Read chopi 1 Vakorinto 12 Bible Online

1 Vakorinto 12 - chopi bible

1 Vakorinto 12

¹Ka mhaka ya sihiwa sa Moya, vanathu, kha ni ti lavi ku mi sisela.

²Ma tiziva tito, mbimo yi mi nga ti vamatiko, mi ti tumela kundindwa mi yiswa ka sizimu sa walo sa siduma.

³Ngu toneto, na mi zivisa ku khani: A walo wu a wombawombako ngu kutulelwa ngu Moya wa Txizimu, a sikotako kuwomba ti to “Jesu nja walo”; kambe awalo wu a sikotako kuwomba ti to “Jesu Mkoma,” na i si nga wu a nga tulelwa ngu wona Moya wo Sawuleka.

⁴ Kuho kuhambana ka sihiwa, aniko Moya wona mbumwewo;

⁵kuho kuhambana ka mithumo, aniko Mkoma i mmweyo;

⁶kuho kambe kuhambana ka mathumelo, aniko i Txizimu tximwetxo txi kuho, atxi txi thumako totshe ka votshe.

⁷Kambe mmwani ni mmwani a ningwa sihiwa sa kuwonekisa Moya, kasiku e vhuna votshe.

⁸Mmwani a ningwa kuwombawomba mapswi a wutxhari ngu wona Moya, mmwani a ningwa kuwomba dipswi da wuzivi madingano ni wona Moya wu wawumwewo;

⁹mmwani a ningwa kukholwa ngu Moya wu wawumwewo; mmwani wa ningwa ngu wona Moya wu wawumwewo txihiwa txa kuhanyisa valwali;

¹⁰mmwani a ningwa mtamo wa kumaha sidiwukiso; mmwani a ningwa kutxhumayela dipswi; mmwani a ningwa kuwona kuhambana ka mimoya; mmwani a ningwa kuwombawomba tidimi; mmwani nene a ningwa txihiwa txa ku ti txhamusela.

¹¹Aniko totsheto ngu wona Moya wu wawumwewo dwe wu ti thumako, wu txi phakela ngu mmweyo ni mmweyo sihiwa sa wona, kota nga ti wu ti lavisako tona.

¹² Ngu toneto, kufana ni mmidi i ku wumwewo, kambe wu ku ni sihango sasingi, asi, hambiko i ku sasingi, si mahako mmidi wawumwewo, ngu toneto nene Kristu.

¹³Kha ditshuri, hotshethu, mwendo hi Vajudha mwendo hi Vagriki, mwendo hi tikhumbi mwendo hi vathuseki, ngu kubhabhatiswa ka Moya wawumwewo, hi mahile mmidi wumwewo. Hotshethu hi setilwe Moya wumwewo.

¹⁴Mmidi kha wu nga ni txihango tximwetxo dwe, aniko wu ni sihango so tala.

¹⁵Hambi idiku mkondo wo womba wu txi kha wona: “Akuwa ni si nga dianza, kha ni lumbi mmidi,” nga ti si koteki kuva i si nga txihango txa wona mmidi.

¹⁶Nzeve ni yona, hambi idiku yo womba, yi txi kha yona: “Ani, akuwa ni si nga diso, kha ni nga txihango txa mmidi,” nga ti si koteki kuva i si nga txihango txa wona mmidi.

¹⁷Idiku mmidi wotshe wo va i di diso dwe, hi ndi na engisisa kutxani, kani? Idiku wotshe mmidi wo va i di nzeve dwe, kupfa ka thonvu ku ndi nava ku di hayi kani?

¹⁸Aniko, ati i ku tona, Txizimu txi vekile sihango ha mmidi, tximwani ni tximwani kota nga tiya txi nga ti randisa tona.

¹⁹Idiku sotshe sihango so va i di txihango tximwetxo, mmidi wona wu ndi nava wu di hayi kani?

²⁰Ati i ku tona, sihango nza singi, kambe mmidi mbumwewo.

²¹Diso kha di na kusikota kugela dianza di txi kha dona: “Awe kha ni ku lavi.” Hambi msungo kha wu na kusikota kugela mikondo, wu txi kha wona: “Anu kha ni mi lavi.”

²²Lambi! Kambe sihango sa mmidi, asi si wonekisako ku nga kha sa tsana kupinda simwani, eso ngu sona si lavekako.

²³Ani sile si wonekako nga kha si faneli kuxoniphwa, ngu sona hi si fenengetako ngu txithavo kupinda simwani; ani sihango sathu sa kusoleka, ngu sona hi si xoniphako kupinda simwani;

²⁴kasi sihango sathu si i ku sa kutshura kha si lavi txilo. Aniko Txizimu txi vangile mmidi, txi txi ninga kuxonipheka ka hombe ngutu ka txihango txi i ku txa kusoleka,

²⁵kasiku ku si vi ni mibango ha mmidi, ni sihango si ziva kuxayisana.

²⁶Ngako txihango txokari txi txi xaniseka, simwani sa abana kuxanisekako natxo; ngako txihango txokari txi txi dhumiswa, sotshe sihango sa tsaka kumweko natxo.

²⁷Sekoko, anu mi mmidi wa Kristu, kambe mi sihango sakwe, mmweyo ni mmweyo ngu mazumbelo akwe.

²⁸ Avale Txizimu txi nga va veka, mndani ka dibanza, kuthanga txi vekile vapostoli, ka wumbidi txi vekile vaprofeti, ka wuraru txi vekile vagondisi. Ngu msana kuta sihiwa sa kumaha sidiwukiso, sa kuhanyisa valwali, sa kuvhuna vamwani, sa kuthangelela mthumo, kuwombawomba tidimi to tala.

²⁹Ina votshe mbapostoli kani? Ina votshe mbaprofeti kani? Ina votshe mbagondisi kani? Ina votshe va maha sidiwukiso kani?

³⁰Ina votshe va ningilwe kuhanyisa valwali kani? Ina votshe va ningilwe kuwombawomba tidimi kani? Ina votshe va ningilwe kutxhamusela tona tidimi tiya kani?

³¹Lavani ngutu-ngutu sihiwa si i ku sa lisima la hombe. Se ni lava ku mi kombisa nzila yi i ku ya yinene ngutu.