Read chopi Varoma 6 Bible Online

Varoma 6 - chopi bible

Varoma 6

¹Hi na txani koko kani? Hi na simama hi zumba txionhoni, kasi kateko yi anda kani?

²Lambi! Akuwa athu hi nga fa ngu didhawa da txionho, se hi nga hanyela txani kambe txionhoni kani?

³Ina ma ti timelela ti to athu hotshethu hi nga bhabhatiswa ngu ka Jesu Kristu, hi bhabhatisetwe kufani kwakwe kani?

⁴ Ngu toneto, ngu kubhabhatiswa hi keletwe kumweko nayo kufani, kasiku, kota nga ti Kristu a nga wuka ka vakufa ngu mtamo wa wudhumo wa Tate, nanathu hi fanela kuhanya wutomi wa wuphya.

⁵Nguko, ngako hi nga tshanganiswa kumweko nayo ngu lifo la kufana ni lakwe, ngu toneto hi na fananiswa nayo kambe ngu kuwuka ka vakufa ko fana ni kwakwe.

⁶Hotshethu ha tiziva ti to m'thu wathu wa kale a bethetwe ha txihambanoni kumweko ni Kristu, kufela ku mmidi wa txionho wu hasulwa, hi si swi kambe hi di tikhumbi ta txionho.

⁷Kha ditshuri, awule a nga fa a thukunyutwe ka txionho.

⁸Ngako hi txi fa kumweko ni Kristu, ha tiziva ti to hi na hanya kumweko nayo.

⁹Nguko ha tiziva ti to akuwa Kristu a nga wuka ka vafi, kha na mbiswa a txi fa kambe.

¹⁰Lifo kha li na mbiswa li maha txilo kwakwe. Nguko, ngu didhawa da kufa kwakwe ngu mhaka ya txionho, ene a fite kumweko basi; kasi ngu didhawa da kuhanya kwakwe, a hanyela Txizimu.

¹¹Ngu toneto, na nanu ti maheni vakufa ka txionho, kufela ku mi txi hanyela Txizimu ngu Kristu Jesu.

¹²Se konkuwa txionho txi nga thuke txi fuma mmidi wanu, awu wu fako, ngu kutumeletela minavelo ya wona yo biha;

¹³mi nga ningeleni sihango sanu kuonhani, si maha matxhari a ku ambi lulama, aniko ti ningeleni ka Txizimu, nga va va nga huma kufani, ve hanya, mi teka sihango sanu si maha matxhari a kululama, a kuthumela Txizimu.

¹⁴Se txionho kha txi na mbi va ni mtamo txitimwi kwanu, nguko anu kha mi nga hahatshi ka mlayo, aniko mi hahatshi ka kateko.

¹⁵Hi na txani kani? Ina hi na onha, akuwa hi ku si nga hahatshi ka mlayo, kambe hi ku hahatshi ka kateko kani?

¹⁶Ina kha mi tizivi ti to ngako mi txi ti maha tikhumbi ta wokari kasi ku mu engisa, mi tikhumbi ta ene wu mi mu engisako, mwendo tikhumbi ta txionho txi txi yisako kufani, mwendo tikhumbi ta kuengisa kuwa ku yisako kululamani kani?

¹⁷Txi na bongwe Txizimu, nguko hambiko mi nga ti tikhumbi ta txionho, kambe mi sikotile kutiningetela ngu yotshe mbilu yanu ka gondo yiya mi nga wuletwa ka yona.

¹⁸Se mi di thukunyutwe ka txionho mi ti mahile tikhumbi ta kululama.

¹⁹Ni womba ngu mawombawombelo a vathu ngu mhaka ya dikhodho da wuthu wanu. Ngako mi nga ningela sihango sanu si thumela wubihi ni kuonha, asi si hambanako ni kuranda ka Txizimu, se konkuwa ningelani sihango sanu si thumela kululama akuwa ku yisako kubasiswani.

²⁰Nguko txikhati txi mi nga ti tikhumbi ta txionho, mi ti txhatxhekile ka didhawa da kululama.

²¹Nji txani mi nga wuyelwa ngu txona ka sile konkuwa si mi thelako tingana kani? Nguko magwito a sona ngu lifo.

²²Akuwa mi nga thuswa ka txionho mi maha tikhumbi ta Txizimu, mi bhindute mihando yi yi yisako kubasiswani, akuwa ku hokisako ka wutomi wo mbi guma.

²³Nguko txhatxhazelo ya txionho ngu kufa. Kambe txiningo txa Txizimu ngu wutomi wo mbi na magwito, ngu ka Kristu Jesu Mkoma Wathu.