Read chopi 1 Vakorinto 8 Bible Online

1 Vakorinto 8 - chopi bible

1 Vakorinto 8

¹Ka mhaka yi yi wombako ngu sakudya sa kugandela sizimu sa walo, ha tiziva ti to hotshethu hi ni wuzivi. Wuzivi wu ninga kutikukumukisa, aniko lirando la aka.

²Se ngako m'thu a txi pimisa ti to wa ziva, eyo kha nzi kuziva ngu tifanelo ti ti lavekako.

³Aniko, ngako m'thu a txi randa Txizimu, eyo wa ziwa ngu txona.

⁴Ngu toneto, ka mhaka ya sakudya sa timhamba ta kugandela sizimu sa walo, ha tiziva hotshethu ti to Txizimu txa walo hi nga txa txilo ha ditikoni; ha tiziva ti to ku ni Txizimu, txa tximwetxo dwe, hahanze ka txona kuwalo tximwani.

⁵Nguko, hambi si diho sasingi si dhanwako “sizimu,” nzumani mwendo ha mafuni, nga ti si kuho sizimu sasingi ni vafumeli vavangi,

⁶kambe kwathu kha txi nga ho tximwani hahanze ka Txizimu tximwetxo dwe, Tate wu, sotshe si tako ngu kwakwe, awu, hotshethu hi hanyelako ene; ni Mkoma mmweyo dwe, Jesu Kristu, awu, sotshe si hanyako ngu ngene, ni nathu hi hanyako ngu ngene.

⁷Aniko hi nga votshe va ti zivako tiya. Vamwani, va nga tolovela mahanyelo a kale a kukhozela sizimu sa walo, vadya sakudya sa timhamba ta sizimu sa walo, va txi kholwa ti to nza kuphaxelwa sona sizimu sile; se ngako livhalo lawe li nga mbi tsana, va wulelelwa ngu mtungu.

⁸Aniko hi nga sakudya si hi ningako kutsakisa Txizimu. Nguko kha hi wuyelwi ngu txilo, ngako hi txi dya, kambe kha hi luzi txilo, ngako hi si dyi.

⁹Se ti woneleni, kasiku, kukhululeka kwanu ka mhakeyo, ku si khuvekisi ava vo mbi tsana.

¹⁰Nguko kumaha tiya m'thu wokari a txi kuwona awe, u ti zivako, u di khalahatshile ha sakudyani amu dithepeleni ka sizimu sa walo, ina mbilu yakwe wule wo mbi tsana kha yi na mbi msusumetela kudya nene nyama ya timhamba ta sizimu sa walo kani?

¹¹Se ngu mhaka ya kuziva kwako, a na luzeka mwananu i ku wo mbi tsana, ene wu Kristu a nga m'fela.

¹²Se ngako mi txi hoxela vanathuvo, mi txi va dayisa livhalo lawe lo mbi tsana, ka toneto ma hoxela Kristu.

¹³Ngu toneto, ngako sakudya si txi khuvekisa mwanathu, ani kha ni na mbiswa ni txi dya nyama, kasiku ni si khuvekisi mwanathu.