Read chopi Mithumo 26 Bible Online

Mithumo 26 - chopi bible

Mithumo 26

¹Se Agripa a txi khene ka Paulo: “U nga ti wombawombela.” Se a to gwimba diwoko, e ti angulela, a txi khene:

²“Ka totshe timhaka ti ni mangalwako ngu tona ngu Vajudha, awe mfumeli Agripa, ni khani ni katekile, ngako ni txi ti xamulela masoni kwako nyamsi;

³nguko awe wa ma zivisisa otshe mahanyelo a txijudha ni totshe timhaka ti va kanetisanako ngu txona. Ngu konaho, na ku kombela u txi ni engisa kha kwati.

⁴Ati ni nga hanyisa tona ditikoni ka Jerusalema, kukhukhela ha wananani kwangu, votshe Vajudha va tiziva.

⁵ Vona va tiziva ngu kale, va nga fakaza ngako va txi ti lava, ani ni hanyile ngu mlayo wa wufarisi, awu i ku wa wunene ngutu ka wukholwa wathu.

⁶Se konkuwa ni maneka hawa ni txi lamulwa ngu mhaka ya kuverela txithembiso txi txi nga mahwa ngu Txizimu ka vatate vathu,

⁷i ku txithembiso txi tihunzu tathu ta digumi ni timbidi ti verelako ku txi mana, na ti txi khutalela kukhozela Txizimu wusiku ni mitshikari. Mfumeli Agripa, ni mangalelwa ngu Vajudha ngu mhaka ya txona txithembiso txiya.

⁸Ngu kutxani va si kholwi vathu hagari kwanu ti to Txizimu txi nga wusa vakufa kani?”

⁹ “Nanani kale ni ti pimisile kulwa ngu totshe tinzila kasi kudaya ditina da Jesu wa Nazareta.

¹⁰Kha ditshuri ni mahisile toneto Jerusalema, ni sekela mkorani vasawuleki votala, ngu mtamo wu ni nga ningwa ngu vaphaxeli va hombe; ni mbimo yi va nga ti ningelwa kuya dawa, nani ni ti tumela ku va na dawe.

¹¹Sikhati sasingi, mbimo yi ni nga ti tsimbilatsimbila ka otshe masinagoga, ngu tshofu ni ti va kurumeta kuruketela Txizimu; se ngu kuhenya ko pindisa, ni ti va xanisa hambi madhoropani ka mamwani matiko.”

¹²“Ti di mahile eto, ni tsute Dhamasku, ni di ni mtamo wotshe wa kuningwa ngu vaphaxeli va hombe.

¹³Ni di ha nzila, ngu mbimo ya dhina, mfumeli, ni to wona liwoningo la hombe, la kuta ngu nzumani, lo phatima ngutu kupinda ditambo, ali li nga ni randela kumweko ni va ni nga ti navo.

¹⁴Konaho, hi to wela hahatshi hotshethu; se ani ni to engisa dipswi di txi womba-womba ngu Txihebheru, di txi kha dona: ‘Sawule, Sawule, u ni xanisela txani kani? Ta pandisa kwako kukhava tshoka ya mndombo.’

¹⁵Se ni txi khani: ‘Ngawe mani, Mkoma kani?’ Mkoma a txi khene: ‘Ngani Jesu, wu awe u mu xanisako.

¹⁶Aniko khukha u txi ema, nguko ni ti wonekisile kwako, ni kusawute kasiku u txi maha mthumeli ni fakazi ya ti ni nga ti wonekisisa tona kwako, ni ya ti ni no ti wonekisisa tona kambe kwako.

¹⁷Ni na kuhulukisa manzani ka vathu va ditiko diya, ni ka vamatiko vava ni ku rumelako kwawe;

¹⁸Kasi kuya tula maso awe ni ku va humisa mtemani, ve wuya livaningoni, ni ku va humisa nfumoni ka Sathani, ve wuya ka Txizimu, kasiku ve amukela divalelo ya sionho, ni kuavelwa thomba kumweko ni vasawuleki ngu kukholwa ditinani kwangu.’ ”

¹⁹“Ngu toneto, mfumeli Agripa, ani kha na lamba txiwoniso txiya txa nzumani:

²⁰ Aniko kukhata ni txhumayete ka va Dhamasku, ni va Jerusalema, ni va dotshe ditiko da Judheya, kala ka vamatiko, ti to ve phinduka ve wuya ka Txizimu, va txi maha mithumo yi yi dinganako kuphinduka kwawe.

²¹Ngu toneto, Vajudha va nga ni ñola ngu tona Dithepeleni, ve zama ku ni daya.

²²Kambe, ngu kuvhunwa ngu Txizimu, ni tsanisete kala ditshiku da nyamsi, ni txi fakaza ka va vavadotho ni ka va va hombe; kha na womba timwani hahanze ka tiya Mosi ni Vaprofeti va nga womba ku ti na humelela,

²³ti to Kristu a na xaniswa, ni tito, ngukuva a di thangile ene e wuka ka vakufa, a fanete kunuwela liwoningo ka vathu va ditiko diya ni ka vamatiko.”

²⁴Paulo, a di ngadi a txi ti angulela ngu mapswi awa, Festo a to gula dipswi, a txi khene: “Wa xanga, mo Paulo! Sigondo si sako sasingi sa kuxangisa!”

²⁵Paulo a txi khene: “Ani kha na xanga, mfumeli Festo; kambe ni womba mapswi a ditshuri ni a wuzivi.

²⁶Hakunene, mfumeli wu a ni tsanisako ni txi womba-womba masoni kwako, wa tiziva totshe tiya, txi walo ni txa tximwetxo a txi timelelako, nguko kha ta mahwa kusisalani.

²⁷Ina wa kholwa ka Vaprofeti kani, mfumeli Agripa kani? Ani na tiziva ti to wa kholwa.”

²⁸Agripa a to khene ka Paulo: “Ngu kadotho u pimisa ti to u nga ni maha mkristu!”

²⁹Paulo a txi khene: “Ngu kadotho mwendo ngu ka kungi, ni kombela ka Txizimu ti to i si nga awe dwe, kambe ni votshe va va ni engisako nyamsi, mi txi fanana ni nani, kuleka ngu titxhini ti ni nga sungwa ngu tona.”

³⁰Konaho mfumeli a to khukha kumweko ni mthangeli, ni Bhernike, ni va va nga ti khalahatshile kumweko navo.

³¹Ngako va di humile, va to bhula va txi kha vona: “M'thu wuwa kha maha txilo txi txi fanelwako ngu lifo hambi titxhini.”

³²Se Agripa a txi khene ka Festo: “M'thu wuwa a ndi na thuswa, idiku a sa kombela kulamulwa ngu Khezari.”