Read chopi Varoma 16 Bible Online

Varoma 16 - chopi bible

Varoma 16

¹Na mi bikela Febhe, ndiyathu, mame wu a thumelako dibanza da Kenkreya;

²mi mu amukela ngu ditina da Mkoma, nga ti ti fanelako vasawuleki, mi m'vhuna ka sotshe si a no si lava kwanu, nguko nene a vhuni va votala, hambi ani a ni vhuni.

³ Ni dinguleleni Priskila ni Akila, sithumi kulothi ngu ka Kristu Jesu;

⁴ava va nga ti ha phangoni ka kufa ngu kulava kuponisa wutomi wangu; hi nga ani nokha ni va bongako, aniko ni mabanza otshe a vamatiko.

⁵Dingulani ni dibanza diya di sengeletanako nyumbani kwakwe. Dingulani txirandwa txangu Epenetusi, awu i ku m'hando wo khata ka Kristu ditikoni ka Asiya.

⁶Dingulani Mariya, awu a nga thuma ngutu hagari kwanu.

⁷Dingulani Andronikusi ni Juniyasi, maxaka angu ni sibotxhwa kulothu, vapostoli va kuhumelela, va nga ni thangela ngu likholo ngu ka Kristu.

⁸Dingulani Ampliyatusi, txirandwa txangu ngu ka Mkoma.

⁹Dingulani Urbhanu, txithumi kulothu ngu ka Kristu, ni Estaku, txirandwa txangu.

¹⁰Dingulani Apelesi, wa kuthembeka ngu ka Kristu. Dingulani va nyumba ya ka Aristobulusi.

¹¹Dingulani Herodhiyoni, dixaka dangu. Dingulani va nyumba ya ka Narkisusi ngu ka Mkoma.

¹²Dingulani Trifena ni Trifosa, vavasikati va va thumelako ditinani ka Mkoma. Dingulani Persidha wu a randekako, awu nene a nga thuma ngutu ditinani ka Mkoma.

¹³ Dingulani Rufo, mkristu wo zivaneka ngutu ka Mkoma, mi txi dingula ni mame wakwe, awu i ku mame wangu nani.

¹⁴Dingulani Asigkritoni, ni Flegoni, ni Herme, ni Patrobasi, ni Herma ni vanathu va va ku navo.

¹⁵Dingulani Filologusi ni Juliya, Nerewusi ni ndiyakwe, ni Olimpiya ni votshe vasawuleki va ku navo.

¹⁶Losanani ngu kupswopswana ko sawuleka. Dingulani otshe mabanza a Kristu.

¹⁷Se na mi kombela ti to mi ti wonela ka va va wusako kuhambana, ni sikhuvekiso, ve tsulupeta gondo yi mi nga gondiswa yona; mi nga pataneni navo.

¹⁸Nguko ava vo ngeto kha va thumeli Mkoma wathu Jesu Kristu, kambe va thumela masusu awe dwe; va hambukisa timbilu ta va vo divala ngu mapswi o tshamba ni kukanganyisa.

¹⁹Kuengisa kwanu ka ziwa ngu votshe vathu, se ani na tsaka ngu nganu. Aniko ni randa ku mi va mi di vo txhariha ka ti i ku ta tinene, mi si txhariheli kumaha to biha.

²⁰Txizimu txa kudikha txi na kuluvete kuganyatela Sathani hahatshi ka mikondo yanu. Makatekwa a Mkoma wathu Jesu Kristu ma nave ni nanu.

²¹ Wa mi dingula Timoti, txithumi kulothu, ni Likiyusi ni Jasoni ni Sosipateri, maxaka angu.

²²Ani Tertiyusi, mubhali wa dipapilo diya, na mi dingula ngu ka Mkoma.

²³Wa mi dingula Gayusi, awu a nga ni amukela kumweko ni dotshe dibanza. Wa mi dingula Erastusi, mñoli wa male ya didhoropa diya, ni mwanathu Kwartu.

²⁴ [Makatekwa a Mkoma wathu Jesu Kristu ma nave ni nanu motshe. Amen!]

²⁵Ka wule a ku ni mtamo wa ku mi tsanisa ka Evhangeli yangu, madingano ni kutxhumayela ka Jesu Kristu ni kuwonekeliswa ka msisalo wu wu nga ti tumbetilwe kukhukhela ka mbimo ya kale ni kale,

²⁶aniko se wu nga sala kuwonekeliswa ngu Mibhalo ya Vaprofeti, nga tiya mlayo wa Txizimu txo mbi na magwito, wu nga lavisa tona, mlayo wu wu nga rurutelwa ka yotshe mifumo, kasiku yona yi txi londetela kukholwa.

²⁷Ka Txizimu i ku txona txokha txo txhariha, ku na mahwe sidhumiso ngu Jesu Kristu, ngu malembe ni malembe. Amen!