Read chopi 2 Vakorinto 7 Bible Online

2 Vakorinto 7 - chopi bible

2 Vakorinto 7

¹Vo randeka ngutu, ngako hi ku ni sithembiso siya, he ti basiseni ka yotshe nzambwa ya mmidi ni ya moya, hi txi zama kuhetisa mthumo wa ku ti sawulekisa kwathu ngu txithavo ka Txizimu.

²Hi amukeleni timbiluni kwanu; kha ha onhela m'thu, kha ha bihisa m'thu, kha ha dyelela m'thu.

³Kha ni wombi tiya kufela ku mi konisela, nguko ni ti wombile ni kukhatani, ti taku mi ho mu timbiluni kwathu, kasiku hi hanya hotshe ni kufa hotshe.

⁴Na mi themba ngutu ta tinene, na ti guleta ngutu ngu nganu, ni tate ngu kuthavelelwa, ni tate ngu litsako ka sotshe sixaniso sathu.

⁵ Nguko, txima hi bwaka Makedhoniya, mmidi wathu kha wu zivi kuhumula ni ka kudotho. Hi mani sixaniso ka otshe makhalo; hahanze, hi mani mazunga, mndani hi mani kudhukiselwa.

⁶Aniko Txizimu txi txi thavelelako va va ti vekako hahatshi ka txona, txi hi thavelete ngu kubwaka ka Titosi,

⁷i si nga ngu kubwaka dwe, aniko ngu thavelelo yi a nga yi amukela kwanu. Ene a hi xawutete kunavela kwanu ka hombe, kudila kwanu, ni ku ni gonga kwanu. Se atiya ti ni tsakisile ngutu.

⁸Nguko, hambi ni di mi pandisile ngu dipapilo dangu, kha ni ngadi ni ti sola, ngu tona; nguko hambi ni di ti sote kukhatani, ngu ku ti wona ti to dipapilodo di mi pandisile ka mbimo ya yidotho,

⁹konkuwa na tsaka, na i si nga ngu ku ni nga mi mahela mhaka ya kupandisa, aniko ngu ti to kupandiseka kwanu ku mi wuyisete hunduluko; nguko mi pandisekile madingano ni kuranda ka Txizimu. Nguko, konaho kha ma mwalalelwa ngu txilo ngu mhaka yathu.

¹⁰Nguko, kupandiseka kuwa, madingano ni kuranda ka Txizimu, kuvanga kuhunduluka ku ku yisako kuhanyiswani; kha ku ningi kutshumelela msana. Aniko kupandiseka madingano ni kuranda ka mafu, kuvanga lifo.

¹¹Aniko, hingani wona mihando ya kupandiseka kwanu, madingano ni kuranda ka Txizimu; kukhutala ka kona! Kutilaya ka kona! Txithavo txa kona! Kuxuxa ka kona! Kukhatala ka kona! Kutsayisa ka kona! Mi kombisile ka totshe, ti to kha mi nga ni mnandu ka mhaka yiya.

¹²Ngu konaho, hambiko ni nga mi bhalela, kha na mi bhalela ngu mhaka ya wu a nga maha kubiha, hambi ni wu a nga onhelwa, aniko ni to mi bhalela kufela ku mi txi ziva lirando li ni mi randako ngu lona masoni ka Txizimu.

¹³Atiya ngu tona ti ti nga ni thavelela. Hahanze ka kuthavelela kuwa ka mmweyo ni mmweyo wathu, hi tsakile ngutu kambe ngu kuwona litsako la Titosi, awu moya wakwe wu nga humutwa ngu nganu motshe.

¹⁴Nguko, hambiko ni nga ti dhumisa kudotho ngu nganu, masoni ka Titosi, kha ta maneka to mi wisa tingana, kufana ni ku hi wombako ditshuri masoni kwanu, ngu toneto, ku ti dhumisa kwangu ngu nganu masoni ka Titosi ku manekile i di ditshuri.

¹⁵Ene a ngadi a txi mi dhunda ngutu ngako a txi alakanya kuengisisa kwanu, ni ti mi nga mu amukelisa tona ngu txithavo ni kudhudhumela.

¹⁶Na tsaka, nguko na mi themba ka totshe.