Read chopi Varoma 2 Bible Online

Varoma 2 - chopi bible

Varoma 2

¹ Ngu toneto, awe, hambi u di mani ni mani u lamulako vamwani, khu nga ni divalelo, ngako u txi lamula vamwani, wo ti abanisa upune, nguko na nawe wa ti maha tona ti u lamulako ngu tona vamwani.

²Nguko ha tiziva ti to Txizimu txi lamula ngu nzila ya ditshuri ava va mahako toneto.

³Se awe m'thu, u lamulako va va mahako to nga toneto, kuve wa ti maha nawe, ina u alakanya ti to u na huluka kulamulwani ka Txizimu kani?

⁴Mwendo wo kanyisa kutala ka wunene wa Txizimu, ni kutimisela ka txona, ni kuhonisela ka txona; khu ti zivi ti to wunene wuwa wa Txizimu wu ku ndindela kuya kuhundulukani kani?

⁵Kambe ngu kubanga ka mbilu yako, ayi yi si laviko kuhunduluka, wa ti sengeletela txiviti txi u nota txi mana ka ditshiku da txiviti, ahawa ku nota humelela kulamula ku ko lulama ka Txizimu;

⁶ txona Txizimu txi txi nota tshumetela mmwani ni mmwani, madingano ni mithumo yakwe.

⁷Txi na ninga wutomi wo mbi na magwito, ava vo simama kumaha ta tinene, ngu kulava wudhumo ni lisima ni wutomi wo mbi guma, ngu kutimisela ka mithumo yo tshura;

⁸kambe ava va kanetako, ava va lambako ditshuri, ve londetela wusoholoki, va na welwa ngu phango ni txiviti.

⁹Dikhombo ni kuxaniseka si na va txitimwi ka m'thu wuhi ni wuhi a mahako to biha; ka Mujudha kukhata ni ka Mugriki nene.

¹⁰Kambe wudhumo ni txithavo ni kudikha si na va txitimwi ka wuhi ni wuhi a mahako wunene, ka Mujudha kukhata ni ka Mugriki nene;

¹¹nguko Txizimu kha txi yi ngu khohe ya m'thu.

¹²Votshe va va nga onha va si nga ni mlayo, va na lova va si nga ni mlayo; kambe ava va nga onha na va txi wu ziva mlayo, va na lamulwa ngu mlayo.

¹³Nguko hi nga vale va engisako mlayo va wombwako ti to va lulamile masoni ka Txizimu; aniko va balwa ti to va lulamile, vale va mahako ti wu rumako wona mlayo.

¹⁴Ngako vamatiko va va ku si nga ni mlayo, va txi londetela ngu mahanyelo awe ati ti kombelwako ngu mlayo, vona ngu wutumbu ngu vona i ku mlayo wa kona, hambiko va ku si nga ni mlayo.

¹⁵Va kombisa ti to mthumo wu wu lawako ngu mlayo wu bhatwe timbiluni kwawe; livhalo lawe ngu yona fakazi yawe; ni mapimo awe ma va kawuka mwendo ku va emela.

¹⁶Ngu tona tiya ti nota humelela ngu ditshiku diya Txizimu txi nota lamula, ngu Jesu Kristu, sikungo sa vathu nga kuwomba ka Evhangeli yi ni yi txhumayelako.

¹⁷Kambe, ngako awe u dhanwako ku u Mujudha, awe u thembako mlayo, u txi ti kulisa ngu Txizimu,

¹⁸awe u zivako kuranda ka txona, u zivako kuwona ti i ku ta lisima ngu ku u nga gondiswa ngu mlayo,

¹⁹awe u pimisako ti to u mñoli wa lisole ka mabhofu, u liwoningo la vale va ku txidemani,

²⁰u mlayi wa va va si ziviko, m'gondisi wa vanana, ngako u ku ni txiemo txa kukomba wuzivi ni ditshuri amu ka mlayo;

²¹awe u gondisako vamwani, se khu ti gondisi upune kani? Awe u txhumayelako ti to ku nga thuke ku txi piwa, na kasi wa pa!

²²Awe u ku khawe ku nga thuke ku txi mahwa wugelegele, kasi awe wa geleza! Awe wa nyenya kukhozela sithombe, kasi awe wa handa mathepeleni ka sona!

²³Awe u ti dhumisako ngu mlayo, kasi wa wisa tingana Txizimu ngu kundaka mlayo.

²⁴Ngu konaho, ti bhatwe ti to “Ditina da Txizimu da ruketelwa hagari ka vamatiko ngu mhaka yanu.”

²⁵Kha ditshuri, wukwera wa vhuna, ngako u txi veketa mlayo, kambe ngako u di mndaki wa mlayo, wukwera wako wu na va wu di phindukile wu maha wukhutu.

²⁶Aniko, ngako makhutu ma txi veketa mlayo, ina wukhutu wawe kha wu wonwi nga wukwera kani?

²⁷Se awu i ku dikhutu ngu didhawa da mmidi, ngako a txi veketa mlayo, a na ku abanisa awe u ndakako mlayo, hambi u di ni ti ti nga bhalwa, hambi wukwera.

²⁸M'judha wa ditshuri hi nga wule wa kutikomba hahanze dwe, ni wona wukwera wa ditshuri hi nga wule wu wonekako hahanze ha nyamani dwe;

²⁹aniko Mujudha ngu wu i ku toneto ni mbiluni, ni wukwera wa ditshuri ngu wa mbilu, awu wu mahwako moyani, i si nga ngu mibhalo; se kudhumiswa kwakwe kha ku humi ka vathu, aniko kuhuma ngu ka Txizimu.