Read chopi 2 Vakorinto 3 Bible Online

2 Vakorinto 3 - chopi bible

2 Vakorinto 3

¹Ina hi na tshumela hi khata kutiemela kani? Ina ma laveka kwathu, kufana ni ka vamwanyani, mapapilo a ku hi emela masoni kwanu kani? Mwendo mapapilo a ku hi emela ma txi bhalwa ngu nganu kani?

²Anu mi dipapilo dathu, adi di nga bhalwa timbiluni kwathu, kasiku di txi ziwa ni kugondwa ngu votshe vathu.

³Nguko ti ha kubasani ti to Kristu ngene a nga bhala dipapilo ni ku di rumela ngu ngathu. Dona kha da bhalwa ngu tinta, aniko di bhatwe ngu moya wa Txizimu txi txi hanyako; i si nga ka sileti sa marigwi, aniko di bhatwe timbiluni ka vathu.

⁴Hi womba tiya nguko, hi ni kuthemba ka Txizimu, ngu Kristu.

⁵Hi nga ti to athu hipune, hi nga sikota kumana mialakanyo ya txilo, nga ya kukhukhela mtamoni kwathu. Ahim-him. Mtamo wathu wuta ngu ka Txizimu.

⁶Txona ngu txona txi nga hi ninga mtamo wa kuthumela Txitumelelano txa Txiphya, i ku txa moya, i si nga ngu mlayo wa kubhalwa nguko mlayo wa kubhalwa wa daya, kasi wona moya wu ninga wutomi.

⁷ Mthumo wa lifo, wu i ku mlayo wu wu nga bhalwa ha marigwini wu di ni kuphatima ka hombe, ku ku nga ti hanza vanana va ka Israyeli, aha koza va si sikoti kuwonetela khohe ya Mosi, ngu mhaka ya kuphatima ka khohe yakwe, hambiko i nga ti kuphatima ku kupindako,

⁸ngutu-ngutu mthumo wa moya wu ni kuphatima ku kupindisako.

⁹Nguko ngako mthumo wa mlayo wu wu yisako kukonekani wu di ni kuphatima ka hombe, ngutu-ngutu mthumo wa mlayo wu wu yisako kululamani wu ni kuphatima ko pindisa.

¹⁰Kha ditshuri, kuphatima ku ku nga vaho, kha kuswi ku di ni lisima ngako ku txi dinganiswa, ni kuphatima ku kupindisako ngutu.

¹¹Nguko ngako asi si pindako si di tile ngu kuphatima, si na phatima ngutu-ngutu asile si si gumiko.

¹²Ngu kota ya kuthemba ko ngeto, hi womba-womba hi di tsani msana.

¹³Kha hi mahi ku nga Mosi, awu a nga ti fenengeta khohe ngu nguwo, ya txitsivelo kasiku vanana va ka Israyeli va si sikoti kuwona magwito asi si pindako.

¹⁴ Aniko, mapimo awe ma to thelwa mphume. Hambi ni nyamsi, mbimo yi va gondako dibhuku da Txitumelelano txa kale, nguwoyo ya txitsivelo yi ngadi zumbile; yona yi thaviswa ngu Kristu dwe.

¹⁵Ina, kala ni nyamsi, ngako ku txi gondwa timhaka ta Mosi; nguwoyo ya txitsivelo yi ngadi zumbile timbiluni kwawe.

¹⁶ Ngako va di hundulukile ve wuya ka Mkoma, ngu kona nguwo yile ya txitsivelo yi thaviswako.

¹⁷Mkoma i Moya, se aha ku ku ni moya wa Mkoma, kuho kutxhatxheka.

¹⁸Athu hotshethu hi wonako kuphatima ka Mkoma ngu maso o mbi fenengetwa, hi txi wonekisa kuphatima ka Mkoma kufana ni txibuko, hi txi hunduluswa hi fana nayo, hi longoloka ngu kuphatima kumweko ni kwakwe, aku ku engetelwako ngu mtamo wakwe Mkoma, i ku Moya.