Read chopi Varoma 12 Bible Online

Varoma 12 - chopi bible

Varoma 12

¹Na mi khongotela koko vanathu ngu wumbilu wa Txizimu, ti to mi ningela mimidi yanu, yi maha mhamba ya kuhanya ni ya kusawuleka, ayi yi tsakisako Txizimu, i kuwona mphaxo wu wu lavekako.

²Mi nga xengetelweni ngu sa ditiko diya, aniko phindukani amu ka mapimo anu, kasiku mi ziva kuranda ka Txizimu: Ati i ku ta tinene, a ti ti mtsakisako, ni ti i ku ta kuhetiseka.

³Ngu mtamo wa kateko yi ni nga ningwa, na laya mmwani ni mmwani a ku hagari kwanu ti to asi thuki a txi ti alakanyela kupinda mpimo wa fanelo yakwe, aniko a nave ni mapimo a kutiveka hahatshi, madingano ni mpimo wa likholo li Txizimu txi nga avela ka mmwani ni mmwani hagari kwanu.

⁴ Nguko, kufana ni ku hi ku ni sihango sasingi ka mmidi wumwewo, kambe sihango siya si si mahiko mthumo wumwewo,

⁵ngu toneto nanathu, hambiko hi ku vangi, hi mmidi wumwewo ngu ka Kristu, se mmwani ni mmwani njihango txa mkwawe.

⁶ Ngu konaho, ngako hi ku ni sihiwa so hambana, madingano ni kateko yiya mmwani ni mmwani kwathu a nga ningwa yona, he si thumiseni; awu a ku ni txihiwa txo nuwela dipswi da Txizimu, a na nuwele ngu mpimo wa kukholwa kwakwe;

⁷awu a ku ni txihiwa txa kuthumela vamwani, a na va thumele; awu a nga ningwa kugondisa a na gondise;

⁸ awu a nga ningwa kulaya a na laye; awu a abaniselako, a na mahe ngu kutxhatxheka; awu i ku mthangeli a na thume ngu kutiningetela; awu a mahako mithumo ya wumbilu a na yi mahe a di henemene.

⁹Lirando li nga ve ni kuxengetela, vengani to biha, mi txi namarela ka ti i ku ta tinene.

¹⁰Zumbani ngu kurandana nga vanana va m'thu mmweyo, mi txi palisana ngu kukombisa txithavo ka mmwani ni mmwani.

¹¹Khutalani, mi nga telweni ngu dikhodho; turani moyani, mi txi thumela Mkoma.

¹²Tsakani kuthembani kwanu, mi txi timisela kuxanisekani; mi txi simama kukhongelani.

¹³Vhunetani vasawuleki ka si va si pwatako, mi txi amukela vapfhumba ngu manza mambidi.

¹⁴ Katekisani va va mi zondako, va katekiseni, mi nga wombeni kubiha ngu vona.

¹⁵Tsakani ni va va tsakako, mi txi dila ni va va dilako

¹⁶ Zumbani ngu kuengisana; mi nga naveleni sa kuguleka; kambe sengelani ni va va ti vekako hahatshi; mi nga laveni ku ti maha titxhari mialakanyoni kwanu.

¹⁷Mi nga tshumeteleni kubiha ngu kubiha, kambe zamani kumaha ti i ku ta tinene masoni ka votshe vathu.

¹⁸Zamani kumaha ti mi ti kotako ngu didhawa danu, kasi ku mi hanya ngu kuthutha ni votshe vathu.

¹⁹ Vo randeka ngutu, mi nga photeni mipune, kambe lekani Txizimu txi ti henyela, nguko ti bhatwe ti taku: “Kuphota kulumba ani, ngani ni no tshumetela, kuwomba Mkoma.”

²⁰ Aniko, ngako mlala wako a di ni nzala, mu he sakudya. A di ni ditora, mu ninge so sela, nguko u txi maha eto, wo hembenyetela makala a mndilo ha msungo kwakwe.

²¹U nga xulwe ngu kubiha, kambe xula kubiha ngu wunene.