Read chopi Vagalatiya 1 Bible Online

Vagalatiya 1 - chopi bible

Vagalatiya 1

¹Ani Paulo, ni ku mpostoli, i si nga wa kusawulwa ngu vathu mwendo wa kurumwa ngu m'thu, aniko ni ku wa kurumwa ngu Jesu Kristu ni Txizimu Tate, atxi txi nga mu wusa ngu ka vakufa,

²kumweko ni vanathu ava ni ku navo, ni bhalela mabanza a Galatiya.

³Makatekwa ni kudikha si nave ni nanu, si txi huma ngu ka Txizimu Tate wathu, ni ka Mkoma Wathu Jesu Kristu,

⁴awu a nga ti ningela ngu mhaka ya sionho sathu, kufela ku hi hulukisa ka nyango yiya yo biha, ya masiku awa, madingano ni kuranda ka txona Txizimu Tate wathu.

⁵Wudhumo wu nave ka Txizimu, yotshe mbimo. Amen!

⁶Na xamala, ti to mi kuluvetile ngutu kuhambana ni wule a nga mi dhanela makatekwa a Kristu, mi txi ya ka yimwani Evhangeli.

⁷Kha yi nga ho yimwani Evhangeli. Atxi txi kuho ngu vale va vhinganyiselako mapimo anu, va zamako kusoholota Evhangeli ya Kristu.

⁸Aniko, ngako m'thu wokari a txi mi txhumayela Evhangeli yo hambana, hambi i di athu hipune mwendo ngelozi ya nzumani, hahanze ka yile Evhangeli hi nga mi txhumayela yona, eyo m'thu a na ruketelwe.

⁹Hi wombile ngu kale, kambe ani na tshumela ni womba: Ngako m'thu wokari a txi mi gondisa Evhangeli yimwani, hahanze ka yile mi nga yi amukela, a na ruketelwe.

¹⁰Ina no lava kudhumiswa ngu m'thu kani, mwendo kudhumiswa ngu Txizimu, kani? Mwendo no lava kutsakisa vathu kani? Idiku ni ngadi ni txi dhunda kutsakisa vathu, nga ni si fanekelwi ngu kuthumela Kristu.

¹¹Na mi zivisa, vanathu, ti to Evhangeli yi yi nga txhumayelwa ngu ngani, hi nga ya kuhuma ngu ka vathu.

¹²Nguko ani kha na yi amukela ka m'thu, hambi kugondiswa ngu m'thu, aniko ni to yi mana ngu kutulelwa ngu Jesu Kristu.

¹³ Kha ditshuri, mi ti engisile ati ni nga ti ti hanyisa tona kale, ta wujudha, ni tshofu yo pindisa, ya ti ni nga ti xanisisa tona Dibanza da Txizimu ni kulava ku di fuvisa.

¹⁴Amu ka txijudha ni ti va pala vavangi va tanga yangu, ni va lihunzu la ka kwathu, ditikoni kwathu, ngu kukhutalela ngutu milayo ya txikale ya vatate vathu.

¹⁵ Aniko mbimo yi Txizimu txi nga ni sawula, ni di ngadi mndani ka mama, txi ni dhana ngu kateko ya txona,

¹⁶mbimo yoneyo ti nga tsakisa Txizimu ku ni tulela kuziva Mwanana wa txona, kasiku ni mpfalisa hagari ka vamatiko, kha na wotisa m'thu,

¹⁷kambe kha na kwela ni ya Jerusalema ka vale va nga ni thangela amu ka wupostoli, aniko ni to tsula Arabhiya ni tshumela ni wuya Dhamasku.

¹⁸ Msana keto, ma di pindile malembe mararu, ni to kwela ni ya Jerusalema, kasi kuya wonana ni Khefasi, awu ni nga ya fungala nayo digumi da masiku ni mtxhanu.

¹⁹Kha na wonana ni mmwani mpostoli, hahanze ka Jakobe mwanawe Mkoma.

²⁰Ati ni mi bhalelako, ni ti womba ni di masoni ka Txizimu, hi nga makuhu.

²¹Msana ka toneto, ni to tsula ka maphambo a Siriya ni Kilikiya.

²²Mabanza a Kristu ma ku Judheya ma ti sanzi ku ni wona ngu maso.

²³Va ti ko engisa ti txi wombwa dwe taku: “Awule a nga ti hi xanisa kale, konkuwa se wa txhumayela timhaka ta likholo li a nga ti ti zama ku li fuvisa.”

²⁴Se vona va ti dhumisa Txizimu ngu kota yangu.