Read chopi 1 Vakorinto 9 Bible Online

1 Vakorinto 9 - chopi bible

1 Vakorinto 9

¹Ina kha na khululeka kani? Ina kha ni nga mpostoli kani? Ina kha na mu wona Jesu Kristu kani? Ina anu kha mi nga mthumo wangu ngu ka Mkoma kani?

²Hambi ni si nga mpostoli ka vamwani vathu, kambe kwanu ni mpostoli, nguko anu mi txixambanyo txa wupostoli wangu ngu ka Mkoma.

³Txitxhavangu txangu ka vale va wombako kubiha ngu ngani ngu txiya:

⁴Ina athu kha hi nga ni fanelo ya kudya ni kusela kani?

⁵Kha hi nga ni fanelo ya kupangalatana ni wamsikati wu i ku ndiyathu ngu ka Kristu, nga ti va mahako vamwani vapostoli, ni vanawe va Mkoma, ni Khefasi, kani?

⁶Mwendo ngani nokha ni Bharnabhasi hi ku si nga ni fanelo yo thuma, kani?

⁷I mani a tsulako yimbini ngu mtamo wakwe dwe, kani? I mani a phayako mivhinya, asi dyiko mihando ya yona kani? Mwendo i mani a dyisako mtxhambi asi seliko masi a kona kani?

⁸Ina ni womba tiya ngu mawombelo ya vathu kani? Ina mlayo kha wu ti wombi ni wona kani?

⁹Nguko Mlayoni ka Mosi ti bhatwe ti taku: “U nga tsive txisofu txa homu yi yi hulako.” Ina Txizimu txo khatalela tihomu kani?

¹⁰Ina txona kha txi ti wombeli athu vathu, kani? Im! Atiya ti bhatwe ngu kota yathu. Nguko awu a dimako a fanela kudima ni txithembo, awu a hulako, a hula na a txi themba kumana txhatxhazelo.

¹¹ Ngako hi di phayile kwanu sa moya, ina ngu kalavela, ngako hi txi hapha kwanu mihando ya mafu kani?

¹²Ngako vamwani va thathelako asi si ku kwanu, ina athu kha hi fanekelwi ka kupindisa kani? Aniko athu kha hi nzi ku yi thumisa faneloyo. Kambe hi zumba hi txi timisela ka totshe, ngu mhaka ya Evhangeli ya Kristu.

¹³Ina kha mi tizivi ti to vaphaxeli va timhamba va hanya ngu sa dithepeleni kani? Ni ti to ava va vhunetelako ha txiluveloni va mana txyavelo txa ha txiluveloni, kani?

¹⁴ Ngu nzila yo nga toneto, Mkoma nene a leletile ti to ava va thumelako Evhangeli va na hanye ngu Evhangeli.

¹⁵Aniko ani kha ni zivi ku yi thumisa fanelo yiya, kambe kha ni bhaleli ti to ni mahelwa eto ngu vathu; ni bheja kufa, kupinda kumwalata wudhumo wangu.

¹⁶Kutxhumayela Evhangeli, kwangu, hi nga mhaka ya ku ti bhumisa phungo ngu yona, i fanelo yi ni nga rwekwa. Dikhombo dangu, ngako ni si txhumayeli Evhangeli!

¹⁷Idiku no thuma tiya ngu kuranda kwangu, ni ndi na fanekelwa ngu kudihelwa; kambe, ngako i si nga ta ku ti maha ngu kuranda kwangu, i mrwalo ni nga sikelwa.

¹⁸Se kasi nji txani ni holako txona kani? Ni dihelwa ngu kuva ni txhumayela Evhangeli ni si kombeli txilo, ni leka kuamukela asi ni ningwako ngu yona Evhangeli.

¹⁹Ni maneka ni di txhatxhekile masoni ka votshe; kambe ni ti mahile khumbi ya votshe kufela ku na mana vavangi ngutu.

²⁰Ni ti mahile Mujudha kumweko ni Vajudha, kufela ku ni va mana. Ni hanyisa ku nga vale va hanyako hahatshi ka mlayo, nga no fumwa ngu wona, kufela ku ni va mana ni vona.

²¹Ni di ni vale va ku hahanze ka mlayo, ni hanyisa ku nga vale va ku hahanze ka wona mlayo, kufela ku ni va mana ni vona, hambiko ni ku si nga hahanze ka mlayo wa Txizimu, kambe ni ku hahatshi ka Mlayo wa Kristu.

²²Hagari ka vale va dikhodho mu ka likholo, ni ti mahile wa dikhodho nani kufela ku ni txi va mana. Ni ti mahile sotshe ka votshe kufela ku ni txi mana kuhanyisa vamwani ngu totshelele tinzila.

²³Ni maha tiya totshe ngu mhaka ya Evhangeli, kasiku ni txi mana txyavelo txangu ka yona.

²⁴Ina kha mi tizivi ti to ava va mahako mapalisana a livilo ha mthandani, votshe va tutuma, kambe i mmweyo dwe a wuyelwako ngu txhatxhazelo, kani? Nananu tutumisani toneto, kasiku mi na mana kufuhwa.

²⁵Awule a ti longiselako ku yalwa, wa ti tona so tala, kufela ku e wuyelwa ngu m'bhoti wu wu sinako, aniko athu hi lwela m'bhoti wu wu si siniko.

²⁶Ani kha ni mahi nyamtutume, kambe kha ni lwisi ku nga no peketela diphuho.

²⁷Aniko ani ni tsayisa mmidi wangu, ni txi wu maha khumbi, kufela ku, ni di txhumayete vamwani, ani nipune ni si sali msana.