Read chopi Vagalatiya 2 Bible Online

Vagalatiya 2 - chopi bible

Vagalatiya 2

¹ Msana ka digumi da malembe ni mune, ni tshumete ni kwela ni ya Jerusalema, kumweko ni Bharnabhasi, ni txi teka kambe ni nene Titosi.

²Ni kwete ni txi ya kona ngu kutulelwa ngu Txizimu. Ni xawutete masoni kwawe Evhangeli yi ni txhumayelako ka vamatiko; ni wonani navo ngu phuho avale i ku vathangeli va hombe, ni txi va xawutela ni vona, ngu kuthava ti to ni nga tutuma mwendo ni nga va ni di tutumile mahala.

³Aniko hambi Titosi, a nga ti kumweko ni nani, ene i nga ti Mugriki, kha kurumetwa kuyiswa wukwerani;

⁴mhaka yiya yi wusilwe ngu va va ti wombako ku mbanathu, na kasi makuhu; evo va ti ko txholovela hagari kwathu ngu kukanganyisa, kasi kumbwingamela kuwona wuthuseki wathu, awu wu tako ngu ka Kristu Jesu, kufela kuve tshumela ve hi wuleta wukhumbini.

⁵Kambe athu kha ha tumela kutiveka hahatshi kwawe, hambi ngu txikhatianyana, kasiku ditshuri da Evhangeli di txi zumba di di tsani kwanu.

⁶Se ngu didhawa da vale va nga ti woneka nga vathangeli va kona, mwendo kambe i ti si nga vona, kha ni nga ni mhaka nato: Txizimu kha txi yi ngu khohe ya m'thu vonavo kha va nga ni kurumeta kuengetela txilo.

⁷Aniko vona va to ti wona ti to ani ni ningilwe kutxhumayela Evhangeli ka va vo mbi yiswa wukwerani, kufana ni Pedro nene a nga ningwa mthumo wo txhumayela Evhangeli ka va va fumwako ngu mlayo wa wukwera.

⁸Nguko awule a nga ninga Pedro mtamo wa kuthumela ava va wukwera, anani a ni ningile mtamo wa kuthumela ava i ku si nga va wukwera.

⁹Ngu kuziva yona kateko yi ni nga ningwa, Jakobe ni Khefasi ni Johani ava va ziwako kota tisika ta dibanza, va hi losile ngu ku hi ninga manza a txinene, ani ni Bharnabhasi, ngu txikombiso txa kusengela kwathu navo, kasi athu hi txi ya txhumayela vamatiko, na vona veya txhumayela va wukwera.

¹⁰Va to hi leleta dwe, ti to hi txi alakanya sisiwana; atiya ngu tona ti nani ni nga ti ti pandisekela ku ti maha.

¹¹Aniko, mbimo yi Khefasi a nga ta Antiyokiya, ni tsani ni txi m'konama khohe ni khohe, nguko a ti ti fanela kukawukwa.

¹²Nguko mbimo yi va nga ti sinzi kubwaka ava va kuta ngu ka Jakobe, ene a ti ti dya kumweko ni va vo mbi ya wukwerani. Kambe mbimo yi vona va nga bwaka, a ti ti leka kudya navo, ngu kuthava va va wukwera.

¹³Vamwani Vajudha va to wulelelwa ngu wukanganyisi wakwe, ahawa koza Bharnabhasi nene e ndindwa ngu wona wukanganyisiwo.

¹⁴Kambe mbimo yi ni nga ti wona ti to se kha va tsimbili ngu nzila yo lulama, madingano ni ditshuri da Evhangeli, ni gete Khefasi masoni ka votshe vathu, ni txi khani: “Ngako awe u ku Mujudha u hanyisako ku nga wa matiko, u si hanyisiko txijudha, u na sikotisa kutxani kukurumeta vamatiko kuve hanyisa txijudha, kani?”

¹⁵Athu hi sivelekwa sa Vajudha, kha hi nga sionhi sa vamatiko.

¹⁶ Ha tiziva ti to m'thu kha sikoti kumana wululami ngu mhaka ya mithumo ya Mlayo, aniko a mana wululami ngu mtamo wa likholo dwe ka Jesu Kristu; nanathu hi khotwe ka Jesu Kristu, kasiku hi mana wululami ngu likholo ka Kristu, i si nga ngu mithumo ya Mlayo; nguko ni wammweyo kha na mbi mana wululami ngu mhaka ya mithumo ya Mlayo.

¹⁷Se, ngako athu hi lavako kumana wululami ngu ka Kristu, hi txi maneka hi di vaonhi, tikomba ti to Kristu ina i muemeli wa txionho kani? Lambi!

¹⁸Ngako ni txi tshumela ni txi aka atxiya ni nga txi khundumusela, tikomba ti to na tipfa mnandu.

¹⁹Kunene, ani ngu mhaka ya Mlayo, ni fite ka wona kasiku ni hanyela Txizimu. Ni bethetwe ha txihambanoni kumweko ni Kristu.

²⁰Ngu toneto, hi nga ngadi ani ni hanyako, aniko i Kristu a hanyako kwangu. Konkuwa, ni txi hanya wutomi wa mmidi, ni hanya ngu kukholwa ka Mwanana wa Txizimu, awu a nga ni randa, a txi ti ningela ngu ngani.

²¹Ani kha ni thavisi lisima la kateko ya Txizimu; nguko idiku ni mana wululami ngu mtamo wa Mlayo, lifo la Kristu li ndi nava la mahala.