Read chopi 2 Vakorinto 6 Bible Online

2 Vakorinto 6 - chopi bible

2 Vakorinto 6

¹Se athu hi thumisanako ni Txizimu, ha mi khongotela kasi ku mi si amukeli walo kateko ya txona.

²Nguko, txona txi womba tiya: Ni ku engisile ngu mbimo ya yinene, kambe ni kuvhuni ngu ditshiku da kuhanyiswa. Ayiya ngu yona mbimo ya yinene, adiya ngu dona ditshiku da kuhanyiswa.

³Kha hi lavi kukhuvekisa m'thu ni wammweyo kufela ku mthumo wathu wu si solwi.

⁴Aniko, ka totshe hi dhunda kukombisa ti to hi sithumi sa Txizimu; ngu kutimisela ka hombe sikaratoni ni wusiwanani ni mu tiphangoni.

⁵ Ni mu ka kukwapwa, ni mu ku khotelwani, ni mu ka kulwiswani, ni mu kuthumiswani, ni mu kuwonelelani, ni mu kutitonani ka sakudya,

⁶ni mu kubasani ka mbilu, ngu kuziva, ngu kutimisela, ngu ka wunene, ngu ka Moya wo Sawuleka, ngu lirando lo mbi kanganyisa,

⁷ngu dipswi da ditshuri, ngu mtamo wa Txizimu, ngu matxhari a kululama hi ma ñolako ngu manza a txinene ni a txibhabha,

⁸amu kudhundwani ni mu kunyenywani, ka nduma ya yinene ni ka nduma yo biha, hi wonwa hi di vakanganyisi, kasi hi va ditshuri.

⁹Hi woniswa ku nga kha hi ziwi, kuve ha ziwa. Hi wonwa hi txi nga ho lava kufa, kasi ha hanya, ha tsayiswa, kambe kha hi dawi.

¹⁰Ho nga ho xaniswa, kuve ha tsaka yotshe mbimo. Hi wonwa nga hi sisiwana, kasi hi fumisa votala. Hi wonwa nga kha hi na txilo, kasi hi ni sotshe.

¹¹Hi womba-womba ni nanu, Vakorinto, hi di txhatxhekile, timbilu tathu ti tulekile kha kwati.

¹²Anu kha ma kamana timbiluni kwathu, aniko mi kamanile timbiluni kwanu.

¹³Ani ni womba-womba kwanu nga mi vanana vangu; ni tuleleni nanu timbilu tanu.

¹⁴Mi nga sungweni ha dikangeni kumweko ni va va si kholwiko. Nguko wusengeli muni wu kuho hagari ka kululama ni kubiha kani? Mwendo wusengeli muni wu kuho hagari ka liwoningo ni txidema kani?

¹⁵Ngu pfanana muni ku kuho hagari ka Kristu ni Sathani kani? Wusengeli muni wu kuho hagari ka wu a kholwako ni wu asi kholwiko kani?

¹⁶Ngu sengela muni ku kuho hagari ka dithepele da Txizimu ni sithombe sa sizimu sa makuhu kani? Nguko athu hi dithepele da Txizimu txi txi hanyako kota nga ti Txizimu txi nga kha txona: “Ni na zumba navo ni txi tsimbila hagari kwawe; ani ni na va Txizimu txawe; vona va na va i di vathu vangu.”

¹⁷Ngu toneto, “humani hagari kwawe, mi txi hambana navo. Mi nga gweseni txilo txo mbi basa, se ani ni na mi amukela, kuwomba Mkoma,”

¹⁸“Aniko ni na va Tate wanu, anu mi na va vanana vangu va mazambi ni vamahorana,” kuwomba Mkoma wa Mtamo wotshe.