Read chopi 1 Vakorinto 14 Bible Online

1 Vakorinto 14 - chopi bible

1 Vakorinto 14

¹Khutalelani lirando, mi txi navela kumana sihiwa sa Moya, ngutu-ngutu txihiwa txa kuwomba dipswi.

²Nguko awu a wombawombako tidimi, kha wombawombi ni vathu, a womba-womba ni Txizimu; awalo wu a ti engisako, kambe ene a womba-womba timhaka ta misisalo, na a txi tulelwa ngu Moya.

³Awu a wombako dipswi a womba-womba ka vathu, kasiku a txi va aka, a txi va tsanisa, a txi va thavelela.

⁴Awu a wombawombako tidimi, wa ti aka ene apune, aniko awu a wombako dipswi a aka dibanza da Txizimu.

⁵Ni ti navela ti to motshenu mi womba-womba tidimi, kambe ngutu-ngutu ni ti navela ku motshenu mi txi womba dipswi. Nguko awu a wombako dipswi a pala wule a wombawombako tidimi, hahanze ka kuva e txhamusela ati a wombawombako, kasiku dibanza di mana kuakwa.

⁶Sekoko, vanathu, ngako ni txi mi tela, ni txi tela ku ta womba-womba tidimi, ni na mi vhuna ka tihi, hahanze ka kuva ni txi womba-womba ngu siwoniso sa Txizimu, ni timhaka ta wutxhari, ni ta kuwomba dipswi mwendo ta kugondisa, kani?

⁷Ta maheka toneto ka si si vetwako, na i si nga so hanya, kufana ni msengele, mwendo txitende; ku nga ti si si humisi mtsome wu wu zivanekako, yi na ziviswa kutxani ndando yi yi vetwako ngu wona msengele mwendo txona txitende, kani?

⁸Kufana ni toneto, mpundu wu txi mahwa nyamvetwe, i mani a no ti lulamisela kuya yimbini kani?

⁹Ngu toneto, na nanu: Ngako lidimi lanu li txi humisa mapswi o mbi pfala, ti na ziviswa kutxani ati mi wombawombako tona kani? Mi na fana ni wu a wombawombako ni diphuho.

¹⁰Ha ditikoni ku ni tidimi to tala, kambe totshe ta pfala.

¹¹Ngako ni si engisi mhaka ya mapswi a wule a wombawombako ni nani, ni na nga no va heloho, nene a na nga wo va wa heloho kwangu.

¹²Ngu toneto, ngako mi navelako kumana sihiwa sa Moya, khutalani kasiku mi txi si mana ngu kutalelwa ka sona, ti to mi aka dibanza.

¹³Ngu toneto, awu a wombawombako tidimi, a na khongele kasiku e sikota ku ti txhamusela.

¹⁴Nguko, ngako ni txi khongela ngu tidimi, moya wangu wa khongela, aniko mapimo angu kha ma bhinduli.

¹⁵Se nji txani ni fanelako kumaha kani? Ni na khongela ngu moya, ni txi khongela kambe ngu mapimo; ni na embelela ndando ngu moya, ni txi embelela kambe ngu mapimo.

¹⁶Nguko, ngako u txi bonga ngu moya wokha ka Txizimu, se awule i kova m'thu dwe msengeletanoni, eko asi ti pfiko ati u wombako, a na sikotisa kutxani kuangula, a txi “Amen” ka mkombelo wako wa kubonga, kani?

¹⁷Awe wa bonga ta tinene; kambe mmwani kha ti mu aki.

¹⁸Ani na bonga ka Txizimu, nguko na womba-womba tidimi to tala, ti si ziwiko kupinda motshenu.

¹⁹Kambe msengeletanoni ni dhunda kuwomba mtxhanu wa mapswi awa ma pfalako, kufela kugondisa vamwani, kupinda 10.000 wa mapswi, ngu tidimi ti ti si ziwiko.

²⁰Vanathu, mi nga ti maheni vanana mapimoni kwanu. Ka tile to biha, eho ti maheni vanana, kambe amu ka mapimo ti maheni madhota.

