Read chopi Mithumo 3 Bible Online

Mithumo 3 - chopi bible

Mithumo 3

¹Pedro ni Johani va to kwela veya Dithepeleni kuya maha mkombelo ngu txikhati txa wuraru txa minova.

²Ha txikeni ka Dithepele, ahawa ku nga ti dhanwa ku Txike txo Tshura, a ti ti ho m'thu wokari, a nga velekwa i di txidiya, awuwa va nga txi tolovela ku mu gula, otshe masiku, va ta mu veka kona hale, kufela ku e kombela sa kuhiwa ka vale va nga txi wulela Dithepeleni.

³Mbimo yi a nga wona Pedro ni Johani va di hafuhi ni kuwulela Dithepeleni, a to va kombela txivhuno.

⁴Ti di mahile eto, Pedro kumweko ni Johani, a to gula maso a txi mu wonisisa, se a txi khene kwakwe: “Hi wone!”

⁵Awu wa txilima e tshembereka a txi va wonetela ngu wumbidi wawe, na a txi pimisa ti to va lava ku muha txivhuno txa male.

⁶Kambe Pedro a to khene kwakwe: “Kha ni nga ni nzalama mwendo silivhela, aniko asi ni ku naso ni na kuninga: Ngu ditina da Jesu Kristu wa Nazareta, khukha u txi tsimbila!”

⁷Ngu msana a to mñola ngu diwoko da txinene e mu emisa. Kunukunuko mikondo yakwe ni mazolo akwe me tsana.

⁸Se ene a to ndaka a txi ema, e khata kutsimbila. Se e wulela navo Dithepeleni, e tsimbila a txi giringa, na a txi dhumisa Txizimu.

⁹Votshe vathu va mu woni a txi tsimbila, na a txi dhumisa Txizimu.

¹⁰Va mu zivile ti to ngene wule a nga ti zumba ha Txikeni ko Tshura, a txi kombela, se ve xamala ngutu ni kudiwuka totshe tile va nga ti wona ti di mahekile kwakwe.

¹¹Se ngako m'thu wuwa a nga ti namarela ka Pedro ni Johani, votshe vathu va to xamala, ve tutumela m'hubheni, awu wu dhanwako ku mbwa Solomoni.

¹²Ku ti ngako Pedro a txi wona tiya, a to gela vathu, a txi khene: “Vavamna va Israyeli, mi xamalela txani mhaka yiya kani? Mwendo mi hi ronolela ngu txani, mi txi nga hi to mu tsimbilisa m'thu wuwa ngu mtamo wathu, mwendo ngu wukhongeli wathu, kani?”

¹³“Txizimu txa Abrahamu ni txa Isaake ni txa Jakobe, Txizimu txa vatate vathu txi dhumisile txithumi txa txona Jesu, awu anu mi nga mningela, mi nga mlamba kambe masoni ka Pilato, kasi ene a ti ti lamute ti to a na thukunyulwe.

¹⁴ Mi lambile Msawuleki ni Mlulami, mi tamarisa mi txi kombela kuthukunyulwa ka txigevenga,

¹⁵mi txi dayisisa mningi wa wutomi. Txizimu txi mwusile ngu ka vakufa; athu hi tifakazi ta eyo mhaka.

¹⁶Ngu kukholwa ditinani ka Jesu, ngu dona ditina dakwe di nga tsanisa m'thu wuwa mi mu wonako ni ku m'ziva; se likholo liya ngu lona li nga mu hanyisa ngu ditshuri masoni kwanu motshenu.”

¹⁷“Hambi keto, vanathu, na tiziva ti to mi mahile tiya ngu kusisalelwa, kufana ni vona vathangeli vanu.

¹⁸Kambe Txizimu, ngu nzila yo nga tiya, txi lavile kutatisa ati txi nga songolela ku ti womba ngu txisofu txa votshe vaprofeti, atiya taku: Kristu a fanete kuxaniseka.

¹⁹Ngu toneto, pandisekani mbiluni kwanu, mi txi hunduluka, kasi mi na mana divalelo ya sionho sanu.

²⁰Se Mkoma Txizimu a na mi wuyisela mbimo ya kuhumula; ka yoneyo mbimo a na mi rumela Kristu, awu a nga mi thembisa, i ku ene Jesu,

²¹awu nzuma yi fanelako ku mu amukela, kala kuza kuhoka mbimo ya kuwuseta sotshe si Txizimu txi nga si womba ngu sisofu sa votshe vaprofeti va txona vo sawuleka, va kale ni kale.

²²Mosi a wombile, a txi khene: ‘Mkoma, Txizimu txanu, a na mi humisela, hagari ka vananu, mprofeti wu a fanako ni nani, mi na mu engisa ka totshe ti a mi gelako tona;

²³se wuhi ni wuhi a no mbi engisa mprofetiyo, a na thaviswa ha ditikoni.’

²⁴Votshe vaprofeti va va nga womba-womba, kukhukhela ka Samuwele ni va va mu gametako, votshe va ma profetile masiku awa.

²⁵ Nganu mi ku vanana va vaprofeti ni va txitumelelano txiya Txizimu txi nga txi maha ni vatate vathu ngako txi txi womba mapswi awa ka Abrahamu: ‘Ngu konaho ka liveleko lako, totshe tixaka ta mafu ti na katekiswa.’

²⁶Txizimu txi khatile ngu nganu ku mi wuyisela Txithumi txa txona Jesu, txi m'rumela ku ta mi katekisa, kasiku mi hunduluka, mmwani ni mmwani kubihani kwakwe.”