Read chopi 2 Vakorinto 10 Bible Online

2 Vakorinto 10 - chopi bible

2 Vakorinto 10

¹Ani, Paulo ngu wutumbu wangu, na mi khongotela ngu kudikha, ni wunene wa Kristu, ani ni ti vekako hahatshi masoni kwanu, kambe ni mahako wurena ni di kule ni nanu.

²Na mi kombela ti to mi si ni kurumeti ku ta maha wurena ngako ni di bwakile kheyo kwanu kufana ni ti mi pimisako kumahisa tona ka vamwani va va wombako ti to hi tsimbila ngu kulondetela sa mmidi.

³Nguko hi hanya ha mafuni, kambe yimbi yi hi lwako yona, hi nga ya kulwela sa ha mafuni.

⁴Nguko, matxhari awa hi lwako ngu ona hi nga a kuthumiswa ngu vathu, aniko mtamo wa ona wuta ngu ka Txizimu. Athu ha hasamula makungo a mipalavanya;

⁵ni wotshe mtamo wa kutikulisa wu wu lwako ni kuziva ka Txizimu. Ha khozisa mialakanyo yotshe yi txi maha ya kuengisa Kristu.

⁶Hi ti emisete kutsayisa txieyiso txihi ni txihi ngako ku di hetisekile kuengisa kwanu.

⁷Wonani ti ti ku ha kubasani masoni kwanu: Ngako m'thu a txi ti themba ti to a lumba Kristu a na ti zive ngu kumweko ti to nanathu hi lumba Kristu.

⁸Hambi idiku no ti dhumisa ka kudotho ngu mhaka ya mtamo wu ni nga ningwa ngu Mkoma, kasiku ni txi mi aka, i si nga ku mi hasamula, na mi si wiswi tingana.

⁹Kha ni lavi ku mi txi alakanya ku nga no mi dhukisela ngu mapapilo angu.

¹⁰Nguko va kha vona, mapapilo akwe ma nemela, ma ni mtamo, aniko a diho ene ngu wutumbu hagari kwathu, kha nga ni mtamo, ni mapswi akwe kha ma vhuni txilo.

¹¹Awu a wombisakoto, a na ti zive ti to kuwalo kuhambana hagari ka ti hi bhalako mapapiloni kwathu hi di kule, ni ti hi nota ti maha ngako hi txi nata kheyo kwanu.

¹²Kha hi tsani ku ti dinganisa mwendo ku ti fananisa ni vava va ti dhumisako vapune. Vona, ngu ku ti dinganisa vapune ni ku ti fananisa vapune, vo ti maha va ku ambi ziva.

¹³I di athu, kha hi ti dhumisi ngu kupinda mpimo, aniko hi na ti dhumisa ngu mpimo wu hi nga kombwa wona ngu Txizimu, awu wu nga hi hokisa kwanu.

¹⁴Kha ha pindisa mpimo wu hi nga vekelwa wona ngako hi di mi hokete, nguko kha ditshuri, ngathu vo khata ku mi nehela Evhangeli ya Kristu.

¹⁵Kha hi ti dhumisi ko pinda mpimo ka mthumo wa vamwani vathu, aniko ha themba ti to kukholwa kwanu ku di andile, athu hi na kuliswa hagari kwanu, kasiku mpimo wathu wu txi engetelwa,

¹⁶Kasiku hi txhumayela Evhangeli ni ka maphambo awa ma ku masoni ka ditiko danu, hi si wuleli tithembweni ka vamwani kasiku hi si ti dhumisi ngu mithumo ya vamwani.

¹⁷ Awu a ti dhumisako a na ti dhumise ditinani ka Mkoma.

¹⁸Nguko, awu a ti dhumisako kha amukelwi, hahanze ka wu a dhumiswako ngu Mkoma.