²¹Amu ka dibhuku da mlayo, ti bhatwe ti taku: Ni na womba-womba ka vathu vava ngu lidimi la vathu va mamwani matiko, ngu sisofu sa timwani tixaka, kambe hambi keto, kha va na mbi ni engisa, kha Mkoma.

²²Ngu konaho, tidimi njikombiso ka va va si kholwiko, i si nga ka va va kholwako; kasi kuwomba dipswi kha ku mahelwi ava va si kholwiko, aniko kumahelwa makholwa.

²³Ngu toneto, ngako di txi tshangana dotshe dibanza msengeletanoni, se votshe va txi womba-womba ngu tidimi to hambana, se konako ku txi wulela vathu vo mbi tiziva, mwendo va va si kholwiko, ina kha va na mbi womba ti to mi bharukile, kani?

²⁴Aniko kumaha ti votshe va txi womba dipswi, se konaho e wulela awu asi kholwiko, mwendo a si tiziviko, eyo wa konwa ngu votshe e lamulwa ngu votshe;

²⁵makungo a mbilu yakwe, ma na humeleliswa ha kubasani, se a na namisa mbanza, e khozela Txizimu, e womba a txi khene: Kha ditshuri Txizimu txiho hagari kwanu.

²⁶Ti di ngeto, ku nga mahwa to txani kani, vanathu kani? Mbimo yi mi sengeletanako, mmwani ni mmwani kwanu a nga sikota kuthula ndando, mmwani a nga sikota kuwomba dipswi do gondisa, mwendo dipswi di a nga kombiswa ngu Txizimu, mwendo kuwomba mapswi okari ngu lidimi lo hambana, mwendo txiningo txo txhamusela ti ti wombwako ngu timwani tidimi; kambe totshe tiya ti na mahelwe kufela kuaka msengeletano.

²⁷Ngako ku diho kuwombawomba tidimi to hambana, ku nga wombe vo pinda vambidi, mwendo hambi i di vararu, mmweyo ngu mmweyo, se mmwani a txi txhamusela.

²⁸Kungako ku si nga ni wo txhamusela, awu a nga ti ti lava kuwombawomba ngu tidimi to hambana a na malale; a na ti khongelele mbiluni kwakwe ene ekha ni Txizimu.

²⁹I di vaprofeti, va na womba-wombe vambidi mwendo vararu, se vamwani va na lamule.

³⁰Ngako mmweyo wa va va nga tshangana a txi kombiswa mhaka ngu Txizimu, ku na malale awule wo khata, hambi a di hagari ka kuwombawomba.

³¹Motshenu mi nga sikota kuwomba dipswi da Txizimu, mmweyo ngu mmweyo, kasiku votshe ve mana kugonda ni kutsaniswa.

³²Mimoya ya wuprofeti mi lamulwa ngu vaprofeti.

³³Nguko Txizimu hi nga Txizimu txa vhilinganya, aniko i Txizimu txa kudikha. Madingano ni txiheno txa otshe mabanza a vasawuleki,

³⁴vavasikati va na malale misengeletanoni; vona kha va tumelelwi kuwombawomba. Kulaveka va txi ti veka hahatshi, kota kuwomba ka wona mlayo.

³⁵Va txi lava kugonda to maha, va na wotise ka vamna vawe m'tini, nguko ti ni muyilo ka wamsikati kuwombawomba hagari ka msengeletano.

³⁶Ina dipswi da Txizimu di humete kwanu kani? Mwendo nganu mokha mi ngadi amukela kani?

³⁷Ngako mmweyo wanu a txi tipfa ti to i mprofeti mwendo m'thu wu a nga woniswa mhaka ngu Txizimu, a na ti zive konaho ti to ati ni mi bhalelako nzirumo sa Mkoma.

³⁸Aniko ngako a diho wu a si tiziviko, tikomba ti taku nene kha ziwi ngu Txizimu.

³⁹Ngu toneto, vanathu, navelani kumana wuprofeti, mi nga tsimbeni vathu kuwombawomba ngu tidimi to hambana.

⁴⁰Aniko totshe ti na mahwe ngu fanelo ni mlayo.