Read chopi 2 Vakorinto 12 Bible Online

2 Vakorinto 12 - chopi bible

2 Vakorinto 12

¹Ta laveka ku ti dhumisa, hambiko ti si faneliko, aniko ni na womba mhaka ya siwoniso ni situletelo sa Mkoma.

²Na m'ziva m'thu wa ka Kristu, awu a nga hukwa a txi yiswa ka nzuma ya wuraru, se kupindile malembe a digumi ni mune ti di mahekile (mwendo a ti ti mmidini kwakwe, mwendo a ti ti hahanze ka wona, kha ni swi ni txi tiziva, ti ziwa ngu Txizimu.)

³Na tiziva ti to m'thu wa kona (mwendo a ti ti mmidini kwakwe, mwendo a ti si nga ka wona, kha ni tizivi, ti ziwa ngu Txizimu),

⁴a to hukwa e yiswa paradhisini, a txi engisa mapswi awa ma si wombekiko, aawa m'thu asi tumetiswiko ku ma womba.

⁵Ni na ti dhumisa ngu m'thu wo nga toneto; aniko ani ngu kwangu, kha ni nga ni mhaka ya ku ti dhumisa ngu yona hahanze ka kutandeka kwangu,

⁶Idiku no lava ku ti dhumisa keyo mhaka, i ti si nga wuphuphulu, i ti ka so va ditshuri. Aniko kha ni na ku ti dhumisa, nguko mmwani a nga thuka a txi pimisa ngu ngani ati ti ku txitimwi ngutu kupinda ti a ti wonako, mwendo ti a ti engisako ngu ngani.

⁷Ni woni siwoniso so xamalisa ngutu; se kasiku ni si ti dhumisi, ni vekilwe m'pa ha mmidini kwangu, i ku txirumwa txa Sathani, atxi txi ni peketelako, kufela ku ni si ti guleti.

⁸Ni kombete kuraru ka Mkoma ti to a txi ni thavisa m'pa wuwa;

⁹aniko, ene a ni gete ku khene: “Kateko yangu yi ku enelete. Nguko, mtamo wangu wu tikomba ngu kuhetiseka ahawa ku ku ni kutandeka.” Ngu toneto, ani ni dhunda ku ti dhumisa ngu kutandeka kwangu, kasiku ni na mana kuvhunwa ngu mtamo wa Kristu.

¹⁰Ani na tsaka kutandekani kwangu, kurukwani kwangu, kupwatani kwangu, kunyenywani kwangu, kuxanisekani kwangu, ngu mhaka ya Kristu. Nguko, mbimo yi ni pfako kutandeka, nguyo mbimo ni ku ni mtamo.

¹¹Ni ti mahile diphuphulu! Anu nganu mi nga ni kurumeta kumaha eto. Anu nganu mi nga ti fanete ku ni dhumisa. Nguko, kuwalo ni txilo txa tximwetxo va nga ni pala ngu txona “Vapostolivo vawe va hombe.”

¹²Sikombiso sa wupostoli wangu si wonekisilwe kwanu, ngu kotshe kutimisela, ngu sikombiso, sidiwukiso, ni sixamaliso.

¹³Nji txani ma nga mi pala ngu txona mamwani Mabanza, hahanze ka mhaka ya kuva ani ni sa mi nemeta kani? Ni divaleleni txihoheto txiya!

¹⁴Konkuwa, ni ti emisete kutshumela ni ta kheyo da wuraru, kambe kha ni na mbi ta mi nemeta: Nguko, ani kha ni lavi sanu, aniko, ni lava anu mipune. Hi nga vanana ava va fanelako kusengeleta thomba yo siyela vatate vawe, aniko vatate ngu vona va fanelako kusengeleta thomba yo siyela vanana.

¹⁵Ani ngu kuranda kwangu, ni na ningela sotshe sangu, hambi ani nipune ni na ti ningela, kasi kuvhuna mimoya yanu. Ina li na hunguka lirando li ni randwako ngu lona ngu mhaka ya ku mi randa anu kani?

¹⁶Ina, ngu ditshuri ani kha na mi nemeta; aniko ngako ni ku m'thu wa marindi, kha kuwomba kwanu, ni to mi kanganyisa,

¹⁷ina ni mi dyelete ngu wammweyo ka vale ni nga va rumela kwanu kani?

¹⁸Ni kombete Titosi kufela ku a txi ta kheyo kwanu, ni txi m'rumela kumweko ni mmwani mwanathu. Ina Titosi a mi dyelete kani? Ina ani ni nene kha hi tsimbili ngu moya wumwewo kani? Ina kha hi tsimbili ngu tsimbilelo yimweyo kani?

¹⁹Ina kale ni kale mi pimisa ti to ho lava kutitshurisa masoni kwanu kani? Hi nga tona. Hi womba-womba masoni ka Txizimu ngu ka Kristu, Totshe tiya, vo randeka ngutu, ti mahelwa kasi ku hi txi mi vhuna.

²⁰Ngu toneto, na thava ti to ngako ni txi ta, ni nata mi mana mi si nga ka ti ni ti randako, na nanu mi txi ta ni mana ni di ka ti mi si ti laviko. Na thava ti to hagari kwanu ku txi va ni mazunga, kuvengelana, kuhenyelana, wukhuxu, kurukana, kulumbetana, kutikukumukisa, vhilinganya.

²¹Na thava ti to mbimo yi ni no tshumela ni ta kheyo kwanu, Txizimu txi nata ni xowokisa ngu mhaka yanu, se ani ni txi dila ngu mhaka ya vale vavangi, va nga onha kale, va sinziko kuhunduluka ka wubihi, ka wugelegele ni ka manyala ya ti va nga ti maha.