Read chopi 1 Vakorinto 7 Bible Online

1 Vakorinto 7 - chopi bible

1 Vakorinto 7

¹Sekoko, ka timhaka ti mi nga ni bhalela, ani ni pimisa ti to ndinene ngako m'thu asi teki msikati.

²Aniko, ngu konaho ka wugelegele wu nga tala, wamwamna ni wamwamna a nave ni msikati wakwe; wamsikati ni wamsikati nene a nave ni mwamna wakwe.

³Wamwamna a na ninge msikati wakwe asi i ku sa fanelo; kufana ni toneto, wamsikati nene a na ninge mwamna wakwe asi i ku sa fanelo.

⁴Wamsikati kha nga ni mtamo txitimwi ka mmidi wakwe apune, aniko mtamo wu ni mwamna wakwe; kufana ni toneto, wamwamna nene kha nga ni mtamo txitimwi ka mmidi wakwe apune, aniko mtamo wu ni msikati wakwe.

⁵Mi nga tonaneni, hahanze ka kuva mi txi pfana ngu wumbidi wanu ngu mbimwanyana, kasiku mi sikota ku ti ningela mkombeloni. Mi di gwitile, tshanganani kambe, kasiku Sathani asi mi duki ngu ku ambi ti ñola kwanu.

⁶Ni womba tiya kufela ku mi komba ti ti tumelelwako, i si nga ngu kukurumetwa.

⁷Nguko ni ti navela ti to votshe vathu va txi fanana ni nani; aniko m'thu ni m'thu a amukete txi txi mu dinganako ngu ka Txizimu, mmwani ni mmwani, nga ti a nga ningiswa tona.

⁸Kambe ka va va sinziko kuteka ni va va sinziko kutekwa ni ka tinoni, ni khani i txhuko va txi zumba kufana ni nani.

⁹Aniko, kungako va si sikoti, va na amukele mtekano. Nguko i txhuko kutekana kupinda kuhya ngu kunavela.

¹⁰ Aniko na ruma ava va nga tekana hi nga ani ni rumako, kuruma Mkoma, ti to wamsikati asi lekani ni mwamna wakwe.

¹¹Kambe kungako a txi lekana nayo, a nga tshumele e tekana ni mmwani; mwendo a nga divalelana ni mwamna wakwe; wamwamna nene a nga leke msikati wakwe.

¹²Se ka vamwani na va gela ani, i si nga Mkoma, ku khani: Ngako mmweyo wa vanathu a di ni msikati wo va asi kholwi, kambe a tumelako kuhanya nayo, a nga mleke.

¹³Nene wamsikati, ngako a di ni mwamna wo mbi kholwa, kambe a tumelako kuhanya nayo, a nga mleke.

¹⁴Nguko wamwamna wo mbi kholwa wa sawulekiswa ngu msikati; se wamsikati wo mbi kholwa wa sawulekiswa nene ngu mwamna. I si nga eto, vanana vanu va ndi nava va nzambwa; kupheti vona mbasawuleki.

¹⁵Se, ngako awu i ku si nga dikholwa a txi lava kuhambana, a na tsule. Keyo mhaka, awu wa mwanathu, mwendo wu wa ndiyathu a txhatxhekile. Txizimu txi mi dhanete kudikhani.

¹⁶Ina wa tiziva awe wamsikati ti to u na hanyisa mwamna wako kani? Awe wamwamna, wa tiziva ti to u na hanyisa msikati wako kani?

¹⁷Ngu toneto, m'thu ni m'thu a na mahe nga ti a nga ningiswa tona ngu Mkoma, mwendo nga ti Txizimu txi nga m'dhanisa tona. Ngu tona ti ni rumisako tona ka otshe mabanza.

¹⁸Wa ho wu a nga dhanwa wukholwani, a di yisilwe wukwerani kani? A nga lave kusisa wukwera wakwe. Wa ho wu a nga dhanwa wukholwani a sinzi kuyiswa wukwerani? A nga lave kuyiswa wukwerani.

¹⁹Wukwera hi nga txilo, wukhutu ni wona hi nga txilo; txa lisima ngu kuveketa sirumo sa Txizimu.

²⁰M'thu ni m'thu a na zumbise ti a nga dhaniswa tona ngu Txizimu.

²¹U dhanwi u di txithumi kani? U nga khatale. Aniko, ngako u txi mana kateko yo thuswa, yi londole.

