Read chopi 1 Vakorinto 10 Bible Online

1 Vakorinto 10 - chopi bible

1 Vakorinto 10

¹Vanathu, kha ni ti lavi ku mi sisela ati ta ku votshe vatate vathu va ve hahatshi ka direfu ni ti ta ku votshe va tshawunyetile linene.

²Votshe va bhabhatisilwe ngu ka Mosi, amu ka direfu ni mu ka linene.

³Votshe va dyite sakudya simweso sa moya,

⁴kambe votshe va sete sakusela simweso sa moya; kunene votshe va ti ti sela ka dirigwi da moya, adi di nga ti va londetela. Dirigwi diya i ti Kristu.

⁵Hambi keto, vavangi va kona kha va tsakisa Txizimu, se ngu kota yeto va lovisilwe txiwulani.

⁶Totshe timhaka tiya njikombiso kwathu, kasiku hi si naveli simaha so biha, nga ti ni vona va nga navela.

⁷Mi nga ti maheni vakhozeli va sizimu sa walo, kufana ni vamwani kwawe, nga tiya ti nga bhalwa va txi kha vona: “Vathu va khalahatshile, ve dya, ve sela, ve khukha ve sinya.”

⁸Hi nga ti ningeleni ka mithumo ya wugelezi, nga ti vamwani ka vona va nga ti maha, se ve wa ngu ditshiku dimwedo 23.000.

⁹Hi nga dukeni Mkoma, nga vamwani va nga mu duka, se ngu toneto ve fa ngu kulumetelwa ngu minyoka.

¹⁰Mi nga ngungurukeleni, nga ti vamwani kwawe va nga ngunguruka, se ve loviswa ngu mlovisi.

¹¹Ngu toneto, sotshe simaha siya si va humelete kasi kumaha txikombiso kwathu, kambe si bhatwe kasi ku hi laya athu hi nga hoka magwito ka timbimo.

¹²Ina, ngu toneto, awule a pimisako ti to a emekile, a na ti wonele kasiku asi wi.

¹³Kha mi nzi kuhumelelwa ngu txiduko txa kuhambana ni siduko sa vamwani vathu. Txizimu txi thembekile, kha txi na kutumela ti to mi txi dukwa ngu si si ku txitimwi ka mtamo wanu. Aniko, ngako txiduko txi txi mi tela, a na mi ninga nzila ya kupona ka txona, ni mtamo wa ku txi rwala.

¹⁴Ngu toneto, vo randeka ngutu, thavani kukhozela sizimu sa walo.

¹⁵Ni womba-womba ni nanu kota nga ti mi ku vathu va mapimo. Ti pimiseni mipune ati ni mi gelako.

¹⁶ Digombe da kukatekiswa, adi hi di katekisako, ina hi nga ku ti tshanganisa ni mnoha wa Kristu, kani? Ni dona dipawu di hi bhandako, hi nga kona kutshangana ni mmidi wa Kristu, kani?

¹⁷Se ngako dipawu i ku dimwedo, hotshethu, hambiko hi ku vangi, hi wumba mmidi wumwewo, nguko hotshe hi abana dona dipawu dile da dimwedo.

¹⁸Hi ngani alakanya va ka Israyeli. Ava va dyako timhamba, ina kha va mani txyavelo txa txiluvelo, kani?

¹⁹Ni na womba txani kwanu, kani? Ni na womba ti to nyama ya timhamba ta sizimu sa walo njimaha, kani? Lambi! Aniko, ani ni mi gela ti to timhamba ti ti mahwako ngu vamatiko, va ti mahela madhimoni, kha va ti maheli Txizimu.

²⁰Se ani kha ni ti lavi ti to mi txi sengela ni madhimoni.

²¹Kha mi na kusikota kusela digombe da Mkoma kumweko ni digombe da madhimoni. Kha mi na kusikota kukhalahatsha mi dyela ha mezani ka Mkoma ni ha mezani ka madhimoni.

²²Hi lava kuhenyisa Mkoma, kani? Ina hi ni mtamo kupala ene, kani?

²³ “Totshe ta tumeleleka,” aniko hi nga totshe ti vhunako. “Totshe ta tumeleleka,” aniko hi nga totshe ti akako.

²⁴M'thu a nga lave asi si vhunako ene, a na lave asi si vhunako vamwani.

²⁵Dyanani sotshe si va xavisako bhazara, mi si wotisi txilo ngu mhaka ya livhalo.

²⁶ Mafu nga Mkoma ni sotshe si si ku txitimwi ka ona.

²⁷Ngako mi txi dhanwa ngu mmweyo wo va i si nga dikholwa, na mi txi ti lava kutsula, dyanani sotshe si va mi phamelako; mi si wotisi txilo ngu mhaka ya livhalo.

²⁸Kambe ngako wokari a txi mi gela ku khene: Asiya i mhamba ya sizimu sa walo, konaho mi nga dyeni ngu mhaka ya eneyo, a nga mi tsunzukisa ni ngu mhaka ya livhalo.

²⁹Se, ni txi womba ngu “livhalo,” ni womba ngu la vamwani, kha ni wombi ngu lanu. Se, i nga va mhaka muni kukhululeka kwangu ku txi lamulwa ngu livhalo la mmwani, kani?

³⁰Ngako ni txi dya sakudya, ni txi bonga ka Txizimu, se ni solelwa txani ngu sakudya si ni nga si bongela kani?

³¹Ngu toneto, mwendo ma dya, mwendo ma sela, mwendo mi thuma tihi ni tihi, ti maheni ngu moya wa kudhumisa Txizimu.

³²Mi nga maheni txionho txo humba Vajudha, mwendo Vagriki, mwendo va Dibanza da Txizimu.

³³Gondani ngu ngani, ni zamako kutsakisa votshe ka sotshe, na i si nga to lava ku ti vhuna ani nipune, aniko ngu kulava kuvhuna vavangi, kasi kuve mana kuhanyiswa.