahanze ka Dithepele, va txi kuluveta kuseka matimba.

³¹Va di ngadi va txi lava ku m'daya, mhaka yiya yi to engiswa ngu mthangeli wa yimbi, va txi kha vona: “Ku vhilukile dizunga kotshe didhoropani ka Jerusalema.”

³²Konaho mthangeli a to teka masotxhwa ni vathangeli va mitxawa ya dizana, a relela eya ka vale va nga ti maha vhilinganya. Vona ngako va txi wona mthangeli wa yimbi ni masotxhwa, va to leka kupeka Paulo.

³³Sekoko mthangeli wa yimbi a to tshuketa e ñola Paulo, e rumela ku e sungwa ngu tingomondo timbidi, e muwotisa tito: Ngene mani, ni ti to nji txani a nga maha kani?

³⁴Kambe hagari ka dibutho m'thu ni m'thu a ti womba takwe. Mthangeli wa yimbi, ngako a txi tandeka kumana ditshuri hagari ka diguwa di di nga ti ho, yi to rumela ku Paulo a na heleketwe khokholani.

³⁵Mbimo yi a nga hoka ha dinerani, a to mahwa ngu kugulwa ngu masotxhwa, ngu kukarala ngu kusukwa ngu dibutho.

³⁶Nguko dibutho di ti mu londetela, na vathu va kona va txi kwangula, va txi kha vona: “M'daye!”

³⁷Ngako va di mu betile khokholani, Paulo a to gela mthangeli wa yimbi, a txi khene: “Ni nga sikota ku kugela dipswi dimwedo kani?” Mthangeli a to mu wotisa, a txi khene: “Wa txi ziva Txigriki kani?

³⁸Ina hi nga awe Muegipta wu kunukunuko a nga wusa dizunga e yisa txiwulani 4.000 wa sigevenga kani?”

³⁹Aniko Paulo a to khene kwakwe: “Ani ni Mujudha, ni huma Tarso ka Kilikiya, ni velekelwa ka didhoropa di di ku ni nduma yo va i si nga ya yidotho. Na kombela u txi ni tumelela kuwombawomba ni va ditiko diya.”

⁴⁰Ngako a di tumeletwe, Paulo, a di emile txitimwi ka dinera, a to malata vathu ngu diwoko. Vona ve malala ku txi katila. Se ene a txi va txhumayela, a txi khene: