Read chopi Varoma 13 Bible Online

Varoma 13 - chopi bible

Varoma 13

¹M'thu ni m'thu a na engise wukoma; nguko kha ku nga ni wukoma wu wu sitiko ngu ka Txizimu. Se vafumeli va va kuho va vekilwe ngu Txizimu.

²Ngu konaho, ava va engisako wukoma, va engisa mlayo wu wu nga vekwa ngu Txizimu. Se ava va eyisako va dhana kuabaniswa txitimwi kwawe.

³Nguko ava va fumako hi nga valala ka mithumo ya yinene, aniko hahanze ka yile yo biha. Ina u dhunda kuhanya u si nga ni txithavo ka wuthangeli kani? Maha ta tinene, u na dhundwa ngu wukoma;

⁴nguko mfumeli njirumwa txa Txizimu, txa ku kuvhuna kumaha ta tinene. Kambe ngako u txi maha to biha, u fanete kuthava, nguko mfumeli kha ñoli ditxhari mahala. Njirumwa txa Txizimu kasi kulamula ni kutsayisa ava va mahako to biha.

⁵Ngu konaho, mi fanete kutiveka hahatshi ka wukoma, i si nga ngu kuthava kuhenyelwa dwe, aniko ngu mhaka ya livhalo.

⁶ Ngu konaho mi humisako mikhupo, nguko vafumeli nzithumi sa Txizimu, si khutalako ka mthumo wuwa.

⁷Va ningeni votshe asi si va fanelako: Awu a fanelako kuamukela mkhupo mningeni; awu a fanelako kuamukela nduwo, mluveni; awu a fanelako kuxoniphwa, mxonipheni; awu a fanelwako ngu txithavo, mthaveni.

⁸Mi nga veni ni txikweneti ka mmwani m'thu, hahanze ka txikweneti txa lirando. Nguko awule a randako m'thu kulowe, a hetisile mlayo.

⁹ Nguko sirumo si si ku: “U nga geleze, u nga daye, u nga pe, u nga navele” hambi ni sihi simwani sirumo, sotshe si tshanganiswa ngu dipswi diya diku: “U na randa muakelani nga ti u ti randisako tona awe upune.”

¹⁰Lirando kha li mahi kubiha ka muakelani. Ngu toneto, lirando ngu lona i ku ditshina da mlayo.

¹¹Mahani totshe tiya, nguko ma yi ziva mbimo yi hi ku ka yona: Se i mbimo yo wuka wukoheni. Konkuwa kuhanyiswa kwathu ku hafuhi ngutu kupinda mbimo yile hi nga amukela ngu yona likholo.

¹²Wusiku wu pindile, kutxa ka tshuketela. He lekeni mithumo ya txidema, he xomeni matxhari a liwoningo.

¹³Nga tiya i ku mitshikari, he tsimbileni ngu fanelo, hi hambana ni limito mwendo wudevi, ni wugango mwendo wugelegele, ni livengo mwendo dibava.

¹⁴Aniko ambalani Mkoma Jesu Kristu, mi nga khataleleni mmidi, kasiku mi si londisi kunavela ka wona.