Read chopi Vagalatiya 4 Bible Online

Vagalatiya 4 - chopi bible

Vagalatiya 4

¹Se konkuwa ani na womba ku khani: Wu i ku txidya-thomba kungako i di ngadi m'dotho, kha hambani ni wu i ku txithumi, hambiko i ku nyane wa thomba yotshe.

²A na zumba hahatshi ka va va m'xayisako ni vawoneleti va thomba yakwe, kala kuhoka ditshiku di di nga sikelwa ngu tate wakwe.

³Mbimo yi hi nga ti sinzi kukula, moyani, nathu hi ti ti fana ni sithumi, hi fumwa ngu sa ha mafuni hawa.

⁴Mbimo yi txi nga hoka txikhati txa kona, Txizimu txi rumete Mwanana wa txona, a nga velekwa ngu wamsikati, a nga tumela kufumwa ngu Mlayo,

⁵ kufela kutirula avale va nga ti hahatshi ka Mlayo, ti to ni nathu hi mana kumaha vanana va Txizimu.

⁶Se ngako mi ku vanana, Txizimu txi rumete timbiluni kwanu Moya wa Mwanana wa txona, awuwa wu kwangulako wutxi: “Abba, Tata!”

⁷Ngu mhaka yeto, khuswi u di txithumi, aniko u mwanana. Ngako u ku mwanana, u txidya-thomba ngu kateko ya Txizimu.

⁸Kambe, kale ngu ku ambi ziva Txizimu txa ditshuri, mi khozete sizimu so va i si nga sa txilo.

⁹Aniko konkuwa, ngako mi txi zivako Txizimu, mwendo, ngu mawombelo a txhuko, ngako mi ziwako ngu Txizimu, ti mahisa kutxani kutshumela kambe mi ya ka sa ku ambi na mtamo ni sa wusiwana, mi lava ku ti maha sithumi sa sona kani?

¹⁰Ma vekisa kha kwati masiku ni mitxima ni tinguva ni malembe.

¹¹Na thava ti to na nda va ni di timisete mikaralo ngu nganu mahala.

¹²Na mi khongotela, vanathu, ti to mi fana ni nani, kufana ni kuwa nani ni nga phinduka ni txi fanana ni nanu. Kha ma ni onhela ngu ta txilo.

¹³Ma tiziva ta tinene ti to malwati ma nga ni ninga mbimo ya kuta khata ku mi txhumayela Evhangeli.

¹⁴Kambe anu kha ma komba ku ni nyenya mwendo ku ni vengela, hambiko malwati angu i nga ti txiduko kwanu; aniko mi ni amukete kota mtumi wa Txizimu, kota nga Jesu Kristu apune.

¹⁵Se konkuwa ku hanini kutsaka kwanu kani? Nguko ni nga mi mahela wufakazi wa tito, idiku i ti kale kwanu, hambi maso anu nga mi di ma xokote mi txi ni ninga.

¹⁶Se konkuwa ni phindukile ni txi maha mlala kwanu, nguko ni nga mi gela ditshuri kani?

¹⁷Vathu vale vamwani va mi khutalelako, kukhutala ku va ku nako ngu nganu, hi nga ka ditshuri; ati va lavako tona ngu ku mi hambanisa ni nani, kasiku anu mi khutalela vona.

¹⁸Aniko ati i ku tona, khutalelani wunene yotshe mbimo, mi nga maheni wunene ngu kuva ni di hafuhi ni nanu dwe.

¹⁹Vanavangu, na pandiseka ta tinene ngu nganu, kufana ni wamsikati wu a lumwako ngu kulava kuhefemula, kala kuza txiemo txa Kristu txi woneka hagari kwanu.

²⁰Ni ti navela kumaneka ni di konkheyo kwanu, kasi kuwombawomba ni nanu ngu yimwani nzila, nguko kha ditshuri na karateka ngu nganu.

²¹Anu mi lavako kufumwa ngu Mlayo, hingani ni gela, mwendo ma tiziva ti Mlayo wu wombako tona kani?

²² Nguko Mlayoni kubhatwe ti to Abrahamu a velekile vanana vambidi va mazambi; mmweyo a velekile ni msikati wu i nga ti khumbi, mmwani a velekile ni msikati wu wo tekana nayo, i nga ti si nga khumbi.

²³Se mwanana wa wamsikati wule wa khumbi, a velekilwe ngu kuranda ka nyama, kasi mwanana wa wule wo tekwa a velekilwe ngu mhaka ya txithembiso.

²⁴Ahawa ku ni txidinganiso; vavasikati vava, kunene, nzitumelelano sa simbidi: Txitumelelano txo khata ngu txi txi khukhelako Sinayi; ngu txi txi velekako vanana va wukhumbi: I Hagari.

²⁵Se Hagari i mmango wa Sinayi, ditikoni ka Arabhiya; ene njifananiso txa Jerusalema wa konkuwa, a manekako wukhumbini kumweko ni vanana vakwe.

²⁶Aniko Jerusalema wa nzumani, eyo a khululekile, ngene i ku mame wathu,

²⁷nguko ti bhatwe va txi kha vona: “Tsaka, awe txifule, awe u ku si nga ni vanana; peka mkulungwani wa litsako, awe u si ziviko kulumwa ka kuveleka; nguko mbavangi ngutu vanana va wule a nga lekwa, kupinda va wule a ku ni mwamna.”

²⁸Kasi anu, vanathu, kufana ni Isaake, nanu mi vanana va txithembiso.

²⁹Aniko, kufana ni txikhati txa kale awule wo velekwa ngu kuranda ka nyama a nga ti ti vengela wu a nga velekwa ngu Moya, i ngadi toneto kala ni nyamsi.

³⁰ Kambe mibhalo yi womba txani kani? Yi womba tito: “Tovela wamsikati wa khumbi ni mwanana wakwe, nguko mwanana wa khumbi, kha na mbi dya thomba kumweko ni mwanana wa wule wo tekwa.”

³¹Ngu toneto, vanathu, athu kha hi nga vanana va wule wa khumbi, aniko hi vanana va wule wo tekwa.