²²Nguko awu a dhanwako ngu Mkoma i di txithumi, i mtxhatxheki wa Mkoma. Nene wu a dhanwako a di txhatxhekile, njithumi txa Kristu.

²³Mi xavilwe ngu txa lisima la hombe, mi nga ti maheni tikhumbi ta vathu.

²⁴Vanathu, mmweyo ni mmweyo kwanu, masoni ka Txizimu, a na zumbise ti a nga dhaniswa tona.

²⁵Ka vale va sinziko kuteka mwendo kutekwa, kha ni nga ni txileleto txa didhawa da Mkoma, aniko na veka mawonelo angu, kota nga wu a nga mana wumbilu ka Mkoma, kasi e va i di wo thembeka.

²⁶Kunene, ani ni pimisa tito, ngu mhaka ya sikarato sa mbimo yiya, ndinene wamwamna a txi zumbisa toneto.

²⁷Ina u ti sungile ka wamsikati kani? U nga lave kubhenula ngoti. Ina u khululekile ka wamsikati kani? U nga lave kuteka msikati.

²⁸Aniko, ngako u txi teka msikati, khu mahi txionho; muhorana wo tuma nene, a txi tekwa kha mahi txionho. Aniko ava va nga txhadha va na mana sixaniso sa ha mafuni; se ani ni ti ko lava ku mi hulukisa keso sixaniso.

²⁹Na mi gela, vanathu, ti to txikhati txi komile. Kukhukhela ka konkuwa, ava va ku ni vasikati va na hanyise ku nga kha va nga navo;

³⁰ava va dilako va ne nga kha va dili; ava va tsakako va ne nga kha va tsaki, ava va xavako va ne nga kha va nga ni txilo;

³¹ani va va londolako sa mafu awa, va ne nga kha va si thumisi, nguko mazumbelo a ditiko diya ma guma.

³²Ani ni ti dhunda ti to mi si zumbi ngu kukarateka. Awu a nga mbi teka msikati a khutalela kumaha kuranda ka Mkoma, kumaha ti ti sikotako kutsakisa Mkoma;

³³kasi awu a nga teka msikati a khutalela sa ditiko ni kumaha ti ti sikotako kutsakisa msikati wakwe;

³⁴se a maneka a di bhandilwe. Wamsikati wu a nga mbi tekwa, kufana ni wu i ku ngadi mbiri, a khutalela si i ku sa Mkoma, kufela ku ti sawulekisa mmidi ni moya. Kasi awu a nga tekwa a khutalela sa ditiko, a txi maha ti ti sikotako kutsakisa mwamna wakwe.

³⁵Ni womba tiya kufela ku mi vhuna; i si nga ku mi riyela. Ni xuva kuwomba ti i ku ta lisima la hombe ni ti ti sikotako ku mi tshanganisa ni Mkoma ngu kuenelela.

³⁶Aniko, ngako m'thu a txi pimisa ti to hi nga ta tinene to mwanana wakwe wa txihoranana a txi pindelwa ngu tanga ya kutekwa, na a txi pimisa kambe ti to a fanela ku mtxhadhisa, a na mahe ati a ti lavisako tona; kha mahi txionho ngako a txi mtxhadhisa, a na mtxhadhise.

³⁷Aniko, awu a nga ti langela ngu kutsana mbiluni kwakwe, i si nga kukurumetwa ngu txilo, a txi maneka a di txhatxhekile ta tinene kutshatani kwakwe, ti to a na xayisa mwanana wakwe wa txihoranana i di wotuma, a maha ta tinene.

³⁸Ngu toneto, awu a txhadhisako mwanana wakwe wa txihoranana a maha ta tinene. Kambe awu asi mtxhadhisiko, a maha ti i ku ta tinene ngu kupindisa.

³⁹Wamsikati wa kutekwa a sungilwe ka mwamna wakwe, a di ngadi a txi hanyelwa ngu mwamna. Ngako mwamna wakwe a txi fa, wamsikati a txhatxhekile, kasiku e tekana ni wu a mlavako, ti txi nga tsimbila ngu mlayo wa Mkoma.

⁴⁰Aniko, ka mawonelo angu, a na va a di katekile, ngako a txi zumbisa ti a nga salisa tona. Ni pimisa ti to nanani ni ni Moya wa Txizimu.