Read chopi Vagalatiya 5 Bible Online

Vagalatiya 5 - chopi bible

Vagalatiya 5

¹Kristu a hi txhatxhile kasiku hi zumba hi di txhatxhekile. Ngu toneto, zumbani mi di tsani, mi nga tumeleni kutshumela mi sungwa kambe ngu dijoke da wukhumbi.

²Ani Paulo ni khani kwanu: Ngako mi txi tumela kuyiswa wukwerani, Kristu kha na mbi mi vhuna txilo.

³Na engeta ni txi tsanisa ka votshe va va yako wukwerani ti to va fanela kuvekisa totshe ti Mlayo wu rumako tona.

⁴Mi ti hambanisile ni Kristu anu mi lavako kumahwa valulami masoni ka Txizimu ngu mhaka ya Mlayo, mi wete kule ni kateko ya Txizimu.

⁵I di athu, ha themba ti to Txizimu txi na hi maha valulami masoni ka txona ngu mtamo wa Moya wo Sawuleka wu thumako kwathu ngu konaho ka likholo.

⁶Nguko ka Jesu Kristu, wukwera hi nga wa txilo, hambi wukhutu ni wona hi nga txilo, hahanze ka likholo li li ti kombako ngu mithumo ya lirando.

⁷Mi ti tutuma kwati; se i mani a nga mi tsivela, kasiku mi si engisi ditshuri kani?

⁸Kutimetwa kuwa kwanu kha ku humi ngu ka Txizimu txi txi mi dhanako.

⁹ Mtshumbelo wa wudotho wa vilisa wurathi wotshe.

¹⁰Ani nina ni kuthemba ngu nganu, ka Mkoma tito, kha mi na mbi va ni yimwani mialakanyo yo hambana ni yangu. Aniko awule a mi vhinganyisako, a na rwala kuabaniswa kwakwe, hambi i di mani ni mani.

¹¹Se ngako ani, vanathu, ni di ngadi ni txi gondisa ta wukwera, ngu kutxani ni ku ngadi ni txi xaniswa kani? Nguko, ngako i di toneto, kutxhumayela kwangu ngu ta txihambano, nga ku si khuvekisi m'thu.

¹²Avale va phayako vhilinganya hagari kwanu va na ye hawa ko gwita ngu ku ti thena!

¹³Vanathu, anu mi dhanetwe ku ta hanya kutxhatxhekani. Ti di mahile eto, kukhululeka kwanu ku nga mi lundumise, mi txi fumwa ngu sa ha mafuni, aniko thumelanani ngu lirando.

¹⁴Nguko wotshe Mlayo wu tshanganiswa ka dipswi dimwedo, adi di ku: “Randa muakelani, nga ti u ti randisako tona.”

¹⁵Aniko, ngako mi txi lumana ni kukakatxulana, ti woneleni mi si fuvisani ngu txanu.

¹⁶Se ani na mi gela ni khani: Tumelani kutsimbitiswa ngu Moya, eho se kha mi na mbi maha minavelo ya nyama.

¹⁷ Nguko nyama yina ni minavelo yo hambana ni Moya; Moya ni wona wuna ni minavelo yo hambana ni nyama. Asiya sa simbidi sa bangana, kasiku mi si mahi kuranda kwanu.

¹⁸Aniko ngako mi txi tumela kutsimbitiswa ngu Moya, eho se kha mi fumwi ngu Mlayo.

¹⁹Mithumo ya mtumbuluko wa nyama ma yi ziva, ngu yiya: Wugelegele, mikhuwo ya nzambwa, ku ambi ti ñola;

²⁰kukhozela sizimu sa walo, wuloyi, livengo, maguwa, txiluse, txitsikivi, kukanetana, ku ambi engisana, mibango,

²¹kubavela, wudevi, limito, ni simwani so fana ni sona siya. Na mi alakanyisa, ngako ni khalako ni txi mi alakanyisa, tito: Ava va mahako to ngeto, kha va na mbi mana thomba ya Mfumo wa Txizimu.

²²Kasi mihando ya Moya ngu yiya: Lirando, litsako, kudikha, kutimisela, wunene, kutshambisa, kuthembeka,

²³kuthutha, kutipimela; kha wu nga ho mlayo wu wu tsimbisako siya.

²⁴Avale i ku va Kristu va bethete ha txihambanoni nyama ni wubihi wa yona ni minavelo ya yona.

²⁵Ngako hi nga ningwa wutomi ngu Moya, he maheni kuranda ka wona.

²⁶Hi nga ti guleteni, hi nga vhukaneni, hi nga vengelaneni.