Read chopi 1 Vakorinto 3 Bible Online

1 Vakorinto 3 - chopi bible

1 Vakorinto 3

¹Se i di ani, vanathu, kha na sikota kuwombawomba ni nanu nga vathu va Moya, aniko ni wombawombile ni nanu kota nga vathu va ha mafuni dwe, ni mi fananisa ni sivananana amu ka timhaka ta kuziva Kristu.

² I masi ni nga mi mamisa, hi nga sakudya so banga, nguko nga mi sa sikota kutxakuta. Hambi ni konkuwa, nga mi si sikoti,

³nguko mi ngadi vathu va ha mafuni dwe. Nguko mibango ni kuphikizana kuwa ku kuho hagari kwanu, ina hi nga kuwa mi ku ngadi vathu va ha mafuni dwe, mi hanyisako wuthu kani?

⁴ Nguko, ngako m'thu a txi khene: “Ani ni wa ka Paulo,” mmwani a txi khene: “Ani ni wa ka Apolosi,” ina tona tiya hi nga kuhanyisa wuthuri kani?

⁵Hi ngani ni gela: I mani Apolosi kani? I mani Paulo kani? Vona nzithumi dwe, asi mi nga amukeliswa ngu sona likholo, na ti txi tsimbila ngu hawa mmwani ni mmwani a nga ningiswa tona ngu Mkoma.

⁶ Ani ni phayile, Apolosi asi theletete mati, aniko Txizimu ngu txona txi nga si kulisa.

⁷Ngu konaho, hambi wu a phayako, hambi wu a theletelako mati hi nga txilo. Txizimu ngu txona txi si kulisako.

⁸Awu a phayako kumweko ni wu a theletelako mati mbamwevo; se mmwani ni mmwani a na tshungulwa madingano ni mthumo wakwe.

⁹Kha ditshuri, athu hi vavhuneteli va Txizimu, anu mi wudimi wa Txizimu, mi Nyumba ya Txizimu.

¹⁰Madingano ni kateko ya Txizimu, ayi ni nga ningwa, ani kota muaki wo ziva, ni valute makhato, aniko mmwani ngene a akako txitimwi ka makhato awa. Se m'thu ni m'thu a na wonisise ati a akisako tona koneho;

¹¹nguko awalo wu a ku ni fanelo ya kuveka mamwani makhato a kuhambana ni awa ma nga vekwa, i ku ene Jesu Kristu.

¹²Ngako m'thu a txi aka txitimwi ka makhato awa, ngu nzalama, ngu silivhela, ngu marigwi a lisima, ngu mapulango, ngu matshanga mwendo mwasi;

¹³wu na tikomba mthumo wa m'thu ni m'thu, nguko ditshiku da kuta ka Mkoma di nata wu landula.

¹⁴Se ngako mthumo wa m'thu wu di akilwe wu di tsani, muaki a na tshungulwa.

¹⁵Se ngako mthumo wa m'thu wokari wu txihya, eyo a na luzekelwa, kambe ene a na poniswa, nga a to pinda ngu hagari ka mndilo.

¹⁶Kasi kha mi tizivi ti to mi dithepele da Txizimu ni ti to Moya wa Txizimu wu zumba kwanu kani?

¹⁷Ngako m'thu a txi hasulela dithepele da Txizimu ni txona txi na mu hasulela. Nguko dithepele da Txizimu di sawulekile, se dithepele diya ngu nganu.

¹⁸Mi nga ti kanganyiseni mipune. Ngako m'thu a txi pimisa ti to a txharihile ngu wutxhari wa ha mafuni, a na ti mahe txipumbu, kufela ku e mana wutxhari wa ditshuri.

¹⁹Nguko wutxhari wa ha mafuni mbupumbu masoni ka Txizimu, kota nga ti ti nga bhalwa va txi kha vona: “Txona txa bzweta vazivi amu ka wutxhari wawe.”

²⁰ Ka wumwani wukhalo kambe va kha vona: “Mkoma wa tiziva ti to mialakanyo ya vathu hi nga ya kunyawula.”

²¹Ngu toneto, mi nga ti kuliseni hagari ka vathu. Ngu ditshuri, sotshe nzanu:

²²Hambi ene Paulo, mwendo Apolosi, mwendo Khefasi, mwendo mafu, mwendo kuhanya, mwendo kufa, mwendo ta nyamsi, mwendo ta mangwana; sotshe nzanu,

²³kambe anu mi va ka Kristu, se Kristu mbwa ka Txizimu.