Read chopi Varoma 3 Bible Online

Varoma 3 - chopi bible

Varoma 3

¹Ti di mahile eto, atxi Mujudha a palako ngu txona vamwani ngu txihi kani?

²Kasi wukwera wu vhuna txani? Wa vhuna ngutu ngu otshe madhawa. Mhaka yo khata ngu kuwa sithembiso sa Txizimu si nga vekwa manzani kwawe.

³Se hi na khathu txani, ngako vamwani kwawe va sa thembeka kani? Ina kuthembeka ka Txizimu ku nga fuviswa ngu ku ambi thembeka kwawe kani?

⁴ Lambi! Txizimu txi fanete kumaneka i di txa ditshuri, hambi votshe vathu ve maneka i di va makuhu, nga hawa ku nga bhalwa, va txi kha vona: “U fanete kuziwa ti to u lulamile ka mapswi ako, ni kumaneka u si nga ni mnandu, mbimo yi u no yiswa kulamulwani.”

⁵Kambe ngako kugombonyeka kwathu ku txi komba kululama ka Txizimu, hi na txani kani? Ina hi nga khathu Txizimu txi bihile, ngako txi txi hi tsayisa ngu kuhenya kani? Ni womba tiya ngu wombelo ya vathu.

⁶Txima hi nga tona! Nguko, ngako i di toneto, Txizimu txi ndi na lamulisa kutxani ditiko kani?

⁷Se ngako ditshuri da Txizimu di txi pfaliswa ngu makuhu angu, se ni ngadi ni txi lamulelwa txani nga muonhi kani?

⁸Se ngu kutxani hi si mahi to biha kasiku ti txi humelela totshura, nga tiya vamwani va hi lumbetako va txi kha vona ngathu hi ti wombako kani? Kambe evo vo ngeto, kuabaniswa kwawe ka va fanela.

⁹Se hi na txani kani? Ina athu Vajudha hi ngadi ni to pala vamwani kani? Lambi, ni kudotho! Nguko hi kombisile ngu kale ti to hambi i di Vajudha, hambi i di Vagriki, va hahatshi ka txionho;

¹⁰ nga ti ku nga bhalwa, va txi kha vona: “Kha ku nga ni wo lulama, hambi ni wammweyo.

¹¹Kha ku nga ni wu a ku ni mapimo, kha ku nga ni wu a lavako Txizimu.

¹²Votshe va hambukile, votshe va mahile manyala; kha ku nga ni wu a mahako to lulama, hambi ni wammweyo!

¹³ Mikolo yawe mathowo awa ma nga asama, tidimi tawe ti tolovete kukanganyisa, mkanani kwawe ku tate ngu wuxungu wa minyoka,

¹⁴ sisofu sawe sitate ngu kuruketela ni kubava.

¹⁵Minenge yawe yi ni livilo kuyela kuya theketa mnoha;

¹⁶kulova ni makhombo si tinzilani kwawe.

¹⁷Nzila ya kudikha kha va yi zivi.

¹⁸Kha ku nga ni kuthava Txizimu masoni kwawe!”

¹⁹Kambe ha tiziva ti to totshe ti ti wombwako ngu mlayo ti wombwa ka va va ku hahatshi ka mlayo, kasiku sotshe sisofu si tsiwa, votshe vathu ve manwa na va di ni mnandu masoni ka Txizimu.

²⁰ Ngu koneho kha ku nga ni wammweyo a no manwa a di lulamile masoni ka txona ngu mithumo ya mlayo, nguko mlayo wu ninga kuziva txionho dwe.

²¹Konkuwa ku wonekisilwe kululama ka Txizimu, i si nga ka mtamo wa Mlayo, akuwa ku fakazelwako ngu wona Mlayo ni Vaprofeti:

²²Ti to kululama ka Txizimu ku ka vale va kholwako ka Jesu Kristu. Txizimu txi maha toneto ka vale va kholwako, nguko kha ku nga ho kuhambana hagari ka vathu.

²³Votshe va onhile, va tsivetwe kasiku va si woni kuphatima ka Txizimu.

²⁴Na va si nga ni fanelo, va ningwa kululama ngu mtamo wa kateko ya txona Txizimu txi nga va tirula ngu Kristu Jesu;

²⁵awu txona txi nga m'sikela ti to a na va i di mhamba ya kudihela sionho ngu mnoha wakwe, ka wule a kholwako kwakwe; Txizimu txi mahile tiya kasiku kombisa kululama ka txona ngu kuva txi di divalete sionho si si nga mahwa kale,

²⁶txi mana kukombisa wunene wa txona ka mbimo ya konkuwa; kasiku txi va Txizimu txi txi nga lulama ni kuninga wululami ka wu a kholwako ka Jesu.

²⁷Se ku ti dhumisa kwathu ku ka tihi kani? Kufuvisilwe! Ngu mlayo muni kani? Ngu mlayo wa mithumo kani? Ahim-him. Kambe kufuvisilwe ngu mlayo wa kukholwa.

²⁸Ngu toneto, hi pimisa ti to m'thu a mahwa mlulami ngu likholo, i si nga ngu mithumo ya mlayo.

²⁹Ina Txizimu nja Vajudha vokha kani? Hi nga txa vamatiko ni vona kani? Im, njawe ni vona vamatiko;

³⁰Nguko Txizimu njimwetxo dwe, atxiya txi no ninga wululami ava i ku va wukwera ngu mhaka ya kukholwa, ni va i ku makhutu na va txi kholwa ni vona.

³¹Se ina ho fuvisa mlayo ngu mhaka ya kukholwa kani? Lambi! Aniko ho tsanisa mlayo.