Read chopi Varoma 15 Bible Online

Varoma 15 - chopi bible

Varoma 15

¹Athu hi ku ni mtamo, hi fanete kurwala kutandeka ka va va ku si nga ni mtamo, hi si lavi asi si tsakisako wutumbu wathu dwe.

²M'thu wuhi ni wuhi wa ka kwathu a na lave kutsakisa m'thu kulowe e mnavelela ati ti mu akako.

³ Nguko Kristu nene kha lava ku ti tsakisa, aniko a mahile nga ti ti nga bhalwa taku: “Siruko sa va va nga kuruka si ni welete txitimwi kwangu.”

⁴Se totshe ti ti nga bhalwa kale, ti bhaletwe ku ti txi hi gondisa; kasiku hi mana txithembo ngu kuhonisela ni thavelelo yi hi yi manako amu ka Mibhalo.

⁵Txizimu txa lihoniselo ni litsako txi na mi ninge mahanyelo o fana ni a Kristu Jesu,

⁶kufela ku mi dhumisa ngu diganda Txizimu, atxi i ku Tate wa Mkoma wathu Jesu Kristu.

⁷Ngu konaho, amukelanani nga Kristu a nga mi amukela mi txi ya kupfaliswani ka Txizimu.

⁸Na womba ti to Kristu a ti mahile mthumeli wa sithiva sa Vajudha, kasi kukombisa ditshuri da Txizimu ni kutsanisa sithembiso si si nga mahwa ka vatate vathu;

⁹ Se i di ka vamatiko, vona va dhumisa Txizimu ngu mhaka ya wumbilu wa txona, nga ti ti nga bhalwa taku: “Ngu konaho, ni na kupfalisa hagari ka vamatiko, Kambe ni na embelela tindando ta kudhumisa ditina dako.”

¹⁰Wa womba kambe a txi khene: “Tsakani anu vamatiko kumweko ni vathu vakwe.”

¹¹Ka wumwani wukhalo kambe: “Anu vamatiko motshe, dhumisani Mkoma; votshe vathu va na m'dhumise.”

¹²Kambe Isaya nene wa womba a txi khene: “Di na humelela diphasikela da Jese, i ku wule a telako ku ta fumela otshe matiko; se ona matiko ma na veka kwakwe txithembo txa ona.”

¹³Txizimu txa txithembo txi na mi tate ngu litsako lotshe ni kudikha amu ka likholo lanu, kasiku ngu mtamo wa Moya wo Sawuleka txithembo txanu txi tala txi thekelela.

¹⁴I di ani, vanathu, na themba ti to na nanu mi tate ngu wunene, ni ti to mi na ni wuzivi wotshe, awu mi dinganako kulayana ngu wona.

¹⁵Hambi keto, ni tsani msana ni txi mi bhalela, kasi ku mi alakanyisa timwani timhaka, ngu mtamo wa kateko yi ni nga ningwa ngu Txizimu,

¹⁶yo ni maha txithumi txa Jesu Kristu hagari ka vamatiko, ani ni nga sawulwa ni txi mahwa mthumeli wa Evhangeli ya Txizimu, kasiku vamatiko ve va i di mningelo wa kutsakisa Txizimu, na wu di basisilwe ngu Moya wo Sawuleka.

¹⁷Ti di ngeto, ni ni fanelo ya ku ti dhumisa ngu Jesu Kristu ka mthumo wa Txizimu.

¹⁸Nguko nga ni si tsani kuwomba txilo, hahanze ka tile Kristu a nga ti maha ngu ngani, ti to tisa vamatiko kuengisani, ngu mapswi ni mithumo,

¹⁹ngu mtamo wa sikombiso ni sidiwukiso, ni mtamo wa Moya. Ngu toneto, ni txhumayete Evhangeli ya Kristu ka otshe madhawa, kukhukhela Jerusalema kala kuya hoka Iliriya;

²⁰I ti kunavela kwangu ka hombe kutxhumayela Evhangeli amu ditina da Kristu di sinziko kuziwa, kasiku ni si thuki ni aka txitimwi ka makhato awa ma nga vekwa ngu mmwani.

²¹Ni maha tiya, madingano ni ti ti nga bhalwa taku: “Ava va sinziko kubikelwa mahungu akwe, va na wona; Ni vava va sinziko kuengisa, va na engisisa.”

²² Ngu mhaka ya toneto, ni thindekile sikhati so tala ku mi endela.

²³Kambe konkuwa, kha ni nga ngadi ni mthumo ka matiko awa; se akuwa i ku malembe o tala ni txi navela ku mi endela,

²⁴ni nata kwanu, ngako ni txi ya Espanya; na themba ti to nata mi wona, akuwa ni nota pinda ngu konaho kwanu. Nganu mi no ni heleketa konkheyo, ngako se ni di londote ka kudotho litsako la ku mi wona.

²⁵ Konkuwa se ni ya Jerusalema, kuya thumela vasawuleki.

²⁶Nguko va Makedhoniya ni va Akaya va randile kumaha msengo wa kuya vhuna vasawuleki va Jerusalema, va ku wusiwanani.

²⁷ Va mahile ngu kuranda, ina, aniko i ti ku va tshungula, nguko vamatiko, ngako va di vhunwi ngu vona moyani, ni vona va fanete ku va tshungula ngu tithomba tawe ta ha mafuni.

²⁸Ngako ni di hetile tiya, na se ni di ningete ngu mlayo manzani kwawe msengo wuwa, ni na pinda ngu kwanu, ni txi ya Espanya.

²⁹Kambe na tiziva tito, ni txi ta kheyo kwanu, ni nata ni di ni makatekwa otshe a Kristu.

³⁰Se na mi kombela, vanathu, ngu Mkoma wathu Jesu Kristu, ni lirando la Moya, ti to mi lwa kumweko ni nani ngu mikombelo yi mi yi yisako ka Txizimu, mi txi kombelela ani,

³¹kasiku ni huluka manzani ka Vajudha va va si kholwiko, ni ti to txivhuno txiya ni txi yisako Jerusalema txi amukelwa ngu kutsaka ngu vasawuleki va Txizimu.

³²Se ngako Txizimu txi txi ti lava, ni nata humula ni di kumweko ni nanu.

³³Txizimu txa kudikha txi nave ni nanu motshe. Amen!