Read chopi Varoma 14 Bible Online

Varoma 14 - chopi bible

Varoma 14

¹ Amukelani awu a nga mbi tsana likholoni, mi si kanetisani nayo ngu ti a kholwisako tona.

²Nguko likholo la mmwani la m'tumelela kudya sotshe silo, kasi awu wa ku ambi tsana, a dya mndiwo wa mazokoro dwe.

³Awu a dyako sotshe a nga thuke e tseketsela wu asi dyiko sotshe, se awu nene asi dyiko sotshe, a nga thuke e tseketsela wu a dyako sotshe, nguko, Txizimu txi mu amukete.

⁴U mani awe u lamulako txithumi txa mmwani kani? Mwendo txithumi txiya txa ema mwendo txa wa, eto ti ziwa ngu nyamne wa txona; aniko txona txi na ema, nguko Mkoma a ni mtamo wo txi emisa.

⁵Mmwani a pimisa ti to ditshiku da hambana ni dimwani ditshiku, kasi mmwani a pimisa ti to otshe masiku ma fana. Mmwani ni mmwani, a na mahe nga ti a kholwisako tona mbiluni kwakwe.

⁶Awu a ti sawulelako ditshiku dokari, a di sawulela Mkoma. Awu a dyako sotshe, a dya ngu mhaka ya Mkoma, nguko a bonga Txizimu. Nene wu asi dyiko sotshe, kha si dyi ngu mhaka ya Mkoma, nene a bonga Txizimu ngu sona.

⁷Hagari kwathu kha nga ho wu a ti hanyelako ene apune, kambe kha nga ho wu a ti felako ene apune.

⁸Ngako hi txi hanya, hi hanyela Mkoma; ngako hi txi fa, hi fela Mkoma. Mwendo ha hanya, mwendo ha fa, hi lumba Mkoma.

⁹Kristu a fite e tshumela e wuka ka vakufa, kasiku e maha Mkoma wa vo hanya ni vo fa.

¹⁰ Ngu kutxani u lamulako mkwanu kani? Ani awe, u tseketselela txani mkwanu kani? Kuve hotshethu hi na ya ema masoni ka txikhalo txa kulamula txa Txizimu.

¹¹Nguko ti bhatwe ti taku: “Ngako ni hanyako, kha Mkoma, otshe mazolo ma na khizama masoni kwangu, ni totshe tidimi ti na dhumisa Txizimu.”

¹²Ngu toneto, mmweyo ni mmweyo wathu a na ya ti xamulela masoni ka Txizimu.

¹³Ngu toneto, he lekeni kulamulana ngu txathu; kambe ti woneleni mi si vekeli mkwanu txikhuvekiso, hambi txitsha txa ku mu humba.

¹⁴Na tiziva ni va ni kholwa ngu ka Mkoma Jesu, ti to kha ku nga ni txilo txi txi nga mbi basa ngu wutumbu wa txona; ngako m'thu a txi alakanya ku tximaha txokari txi nyenyezile: Kwakwe kha txa basa.

¹⁵Kambe ngako mkwanu a txi karateka ngu mhaka ya si u dyako, awe se khu tsimbili ngu lirando. U nga m'daye ngu sakudya sako awu Kristu a nga m'fela.

¹⁶Ngu toneto, wunene wanu wu nga thuke wu txi soleka.

¹⁷Nguko Mfumo wa Txizimu hi nga kudya ni kusela; aniko ngu kululama, ni kudikha, ni kutsaka ngu ka Moya wo Sawuleka.

¹⁸Nguko awu a thumelako Kristu ngu nzila yiya, wa tsakisa Txizimu, na a txi dhundeka ka vathu.

¹⁹Ngu konaho, he xoteni kumaha ati ti vangako kudikha ni ti ti hi akako amu ka likholo.

²⁰U nga hasamule mthumo wa Txizimu ngu mhaka ya sakudya. Kha ditshuri sotshe silo si basile; aniko si bihile ngako m'thu a txi dya kambe a txi khuvekisa mmwani.

²¹Ti tshurile ngako u si dyi nyama, u si seli vhinya, u si mahi txilo txihi ni txihi txi khuvekisako mkwanu.

²²Atxiya u kholwako ngu txona, zumba natxo masoni ka Txizimu. A katekile m'thu wu asi ti ningiko mnandu ka silo si asi wonako ti to si lulamile.

²³Kambe awu a kanakanako e lamba e dya, a abanisilwe, nguko a dya a si nga ni likholo la ditshuri. Nguko totshe ti ti si mahwiko ngu kukholwa, njionho.