Read chopi 2 Vakorinto 4 Bible Online

2 Vakorinto 4 - chopi bible

2 Vakorinto 4

¹Ngu toneto, aku hi ku ni mthumo wu hi nga ningwa ngu wumbilu wa Txizimu, kha hi gumi mtamo.

²Athu hi lekile matsimbilelo o sisala ni a tingana, se kha hi tsimbili ngu marindi, kambe kha hi timeti dipswi da Txizimu; aniko ngu kuhumisa ditshuri ha kubasani, hi txi khutala ngu kuva hi maneka hi di thembekile masoni ka livhalo la votshe vathu ni masoni ka Txizimu.

³Aniko, ngako Evhangeli yathu yi di sisilwe, yi sisetwe vale va lovako.

⁴Ngu vona vale va si kholwiko, ava Txizimu txo biha txa ha mafuni txi nga va maha mabhofu mapimoni kwawe, kasiku va si woni liwoningo la Evhangeli ya wudhumo wa Kristu, awu i ku txifananiso txa Txizimu.

⁵Nguko kha hi ti wombeli athu ngu wutumbu, aniko hi womba ti taku Jesu Kristu ngene i ku Mkoma. I di athu, hi sithumi sanu ngu mhaka ya Jesu.

⁶ Txizimu txi txi nga womba ti to ku na tumbuluke liwoningo mu ka txidema, ngu txona txi nga woninga timbilu tathu, kasiku nanathu hi txi woninga vathu ngu wuzivi wa kuphatima ka Txizimu, aku ku wonekako ka Kristu.

⁷Aniko, thomba yi hi ku nayo, yi vekilwe mu ka siya sa dibumba, kasiku ti txi zivaneka ti to mtamo wuwa wa hombe wuta ngu ka Txizimu, kha wu ti ngu kwathu.

⁸Ka otshe makhalo ha kamwa ngu sixaniso, aniko, kha hi gumi mtamo. Ha kana-kana, aniko, kha hi rereki.

⁹Ha xuphwa, aniko, kha hi tshotshi likholo lathu. Ha vengelwa, aniko, kha hi fuviswi;

¹⁰txotshe txikhati hi rwate lifo la Jesu ha mmidi kwathu, kasiku wutomi wa Kristu ni wona wu txi tikomba ha mmidi kwathu.

¹¹Athu hi ku ngadi hi txi hanya, yotshe mbimo ha ningelwa kudawani, ngu mhaka ya lirando la Kristu, kasiku wutomi wakwe Jesu wu txi ti kombisa kambe ka mmidi wathu wu wu fako.

¹²Ngu toneto, lifo li thuma kwathu, aniko wutomi wu thuma kwanu.

¹³ Nguko, hi di ni moya wumwewo wa kukholwa, kufana ni ti ti nga bhalwa va txi kha vona: “Ani ni khotwe, ngu toneto ni wombawombile,” nanathu ha kholwa, se ngu toneto, ha womba-womba,

¹⁴nguko ha tiziva ti to awule a nga wusa Mkoma Jesu ngu ka vofa, nanathu a na hi wusa nayo, a txi ya hi kombekisa masoni kwakwe, kumweko ni nanu.

¹⁵Totshelele tiya ti mahilwe ngu mhaka yanu, kasiku kateko ya Txizimu yi txi manela vathu vavangi; se vona ve ninga mibongo yayingi, kasi ku txi na dhumiswa Txizimu.

¹⁶Ngu toneto, kha hi gumi mtamo. Hambi mmidi wathu ngu ha hanze wu txi maha wo onheka, kambe ngu mndani wu hinduka wu txi maha wa wuphya ditshiku ni ditshiku.

¹⁷Kuxaniseka kuwa kwathu ko hehuka, i ku ka mbimwanyana ya yidotho, ku hi longisela thomba ya hombe ya wudhumo wu wu si gumiko, ayi yi pindako kotshe kualakanya ka m'thu.

¹⁸Kha hi nga ni mhaka ni si si wonekako, aniko hi ni mhaka ni si si si wonekiko, nguko asi si wonekako sa pinda, kasi asi si si wonekiko kha si na magwito.