Read chopi Mithumo 28 Bible Online

Mithumo 28 - chopi bible

Mithumo 28

¹Msana ka kuva hi di hulukile, hi zivisilwe ti to txitondolo txile txi dhanwa ku i Malta.

²Vathu va kuvelekelwa konaho va to hi amukela ngu manza mambidi; veza ve hi dhivelela ni mndilo, ngu ku ma nga txi wa mati, na kambe ku ti ni pheho.

³Ngako Paulo a nga ti rolete txinyandana txa mahale e ma rinza ha mndiloni, mamba[3] yi nga huma ngu kupfa kufutumela ka mndilo, yi to namarela ha diwokoni kwakwe.

⁴Mbimo yi vathu va ditiko dile va nga wona txikalani txile txi di lengalenga diwokoni ka Paulo, va to gelana, va txi kha vona: “Ngu ditshuri mamowa njigevenga: I ngadi kwakwe kuhuluka lineneni, kambe Nzuma kha yi ti lavi e hanya.”

⁵Aniko ene a to huphuta mnyoka wule, wu txi wa ha mndiloni, se ene kha nga za a di humeletwe ngu phango ya txilo.

⁶Kasi vona va ti rinzela ku mu wona a txi simbela mwendo kufa kunukunuko. Msana ka kuverela mbimo yo lapha va si woni txilo txo hambana, txi txi mu humela, va to txitxa mawonelo, va txi kha vona: “M'thu wuwa i Njixizimu tximwani.”

⁷Ku ti ti ho kona hale hafuhi, thembwe ya mthangeli wa txitondolo, a nga ti dhanwa ku i Publiyo. Ene a to hi amukela, a txi hi ninga wukhalo wa kuzumba masiku mararu.

⁸Se tate Publiyo a ti ha ditahoni ngu kulwala ngu txindeyandeya ni mndani. Paulo a to tsula a txi ya mu txisela, a txi maha mkombelo ni ku msanzeka manza, se ene e kalamuka.

⁹Va di zivile toneto, vamwani valwali va to mu yela, veya hanyiswa ni vona.

¹⁰Konaho, va to hi bonga ngu ku hi komba txixonipho txa hombe; se mbimo yi hi nga khukha hi satisana navo, va to hi ninga sotshe si hi nga ti si pwata.

¹¹Msana ka mitxima yiraru, hi to tsula ngu txitimela, txi nga ti kona txitondoloni mule, ngu mbimo ya wuxika. I ti txa kuta ngu Alexandriya. Txi ti ni m'jeke wa “Sizimu sa Mahasa.”

¹²Se hi to hoka Sirakusa, ahawa hi nga ya fungala masiku mararu.

¹³Konaho hi to khukha hi tsimbila ngu ligungusa hi txi ya hoka Regiyo. Mangwanani ka kona ku to futeta moya wa wulambwe, se hi txi hoka Puteyoli ngu masiku mambidi.

¹⁴Ngako hi di mani konaho vanathu, vona va to hi kombela ti to hi zumba navo mtxhanu wa masiku ni mambidi. Ngu toneto, hi nga pindisa txona hi txi ya Roma.

¹⁵Vanathu va didhoropa dile, ngako va di zivisilwe ta kubwaka kwathu, va to hi hingeta ve hoka mthandani ka Apiyo, ni ka wukhalo wu wu dhanwako ku i “Mawetela a Mararu.” Ngako Paulo a di va woni, a to bonga ka Txizimu e tsanisa mbilu.

¹⁶Mbimo yi hi nga wulela Roma, Paulo a to tumelelwa kuzumba ka nyumba ya ekha, kumweko ni disotxhwa di di nga ti mu woneleta.

¹⁷Msana ka masiku mararu, Paulo a to ramba va i ku vahombe hagari ka Vajudha. Ku ti ngako va di sengeletani, a ti khene kwawe: “Vanathu, hambiko ni nga mbi maha txilo txa kuhoxela ditiko dathu, hambi mikhuwo ya vatate vathu, ni ñotwe ni di Jerusalema, ni txi ningelwa manzani ka Varoma.

¹⁸Vona, ngako va di ni wotisile, va to lava ku ni thusa, nguko ku ti si nga ni mnandu wo dingana ku ni dawa.

¹⁹ Kambe ngako Vajudha va nga lamba, ni zile ni kombela kuyisa mhaka yangu ka Khezari, i si nga kulava kumangalela ditiko dathu ngu txilo.

²⁰Ngu konaho ni nga mi dhana kasi ku ta mi wona, ni kuwombawomba ni nanu, nguko ni sungilwe ngu titxhini tiya ngu mhaka ya kuthemba ka Israyeli.”

²¹Sekoko vona va mxamute, va txi kha vona: “Kha hi nzi kuwona mapapilo a kuta ngu Judheya, na ma txi womba kubiha ngu ngawe; hambi vanathu, kuwalo ni mmweyo a nga xawuta mwendo ku hi gela kubiha ngu ngawe.

²²Se hi lava kupfa ngu ngawe ati u pimisako tona, nguko i di gondo yiya, ha tiziva ti to ya lambwa ngu votshe vathu.”

²³Ngako va di mu vekete ditshiku, va to ta nyumbani kwakwe, i di vangi. Ka mapswi a kutxhamusela kwakwe, Paulo a ti fakaza ngu ta Mfumo wa Txizimu se kukhukhela ha mixo kala minova, a txi zama ku va kholwisa ngu ta Jesu, a txi va dinganisela ngu Mlayo wa Mosi ni Vaprofeti.

²⁴Aniko vamwani kha va tumela.

²⁵Se ngako va nga ti si pfani, va to khata kuhangalaka. Se Paulo a to va gela dipswi dimwedo, a txi khene: “Ngu ditshuri, Moya wo Sawuleka wu wombile ngu txisofu txa mprofeti Isaya ka vatate vanu, wu txi kha wona:

²⁶‘Tsula ka vathuvo, u txi ya va gela ku khawe: Kuengisa, mi na engisa, aniko kha mi na mbi ti mana; kuwona, mi na wona, aniko kha mi na mbi ti pima.

²⁷Nguko mbilu ya vathu vava yi bangile. Va tsivile tinzeve tawe, ve vhala maso awe, kasiku va si woni ngu maso, va si engisi ngu tinzeve, va si ti pfisisi ngu mbilu, kasi ku vona va si hunduluki. Ani nga ni di va hanyisile!’ ”

²⁸“Ti ziveni koko ti to mhaka yiya ya kuhanyiswa ngu Txizimu yi rumetwe ka vamatiko, se vona va na yi engisa.”

²⁹[Ngako a di va gete timhaka tiya, Vajudha va to khukha ve tsula, na va txi kanetisana ngu txawe.]

³⁰Se Paulo a to pinduka malembe mambidi a txi zumba ka nyumba yi a nga ti lombile. A txi amukela votshe va va nga ti ta kwakwe,

³¹a txi txhumayela ngu ta Mfumo wa Txizimu ni kugondisa ngu ta Mkoma Jesu, ngu kotshe kutsana, asi tsivelwi ngu txilo.