Read chopi Varoma 7 Bible Online

Varoma 7 - chopi bible

Varoma 7

¹Kha mi tizivi kani, vanathu ni womba-womba ni va va zivako mlayo ti to mlayo wu fuma m'thu ka yotshe mbimo yi a ku ngadi a txi hanya kani?

²Nga toneto, wamsikati wu a nga tekwa, a sungilwe ngu mlayo ka mwamna wakwe, ngako ene a di ngadi a txi hanya; kambe ngako mwamna wakwe a di fite, a thusilwe ka mlayo wa mwamna.

³Ngako a txi tekana ni mmwani wamwamna, na mwamna wakwe a di ngadi a txi hanya, a na dhanwa ku digelegele; kambe ngako mwamna wakwe a txi fa, a thusilwe mlayoni; se kha na mbi dhanwa ku digelegele, ngako a txi tekana ni mmwani wamwamna.

⁴Ngu nzila yo nga toneto, nanu vanathu, mi fite mlayoni ngu didhawa da mmidi wa Kristu, ti to mi lumba mmwani, i ku wu a nga wuka ka vakufa, kasi ku hi txi humisa mihando yi yi tsakisako Txizimu.

⁵Nguko, mbimo yi hi nga ti ti hanya ngu txithu, kunavela ka txionho aku ku nga ti mana mtamo ngu mhaka ya mlayo, ku ti thuma sihangoni kwathu kufela ku hi humisa mihando ya lifo.

⁶Kambe konkuwa hi txhatxhilwe ka mlayo, hi maneka hi di fite ngu didhawa da ti hi nga ti sungilwe ngu tona; hi na thumela Txizimu ngu wuphya wa moya, i si nga ngu mlayo wa kubhalwa wu wu nga txhipa.

⁷Hi na txani kani? Ina mlayo njionho kani? Lambi! Kambe idiku ku ti si nga ni mlayo, nga ni sa txi ziva txionho. Nguko ani nga ni sa ziva ti to kuho kunavela, idiku mlayo wu ti sa womba tito: “U nga navele to biha.”

⁸Kambe txionho txi mani nzila ya kuningwa ngu Mlayo, txi wusa mndani kwangu tixaka totshe ta kunavela; nguko hahanze ka mlayo, kuonha kufite.

⁹Ni hanyile kale na ku si nga ni mlayo; kambe, ngako wu di bwakile mlayo, txionho txi to wuka;

¹⁰se ani nifa: Ku txi maneka ti to mthetho wu wu nga vekelwa kuhanyisa, wu ni vangete kufa.

¹¹ Nguko txionho, txi di mani nzila ngu mhaka ya mlayo, txi to ni kanganyisa, txi ni daya.

¹²I di mlayo wu sawulekile, ni mthetho ni wona wu sawulekile, wu lulamile, kambe mbunene.

¹³Se, atxi i ku txa txinene, ina txa sikota ku ni vangela lifo kani? Lambi! Txionho ngu txona txi nga ni vangela kufa: Ngu kutiwonekisa nga txilo txa txinene, txi ni date kasiku txi ti kombisa ku njionho, na txi txi ti humelelisa ngu wotshe mtamo wa txona ngu mhaka ya mthetho.

¹⁴Nguko ha tiziva ti to mlayo mbwa Moya; kambe ani ngu mtumbuluko wangu ni m'thu wo xuleka, ni xavisilwe ni mahwa khumbi ya txionho.

¹⁵ Nguko ati ni ti mahako kha ni tizivi; nguko kha ni mahi ti ni ti dhundako, aniko ni maha ti ni ti nyenyako.

¹⁶Se ngako ni txi maha ti ni si ti dhundiko, na tumela ti to mlayo mbunene.

¹⁷Se hi nga ngadi ani ni mahako txilo, aniko njionho txi txi nga aka mndani kwangu.

¹⁸Nguko na tiziva ti to ati i ku tinene kha ta aka kwangu, ni womba mmidini kwangu; nguko kulava kumaha ta tinene ni nako, aniko mtamo wa ku ti maha kha ni nga nawo.

¹⁹Nguko ta tinene ti ni ti dhundako kha ni ti mahi, aniko ni maha to biha ti ni si ti dhundiko.

²⁰Se ngako ni txi maha to biha ti ni si ti dhundiko, hi nga ngadi ani ni ti mahako, aniko njionho txi txi nga aka mndani kwangu.

²¹Ngu konaho ni manako mlayo wuwa, tito: Mbimo yi ni lavako kumaha ta tinene, wubihi wa humelela.

²²Nguko ni tsakela mlayo wa Txizimu ani ngu wutumbu wangu;

²³kambe amu ka sihango sangu ni mana wumwani mlayo awu wu lwako ni Mlayo wu wu tsimbitisako mialakanyo yangu, wona wu ni ndindela wukhumbini ka txionho txi txi ku ka sihango sangu.

²⁴Dikhombo dangu! I mani a no ni thusa ka mmidi wuwa wa lifo kani?

²⁵Txi na dhumiswe Txizimu, ngu Mkoma wathu Jesu Kristu! Ngu konaho ni khumbi ya mlayo wa Txizimu ngu mbilu, aniko ngu wuthu, ni khumbi ya mlayo wa txionho.