Read chopi 1 Vakorinto 13 Bible Online

1 Vakorinto 13 - chopi bible

1 Vakorinto 13

¹Hambi idiku no ziva kuwombawomba tidimi ta vathu ni ta tingelozi, kambe ngako ni si nga ni lirando, ni fana ni simbi yi yi ngelengetako mwendo mpundu wu wu tumako.

² Hambi idiku ni to ningwa wuprofeti, ni kuziva totshe ta kusisaleka, ni wotshe wutxhari, hambi idiku no va ni likholo la hombe, ahawa koza ni sikota kukhunula mimango, kambe ngako ni si nga ni lirando, kha ni nga txilo.

³Hambi ni txi teka yotshe thomba yangu ni txi phakela avale va si pwatako, hambi idiku no ningela mmidi wangu, wu txi hiswa ngu mndilo, kambe ngako ni si nga ni lirando, kha ti ni vhuni txilo.

⁴Lirando la timisela, lirando li ni wumbilu, lirando kha li nga ni mazonda, lirando kha li ti guleti, lirando kha li ti kukumukisi;

⁵lirando kha li mahi ati ti si nga ni sigelo, lirando kha li ti laveli sa lona, kha li kwati, kha li na txiviti.

⁶Lirando kha li tsakeli to biha, kambe li tsakela ti i ku ta ditshuri.

⁷Lona la divalela totshe, la kholwa ka totshe, la rinzela totshe, la timisela totshe.

⁸Lirando kha li na mbi va ni magwito. Kutxhumayela dipswi ku na guma, tidimi ti na pinda, wuzivi wu na guma;

⁹nguko wuzivi wathu wu komile, kutxhumayela kwathu ni kona ngudotho.

¹⁰Kasi mbimo yi si nota asi i ku sa kuhetiseka, asile i ku sa ku ambi hetiseka si na fuviswa.

¹¹Mbimo yi ni nga ti mwanana, ni ti wombawombisa txiwanana, ni ti alakanyisa txiwanana, ni ti pimisisa txiwanana; kambe mbimo yi se ni nga kula, ni to leka ta wanana.

¹²Nguko, konkuwa, so maha hi si wonela kule kota nga kule ka kulavetetela ngu txibuko. Kambe ka yoneyo mbimo, ku nata va kuwonana ka khohe ni khohe. Konkuwa, na ziva ka kudotho, kambe ka yoneyo mbimo, ni nata ziva nga ti nanani ni ziviswako tona ngu Txizimu.

¹³Konkuwa, likholo ni txithembo ni lirando nzimaha so tsana ngu wuraru wa sona, aniko txa hombe ka sona ngu lirando.