Read chopi 2 Vakorinto 11 Bible Online

2 Vakorinto 11 - chopi bible

2 Vakorinto 11

¹Hi ngani timisela kudotho ngu ngani, hambi ni txi nga diphuphulu! Kunene, mi timisete ngu ngani kala nyamsi.

²Na lusa ngu nganu, ngu txiluse txa Txizimu, nguko ni mi ningete mi wutwa ngu mwamna mmweyo, kasiku ni txi mi yisa ka Kristu nga timbiri to basa.

³ Aniko na thava tito, ngako mnyoka wu nga kanganyisa Evha ngu marindi a wona, mialakanyo yanu ni yona yi nga onhwa, mi txi thaviswa ka wunene wu wu ku ka Kristu.

⁴Nguko, ngako a txi ta m'thu kwanu, a txi ta womba-womba ngu Jesu, wo hambana ni wu hi nga mi txhumayela athu, mwendo Moya wo hambana ni wu mi nga wu amukela, mwendo Evhangeli yo hambana ni yi mi nga yi amukela, anu ma mu amukela ngu nzila yo xamalisa.

⁵Aniko ni pimisa ti to kha va ni pali ngu txilo ni txa txidotho vapostolivo vawe va hombe.

⁶Hambi ni sa txhariha ngu mapswi, kambe wuzivi ni nawo ka sotshe simaha ni ka totshe tinzila ti hi nga mi kombisa tona.

⁷Ina nji hoxo ni nga txi maha, akuwa ni nga mi txhumayela Evhangeli ya Txizimu mahala, ni txi ti veka hahatshi nipune, kufela ku mi txi kuliswa anu, kani?

⁸Ni luzile sa mamwani mabanza ma nga ni holela kasi kuthumela anu.

⁹ Mbimo yi ni nga vilela kuvhunwa ni di hagari kwanu, kha na nemeta m'thu, nguko vanathu va Makedhoniya va ni vhuni ka si ni nga ti si pwata. Ka sotshe kha ni zivi ku nga mi nemeta, ni konkuwa ni ngadi ni txi na mahisa toneto.

¹⁰Ngako ditshuri da Kristu di ku kwangu, na xambanya ti to kuwalo wu a no ni honyola nduma yangu matikoni ka Akaya.

¹¹Ngu txani kani? Ngukuva ni si mi randi kani? Txizimu txa tiziva ti to na mi randa!

¹²Ati ni ti mahako ni na zumba ni txi ti maha, kasi kusiwukisa vale va lavako kutiguleta ngu nduma yo fana ni yi athu hi ku nayo.

¹³Vathu vo ngeto mbapostoli va makuhu, nzithumi so kanganyisa. Va ambala madhowo o zama ku ti maha vapostoli va Kristu.

¹⁴Kha ti xamalisi! Nguko, hambi Sathani wa txitxa e teka m'bala wa ngelozi ya liwoningo.

¹⁵Ngu toneto, kha ti xamalisi ngako sithumi sakwe si txi ti hindula si txi nga sithumi sa kululama. Magwito awe ma na dingana ni mithumo yawe.

¹⁶Na engeta ni khani: Ni wammweyo a nga alakanye ti to ni diphuphulu. Hambi keto, ngako mi txi alakanya ti to ni diphuphulu ni amukeleni, kasiku nani ni txi ti dhumisa ka kudotho.

¹⁷Ati ni lavako kuwomba kha ni ti wombi madingano ni kuwomba ka Mkoma, aniko nda wuphuphulu dwe, ngu kuthemba kwangu ti to ni ni fanelo ya ku ti dhumisa.

¹⁸Ngako vavangi va ti dhumisako ngu ka wuthu, nanani ni na ti dhumisa.

¹⁹Nguko ma honisela ngutu ngu maphuphulu, anu mi ku vo txhariha.

²⁰Ma honisela kasiku m'thu a txi mi maha tikhumbi, a txi mi dyelela, a txi mi handa, a txi mi dhelela, a txi mi haphata.

²¹Ni womba tiya ngu tingana, nga hi ti kova ni dikhodho. Atile vamwani va tsanako ku ti womba, ni womba ngu wuphuphulu, nanani na tsana ku ti womba.

²²Mbahebheru kani? Nanani ni ene. Vona mbaisrayeli kani? Nanani ni ene. Mba lixaka la Abrahamu kani? Nanani ni wa lona.

²³Nzithumi sa Kristu kani? Ni wombisa wuphuphulu, ni txi khani: Ani na va pala ngutu. Na va pala ngu mithumo, ni seketwe sikhati sasingi mikorani, kupinda vona; ni kwapetwe ngutu ngu sisephu kupinda vona, sikhati sasingi ni manekile ni di ha phangoni ka kufa.

²⁴Ni pekilwe mtxhanu wa kona ngu Vajudha. Se txikhati ni txikhati ni nga pekwa, va ni ningile magumi mararu a sisephu ni mtxhanu ni mune.

²⁵ Sikhati siraru ni nga kwapelwa ngu timhika, txikhati tximwetxo ni nga baliselwa ngu marigwi; kuraru ni nga theketwa ngu ngalava, ni fungate wusiku ni mitshikari ni di hagari ka linene.

²⁶ Ni mahile mapfhumba o tala. Ni manwi ngu tiphango ta tingi ta minambo, ni tiphango ta sigevenga, tiphango ta kumahwa ngu va ka kwathu, ni tiphango ta kuta ngu ka vamatiko, tiphango ta didhoropani, tiphango ta txiwulani, tiphango ta lineneni, tiphango ta kuvangwa ngu vanathu va makuhu.

²⁷Simwani kambe; mikaralo ni mithumo yo nemela, kupilela masiku amangi, nzala ni ditora, kuzumba ni si dyi txilo masiku amangi, pheho ni wusakato.

²⁸Hahanze ka timwani ti ni ti wombako, na karateka ditshiku ni ditshiku ngu mhaka ya kukhatalela otshe mabanza.

²⁹I mani a ku ni dikhodho, na ani ni si nga nado kani? I mani a khuvekiswako, na ani ni si pfi kupandiseka kani?

³⁰Ngako ti txi laveka ku ni txi ti dhumisa, ni na ti dhumisa ngu dikhodho dangu.

³¹Txizimu ni Tate wa Mkoma Jesu Kristu, txi dhumisekako kala kupinduka, txa tiziva ti to kha ni wombi makuhu:

³² Aniya Dhamasku, awule a nga ti fuma hahatshi ka mfumeli Aretasi, a to veka vawoneleli ha txidingeni ka didhoropa da Dhamasku, kasiku ve ni ñola.

³³Aniko ni to khonelwa mu ka txirundu, ve ni txiritela ngu difasitela da diguma, se ni txi hulukisa toneto ka manza akwe.