Read chopi 2 Vakorinto 13 Bible Online

2 Vakorinto 13 - chopi bible

2 Vakorinto 13

¹ Adiya nda wuraru ni txi ta kheyo kwanu. Yotshe mhaka yi nata tsaniswa ngu wufakazi wa vathu vambidi mwendo vararu.

²Ni mi gete kukhatani, se nga ti ni nga wombisa tona ka dipfhumba dangu da wumbidi, na engeta ni womba aku ni ku kule, ka vale va nga onha kale ni ka votshe vamwani: Ni txi tshumela ni ta, kha ni na mbi ta va ni divalelo,

³nguko mi lava txikombiso txa ti to Kristu a womba-womba ngu ngani. Ene kha nga ni dikhodho, ngako a txi thuma hagari kwanu, aniko mtamo wakwe wu tikomba kwanu.

⁴Ngu ditshuri, a gogotetwe ha txihambanoni a di ni dikhodho, aniko wa hanya ngu mtamo wa Txizimu. Nanathu hi ni dikhodho kwakwe, aniko hi na hanya kumweko nayo ngu mtamo wa Txizimu hagari kwanu.

⁵Ti xoleni mipune, kufela kuwona ti to mi tsani kukholwani; yanani masoni ngu ku ti xola. Mwendo mo va mi si ti zivi ti to Jesu Kristu waho kwanu kani? Ahanti mwendo mi to koneka.

⁶Aniko na themba, mi na tiziva ti to athu kha ha koneka.

⁷Se, na mi kombelela ka Txizimu ti to mi si mahi kubiha, kuxuva kwathu hi nga kutikomba kota nga va va nga sikota, aniko hi xuva ti to anu mi maha ta tinene, hambi hi txi woneka nga hi vatandeki.

⁸Nguko, kha hi na mtamo wo lwa ni ditshuri, aniko hi ema ni dona ditshuri.

⁹Athu ha tsaka ngako hi di va dikhodho, kasi anu mi di va mtamo. Ati hi mi kombelako ngu tona ngu ti to mi va vo hetiseka.

¹⁰Ni mi bhalela timhaka tiya ni di kule, kufela ku, mbimo yi ni no hoka kheyo, ni si ta thumisa tshofu, madingano ni mtamo wu ni nga ningwa ngu MKOMA, kasi kuaka i si nga kukhundumusa.

¹¹Magwito ka totshe, vanathu, zumbani mi di tsakile, khutalani ngu kumaha wunene, tsanisanani mi txi va ni kualakanya kumweko, mi txi hanya ngu kudikha. Txizimu txa lirando ni txa kudikha txi na va ni nanu.

¹²Losanani ngu kupswopswana ko sawuleka. Va mi dingula votshe Vasawuleki.

¹³Kateko ya Mkoma Jesu Kristu, ni lirando la Txizimu, ni kutshangana ka Moya wo Sawuleka, si nave ni nanu motshenu.