Read chopi Vafilipiya 1 Bible Online

Vafilipiya 1 - chopi bible

Vafilipiya 1

¹ Paulo ni Timoti, sithumi sa Jesu Kristu, hi bhalela va va nga sawuleka ngu ka Kristu Jesu, va ku Filipiya, kumweko ni vabhixopo ni vadhiyakoni vawe.

²Kateko ni kudikha si nave ni nanu si txi huma ngu ka Txizimu, Tate wathu, ni ka Mkoma wathu Jesu Kristu.

³Na bonga ka Txizimu txangu ka txikhati txihi ni txihi ni mi alakanyako.

⁴Yotshe mbimo, ka mikombelo yangu, na mi khongelela motshenu ngu kutsaka,

⁵ni txi khumbula txivhuno txi mi nga txi maha ka mhaka ya kuhangalasa Evhangeli, kukhukhela ka ditshiku do khata kala nyamsi.

⁶Na themba ti to awule a nga khata mthumo wa wunene kwanu, a na wu hetisa kala kuhoka ka ditshiku da Jesu Kristu.

⁷Ti lulamile ngako ni txi alakanya toneto ngu mhaka yanu motshe, nguko nina ni nanu mbiluni kwangu, nguko mi patani ni nani ka kateko yangu, amu kusungwani kwangu, kumweko ni mu ka kulwela ni kutsanisa Evhangeli.

⁸Txizimu i fakazi yangu ka ti to ani na xuva ku mi wona motshe, ngu lirando la Jesu Kristu.

⁹Ni kombela ti to lirando lanu li na kule ditshiku ni ditshiku, amu ka wuzivi ni wutxhari,

¹⁰kasiku mi sikota kusawula ati i ku ta tinene ngutu, mi va mi di ni ditshuri ni wululami ka ditshiku da Kristu,

¹¹mi txi pfunelwa ngu mihando yo lulama, yi tako ngu ka Jesu Kristu, kasiku Txizimu txi pfaliswa ni kudhumiswa.

¹²Vanathu, ni lava ku mi tiziva ku ati ti nga ni humelela ti vhuni ngutu kutsimbitisa Evhangeli yi ya masoni:

¹³ Nguko ka yotshe nyumba ya wukoma ni ka otshe mamwani makhalo, mhaka ya kusungwa kwangu ngu mhaka ya Kristu ya ziwa ta tinene.

¹⁴Wungi wa vanathu, va nga tsaniswa ka Mkoma ngu mhaka ya kusungwa kwangu, va engetetwe kutsana ngutu ve huwelela Dipswi, na va si thavi txilo.

¹⁵Kha ditshuri, vamwani va huwelela Kristu ngu mabava ni mibango, aniko vamwani va huwelela ngu mbilu ya yinene.

¹⁶Avava va huwelela ngu lirando, na va txi ziva ti to ani ni vekilwe kasiku ni lwela Evhangeli,

¹⁷kambe avale vamwani va huwelela Kristu ngu mhaka ya mibango, i si nga ngu mbilu ya yinene, va txi pimisa ti to va ni engetela kuxaniseka amu kusungwani kwangu.

¹⁸Ti vhuna txani kani? Ati i ku tona mwendo ti mahwa ngu mibango mwendo ti mahwa ngu mbilu ya yinene Kristu wa huwelelwa: Eto ngu ti ti ni tsakisako. Kambe ti ngadi ti txi na ni tsakisa,

¹⁹Ngu kuziva tito, totshelele eto ti na gwita ngu ku ni hanyisa, ngu mhaka ya mikombelo yanu ni kuvhunwa ngu Moya wa Jesu Kristu.

²⁰Madingano ni kuxuva ni kuthemba konako, ni pimisa ti to ni na mbi wiswa tingana ni ka kudotho, aniko ngu mhaka ya kotshe kutsana kwangu, konkuwa ni yotshe mbimo, Kristu a na dhumiswa ha mmidi kwangu, mwendo na hanya mwendo na fa.

²¹Nguko ani ni khani: Kuhanya i Kristu, kufa i dibhindu.

²²Aniko, kota nga ti kuhanya kwangu ka nyama ku velekako mihando ya yinene, se kha ni tizivi ati ni fanelako kukhedha tona.

²³Na ti wona ti to ni fumwa ngu minavelo yimbidi: Ni navela kutsula ni ya zumba ni Kristu, ati i ku ta tinene ngutu;

²⁴aniko kuhanya kwangu ka nyama ha mafuni, njivhuno txa hombe kwanu.

²⁵Kambe na ni si nga ni kukanakana ka mhaka yiya, na tiziva ti to ni na fungala ni zumba ni nanu motshenu, kasiku mi ya masoni ngu kutsaka likholoni kwanu,

²⁶ni ti to kutsaka ku mi ku nako ngu ngani ku txi anda ngu ka Kristu Jesu, mbimo yi ni no tshumela ni mi tela.

²⁷Kambe khutalani kuhanya dwe ngu tifanelo ta Evhangeli ya Kristu, kasiku, mwendo nata ni ta mi wona, mwendo ni maneka kule ni nanu, ni na engisa ti to mi ngadi tsanisilwe ngu moya wumwewo, mi lwa kumweko mi di tshanganisilwe ngu moya wumwewo, kulwela likholo la Evhangeli,

²⁸mi si thavi kudhukiselwa ngu valala, kasi eto, kha ditshuri ti kombisa ti to vona va ya kulovani, ani anu mi ya kuhanyiswani. Atiya ti ta ngu ka Txizimu,

²⁹nguko txona txi mi ningile kateko, masoni ka Kristu, kateko yo kholwa kwakwe, ni yo xaniseka ngu ngene,

³⁰ mi lwa yimbi yi mi nga ni wona ni txi lwa nani, yimbi yi ni konkuwa mi ti zivako ti to ni ngadi ni txi lwa yona nani.