Read chopi Vaefesu 4 Bible Online

Vaefesu 4 - chopi bible

Vaefesu 4

¹Na mi khongotela koko ani txibotxhwa txa Mkoma, ti to mi hanya ngu nzila yi yi fanelako wukholwa wu mi nga dhanelwa wona,

² ngu kotshe kutiveka hahatshi, ni kudikha, ni kuhonisela, mi divalelana ngu lirando,

³mi ti karata ngu kuveketa mpatano wa Moya, ngu kupfana ko dikha.

⁴Ku ni mmidi wumwewo ni moya wumwewo, kota nga ti i ku txithembo tximwetxo, atxiya nanu mi nga dhanelwa txona.

⁵Ku ni Mkoma mmweyo, likholo limwelo, txibhabhatiso tximwetxo,

⁶ku ni Txizimu tximwetxo, i ku Tate wa votshelele, a va fumako votshelele, a thumako ngu votshelele, a zumbako ka votshelele.

⁷Kambe mmweyo ni mmweyo kwathu a ningilwe kateko ngu mpimo wa txiningo txa Kristu,

⁸ nguko Mibhalo yi womba tiya: “Ditshiku di a nga txhatukela txitimwi, a tekile va va nga ti sungilwe e tsula navo, se e avela sihiwa ka vathu.”

⁹Ti womba txani ku: “A txhatukile eya txitimwi,” ngako i si nga ti to a thangile ngu kutxhika eya hahatshi ka mafu, kani?

¹⁰Awu a nga txhika ngeneyo a nga kwela txitimwi ka totshe tinzuma, kasi kuya tata nzuma ni mafu ngu wukoma wakwe.

¹¹Se ene ngene a nga ninga vamwani mthumo wa wupostoli, vamwani mthumo wa wuprofeti, vamwani mthumo wa wuvhangeli, vamwani mthumo wa wudyisi ni wugondisi,

¹²kasi kuvhuna vasawuleki, ti to ve sikota kuthumela vamwani, ve aka mmidi wa Kristu,

¹³kala kuza hotshe hi mana wumwewo wa likholo ni wuzivi wa kuhetiseka wa Mwanana wa Txizimu, ni wuthu wa kuhetiseka madingano ni mpimo wa txiemo txa kuhetiseka txa Kristu.

¹⁴Kasiku hi si swi hi maha vanana va va pengiswako ngu mavimbi, ve pepulwa ngu timoya ta gondo ya kukanganyisa ka vathu, ni marindi awe ma hi timetako.

¹⁵Kambe, ngako hi txi londetela ditshuri ngu lirando, hi na kula ka totshe ngu kulondisa awule i ku msungo, ene Kristu.

¹⁶ Ngu mtamo wakwe, sotshe sihango sa mmidi si ñolani ni kutsaniswa ta tinene ngu misiha yi yi nga vekwa ka sona. Ngu konaho, ngako txihango txihi ni txihi txi txi maha mthumo wa txona ngu fanelo, mmidi wotshe wa kula, wu txi ti aka ngu lirando.

¹⁷Ndiye mhaka yi ni mi gelako, na ni txi yi tsanisa ngu ditina da Mkoma: Mi nga tshumeleni kambe mi hanya nga vamatiko, avava va londetelako mipimiso yawe yo biha.

¹⁸Mialakanyo yawe yi mtemani, kha va nga ni txyavelo amu ka wutomi wa Txizimu, nguko kwawe kuwalo wuzivi, ni timbilu tawe ti bangi.

¹⁹Ngu mhaka ya wubhemba wawe, va ti ningetete ka mikhuwo ya manyala, kasiku ve maha totshe tixaka ta mithumo ya nzambwa, va si sikoti kutiñola.

²⁰Hi nga tona tiya anu mi nga gondisa txona kuziva Kristu;

²¹nguko timhaka takwe mi ti engisile, se akuwa mi ku vathu vakwe Jesu, mi gondisilwe ditshuri di di ku kwakwe,

²² di rumako kuleka mahanyelo a m'thu wa kale, a nga txi mi fuma kaleko, m'thu wu a nga xangiswa ngu minavelo yo kanganyisa.

²³Anu tumelani kuteka mahanyelo a m'thu wamphya moyani kwanu;

²⁴ mi txi londetela mahanyelo a m'thu wamphya, awu a nga vangwa e mahwa txifaniso txa Txizimu ngu wululami wa ditshuri ni wusawuleki wa ditshuri.

²⁵Ngu konaho, lekani makuhu mi txi womba ditshuri mmwani ni mmwani ka mkwawe, nguko hotshethu hi sihango sa mmidi wumwewo.

²⁶ Ngako mi txi henya, mi nga onheni; ditambo di nga swe mi di ngadi henyile.

²⁷Mi nga mningeni mbimo Sathani.

²⁸Awu a nga ti hanya ngu kupa, a nge ngadi e pa, aniko a na ti thumele ngu manza akwe, e maha ti i ku ta tinene, kasiku e mana sa kuabana ni wu a ku si nga naso.

²⁹Di nga thuke di huma dipswi da tingana ngu sisofuni kwanu, aniko ku na hume dipswi da dinene, adi di akisako, ni kuninga makatekwa vale va di engisako;

³⁰mi nga henyiseni Moya wo Sawuleka wa Txizimu, awu mi nga vekelwa ngu wona txixambanyo txa kukomba ti to mi lumba Txizimu ka ditshiku diya txona txi nota mi tirula ngu dona ka magwito.

³¹Totshe ti i ku ta mabava, kuhenya, txitsikivi, maguwa ni kuruka, sotsheso si na fuve hagari kwanu, kufana ni lotshe lixaka la wubihi.

³² Zumbani mi di vavanene, mi txi pfelana wumbilu. Divalelanani kufana ni kuwa Txizimu ni txona txi nga mi divalela ngu ka Kristu.