Read chopi 1 Vakorinto 6 Bible Online

1 Vakorinto 6 - chopi bible

1 Vakorinto 6

¹Ngako mmweyo wanu a di ni kuphikizana ni mkwawe, mi tsanisa kutxani ku mu yisa a txi ya lamulwa ngu vamatiko, mi si mu yisi ka vasawuleki, kani?

²Ina kha mi tizivi ti to vasawuleki ngu vona va no lamula ditiko, kani? Se ngako ditiko di txi na lamulwa ngu nganu, ina kha mi nga ni fanelo yo lamula timhaka ta tidotho, kani?

³Ina kha mi tizivi ti to hi na lamula hambi tingelozi kani? Se hi nga xulwa ngu sa wutomi wuwa kani?

⁴Ngako ku di ni mahungu o nga toneto, ina mi nga sikota kusawula ava va si thembekiko dibanzani, mi va maha valamuli, kani?

⁵Ni wombisa tiya kasiku mi pfa tingana. Ina kha nga ho hagari kwanu m'thu wo ziva, awu a sikotako kulamula hagari ka vanawe, kani?

⁶Kambe ati ti mahekako ngu ti to mmwani a phikizana ni mkwawe masoni ka vamatiko!

⁷Se kuhumelela mazunga hagari kwanu, tikomba ti to kha ditshuri mi ngadi hahatshi. Nji txani mi si tumeliko kudyelelwa kani? Nji txani mi si tumeliko kuluzekelwa kani?

⁸Aniko anu nganu mipune mi dyelelako ni kumoxa vamwani, na kambe mi maha eto ka vananu vapune.

⁹Ina kha mi tizivi ti to sidambu kha si na mbi dya thomba ya mfumo wa Txizimu kani? Mi nga ti kanganyiseni. Sindakamilayo, ni vakhozeli va sizimu sa walo, vagelezi,

¹⁰ni makhamba, ni vanyatimbiti, ni sidhakwa, ni varuketeli, ni vavamna va va mahako txionho txa tingana ni mwamna kulowe, kuwalo ni wammweyo kwawe a no sikota kudya thomba ya mfumo wa Txizimu.

¹¹Vamwani kwanu i ti vo nga toneto, aniko se mi kuwutwe, mi sawulekisilwe, mi mahilwe valulami ngu ditina da Mkoma wathu Jesu Kristu ni Moya wa Txizimu txathu.

¹² “Sotshe kwangu sa tumeleleka.” Ina. Kambe hi nga sotshe si vhunako. “Sotshe kwangu sa tumeleka.” Aniko kha ni tumeli ti to ni txatximweto txi ni fuma.

¹³Sakudya si lumba mrumbu, mrumbu wu lumba sakudya, aniko Txizimu txi na fuvisa sakudya, ni mrumbu. Mmidi wathu hi nga wa wugelegele; mmidi wathu wu lumba Mkoma. Mkoma nene a lumba wona mmidi.

¹⁴Txizimu txi nga wusa Mkoma ngu ka vo fa, txi na hi wusa nathu ngu mtamo wa txona.

¹⁵Ina kha mi tizivi ti to mimidi yanu nzihango sa Kristu kani? Ina ni na teka txihango txa Kristu ni txi ningela ka digelegele kani? Lambi!

¹⁶Ina kha mi tizivi ti to awu a patanako ni digelegele a maha mmidi wumwewo kumweko nado kani? Nguko ti bhatwe taku: “Vambidi va na maha mmidi wumwewo.”

¹⁷Awu a ti tshanganisako ni Mkoma a maha moya wumwewo nayo.

¹⁸Thavani wugelegele. Txionho txihi ni txihi a txi mahako m'thu, txi kule ni mmidi wakwe; kambe awule a mahako txionho txa wugelegele a onhela mmidi wakwe wupune.

¹⁹ Ina txima kha mi tizivi ti to mimidi yanu mathepele ya Moya wo Sawuleka, wu zumbako mndani kwanu, awu mi nga wu amukela ka Txizimu, ni ti to kha mi ti lumbi anu mipune, kani?

²⁰Nguko mi xavilwe ngu txuma txa hombe; dhumisani Txizimu koko mmidini kwanu, ni moyani kwanu, asi si lumbako Txizimu.