Read chopi 2 Vakorinto 5 Bible Online

2 Vakorinto 5 - chopi bible

2 Vakorinto 5

¹Athu hotshethu, ha tiziva ti to mbimo yi wu no hasulwa mdhute wuwa hi hanyako ka wona ahawa ha mafuni, hi ni nyumba nzumani, yo akwa ngu manza a Txizimu, nyumba yo tsana ko mbi na magwito, ayi yi nga mbi mahwa ngu manza a m'thu.

²Ngu toneto, ha vilela hi txi navela kuwulela ka nyumba yathu ya niya nzumani,

³kasiku hi di mndani ka yona hi si ti pfi hi sa ambala txilo.

⁴Nguko hi di ngadi mdhuteni muwa, i ku mmidi wathu, ha vilela ngu kunemelwa, na i si nga ti to ho lava kuhuma ka mmidi wathu wa ha mafuni: Aniko hi lava ti to hi txi ambekwa mmidi wathu wa nzumani, kasiku asi si fako si na mitwa ngu kuhanya:

⁵Se awu a nga hi mahela tiya i Txizimu, i ku txona txi nga hi ninga txitsaniso txa Moya, txa si si tako.

⁶Ngu toneto, athu hi ni kuthemba yotshe mbimo. Ha tiziva ti to yotshe mbimo yi hi hanyako wutomi wa mmidi, hi maneka hi di kule ni Mkoma.

⁷Nguko, hi hanya ngu likholo i si nga ngu ku ti wona.

⁸Athu hi ku ni kuthemba, hi navela kuhuma ka mmidi wuwa hi txi ya zumba ni Mkoma.

⁹Ngu toneto, mwendo hi hafuhi, mwendo hi kule nayo, ha ti karata ngu kumaha mithumo ya ku mtsakisa.

¹⁰ Nguko hotshethu hi na ya ema hi txi thethiswa masoni ka Kristu, kasiku mmwani ni mmwani a txi amukela atxile txi m'fanelako, madingano ni wunene mwendo wubihi wu a nga wu maha, a di ngadi a txi hanya wutomi wa mmidi.

¹¹Ngu konaho, ngako hi zivako kuthisa ka Mkoma, ha khongotela ti to vathu ve kholwa ka Txizimu, txona txa tiziva kha kwati ati hi nga zumbisa tona, kambe na kholwa ti to ha zivaneka kha kwati ni kona livhaloni kwanu.

¹²Hi nga ti to ho tshumela hi txi ti dhumisa masoni kwanu, aniko hi lava ku mi ninga mbimo yo ti dhumisa anu ngu ngathu, kufela ku mi txi sikota kuangula ka vale va ti kulisako ngu sa hahanze i si nga ngu sa mbiluni.

¹³Ngako hi di xangile, hi xangela Txizimu; ani hi di ni mapimo amanene, hi nawo ngu kota yanu.

¹⁴Lirando la Kristu la hi kurumeta, ngako hi txi pimisa ti to m'thu wammweyo a fete votshe, se ti di ngeto, votshe va fite.

¹⁵Ene a fete votshe, kasiku votshe va va hanyako, va si swi va txi ti hanyela vona ngu txawe, aniko ve hanyela awule a nga va fela, a txi tshumela e wuka ka vakufa ngu kota yawe.

¹⁶Ngu toneto, kukhukhela konkuwa, awalo wu hi m'zivako ngu kuwona nyama yakwe. Hambi Kristu hi di m'zivisile toneto, kambe konkuwa hi nga tona ti hi m'zivisako tona.

¹⁷Ngu kumaha keto, awu a ku ka Kristu, njivangwa txa txiphya; sa kale se si pindile; sotshe si mahile sasiphya.

¹⁸Totsheto ti ta ngu ka Txizimu, atxi txi nga hi tshanganisa natxo ngu Kristu; txona txi hi ningile mthumo wa kutshanganisa vathu kumweko natxo.

¹⁹Eto tikomba ti Txizimu txi mahisako tona kasi kutshanganisa ditiko kumweko natxo ngu Kristu, na txi si na mhaka ngu minandu ya vathu; se txi hi ningile mthumo wuwa wa kutshanganisa vathu kumweko natxo.

²⁰Athu hi sirumwa sa Kristu, Txizimu ngu txona txi mi layako ngu ngathu. Ngu toneto, ha mi khongotela ngu ditina da Kristu: Kombelani divalelo ka Txizimu.

²¹Kristu kha ziva txionho, kambe Txizimu txi mmahile txionho ngu kota yathu, kasiku athu hi txi maha volulama masoni ka Txizimu ngu kota yakwe.