Read chopi 1 Vakorinto 4 Bible Online

1 Vakorinto 4 - chopi bible

1 Vakorinto 4

¹Ti di ngeto, vathu kulaveka va txi hi ziva nga hi sithumi sa Kristu ni ti to hi vaaveli va sixamaliso sa Txizimu.

²Se vaaveli ta laveka va txi maneka i di vo thembeka.

³Ani ngu txangu, kha ni khatali ngu kulamulwa ngu nganu, mwendo kulamulwa ngu vathu, hambi ani ngu wutumbu wangu kha ni ti lamuli nipune.

⁴Mbiluni kwangu kha ni ti pfi mnandu wa txilo; aniko, hambi keto, kha ni wombi ti to ni mlulami: Awu a sikotako ku ni lamula ngu Mkoma.

⁵Ngu toneto, mi nga tekeleni kulamula, txi sinzi kuhoka txikhati, kala kuwuyani ka Mkoma, awu a nota woninga mithumo yi yi nga sisala mtemani, e wonekisa makungo a timbilu. Se ngu konaho mmwani ni mmwani a nota amukela ka Txizimu wudhumo wu wu m'fanelako.

⁶Vanathu, ni di wombile tiya ngu ngani ni Apolosi, ni ti mahela anu, kasiku mi txi gonda ngu ngathu ku ambi ndaka muhingano wa tile ti nga bhalwa, ni ti to ni mmweyo asi ti kulisi, a txi namarela ka mmweyo, a txi nyenya mmwani.

⁷Kunene, kasi i mani wu a sawulako kani? Nji txani u ku natxo awe, txo va u sa maha ngu kuningwa kani? Se ngako u di ningilwe, nji txani u txi ti guleta, nga hi nga so si mana ngu kuningwa kani?

⁸Se mi khuri! Se mi vanyatithombe! Mi tipfa mi txi fuma hahanze kwathu! Sikwanu mayi, idiku mo fuma ngu ditshuri, kasiku nanathu hi fuma kumweko ni nanu.

⁹Kha ditshuri, Txizimu ngu nga txi to hi veka athu, vapostoli, ka wukhalo wa magwito, kota nga vo abaniselwa kufa, nguko ngu ditshuri hi mahilwe msaho wa kuhungata ditiko ni tingelozi ni vathu.

¹⁰Athu hi sipumbu ngu mhaka ya Kristu, se anu mi titxhari ngu ka Kristu; athu hi mapwembwe, anu mi tindena; anu mi vo xonipheka, athu hi vo eyiseka,

¹¹kala txikhati txa nyamsi ha xaniseka ngu nzala, ni ditora ni wusakato; ha yamaselwa ngu mipama, hi vaxeleleki;

¹² ha karala ngu kuthuma ngu manza athu. Hi txi rukwa, athu ha katekisa; hi txi xaniswa, athu ha timisela;

¹³hi txi singetwa makuhu, athu hi womba mapswi a thavelelo. Hi hindukile hi txi nga ho va nzambwa ya mafu, ditala da votshe, kala ditshiku da nyamsi.

¹⁴Kha ni mi bhaleli timhaka tiya kufela ku mi thela tingana, aniko ni mahela ku mi laya, nga vanana vangu vo randeka ngutu.

¹⁵Nguko, hambi idiku mo va ni 10.000 wa vagondisi ngu ka Kristu, kambe kha mi nga ni vatate vavangi, nguko ani ngani ni nga mi veleka ngu ka Jesu Kristu, ngu txhumayelo ya Evhangeli.

¹⁶ Ngu toneto, na mi kombela ti to mi va vaeteteli vangu.

¹⁷Ngu konaho, ni mi rumete Timoti, i ku mwanana wangu wo randeka ni kuthembeka ngutu ngu ka Mkoma; ene a na mi alakanyisa tinzila tangu ta likholo ka Kristu, nga ti ni nga gondisisa tona ka otshe makhalo, ka otshe mabanza.

¹⁸Vamwani va tsimbila ngu kutikukumukisa, nga no va ni si lavi ku mi tela kambe.

¹⁹Aniko, ngako Txizimu txi txi ti lava, kunukunuku ni na mi tela ni ta setxha, i si nga mapswi ya va va ti kukumukisako, aniko ni ta duka mtamo wawe.

²⁰Kha ditshuri, Mfumo wa Txizimu hi nga mhaka ya mapswi, aniko i mhaka ya mtamo.

²¹Mi sawula txani? Mi lava ni txi mi tela ni ndonga, mwendo ni txi mi tela ni lirando ni moya wo thutha kani?