Read chopi Vakolosa 1 Bible Online

Vakolosa 1 - chopi bible

Vakolosa 1

¹Ani Paulo, mpostoli wa Jesu Kristu ngu kuranda ka Txizimu, ni mwanathu Timoti,

²hi bhalela vasawuleki va ku Kolosa, vanathu va kuthembeka ka Kristu: Kateko ni kudikha si nave ni nanu, si txi ta ngu ka Txizimu, Tate wathu!

³Hi bonga Txizimu, Tate wa Mkoma wathu Jesu Kristu, ka mikombelo yi hi yi mahako ngu nganu yotshe mbimo,

⁴nguko hi pfite kukholwa kwanu ka Kristu Jesu, ni lirando lanu ka vasawuleki votshe;

⁵ngu mhaka ya kuthemba ku mi nga vekelwa kona nzumani, kuthemba ku mi nga ziviswa kona ngu dipswi da ditshuri, i ku Evhangeli,

⁶ayi yi nga hoka kwanu, ayi yi vekako mihando ka dotshe ditiko, ayi yi kulako nga ti yi mahisako tona hagari kwanu, txima mi txi engisa, ni ku engisisa ngu ditshuri da kona, kateko ya Txizimu.

⁷Mi gondisilwe ngu Epafrasi, mngana wathu ni txithumi kulothu, awu a hi vhunako nga txithumi txo thembeka txa Kristu;

⁸Kambe ngene a nga hi xawutela ta lirando li mi nga ningwa ngu Moya.

⁹Ngu konaho, nathu, txima hi txi engisa toneto, kha ha humula ku mi khongelela ni ku mi kombelela, ti to mi txi tala ngu wuzivi wa kuranda kwakwe, ni wutxhari wotshe, ni kualakanya kotshe ka Moya;

¹⁰ti to mi txi tsimbila ngu tifanelo ti ti lavekako masoni ka Mkoma, mi txi mtsakisa ka totshe timhaka, mi txi veka mihando ngu kuthuma mithumo ya yinene, mi txi kula amu ka kuziva Txizimu,

¹¹mi txi mana kutsaniswa ngu mtamo wa hombe, madingano ni mtamo wa kupfaliswa ka txona, kasiku mi sikota kutimisela ta tinene ni kuhonisela ngu kutsaka;

¹²bongani ka Tate, a nga mi ninga mathomo a kumana txyavelo kumweko ni vasawuleki liwoningoni.

¹³Ene a hi ponisile ka txidema, a txi hi rurisa hi txi ya mfumoni ka Mwanana wakwe wo randeka,

¹⁴awu ngu kota yakwe hi nga mana kutirulwa ni kudivalelwa sionho.

¹⁵Kristu i Txifaniso txa Txizimu txi txi si wonwiko, Matiwula a sotshe sivangwa,

¹⁶ngu kwakwe si vangilwe sotshe simaha nzumani ni ha mafuni, simaha si si wonekako ni si si si wonekiko, hambi siluvelo mwendo wufumeli, hambi wukoma mwendo mitamo; sotshe simaha si vangilwe ngu ngene, kambe si vangetwe ene.

¹⁷Ene a thangelete sotshe, se sotshe si tsaniswa ngu ngene.

¹⁸ Ene i Msungo wa Dibanza i ku Mmidi wakwe. Ene i makhato, i matiwula a votshe vava va wukako ngu ka vafi; ngu toneto a mani wuthangeli ka sotshe simaha.

¹⁹Nguko ti tsakisile Txizimu ti to wotshe wutatiseki wu txi zumba ka Kristu,

²⁰ ti txi tsakisile kambe Txizimu ti to kwakwe Kristu, sotshe simaha si txi mana kupfana, a txi si ninga kuthutha ngu mtamo wa txihambano txakwe, hambi sa ha mafuni, mwendo sa nzumani.

²¹Nanu, mi ti kule kale, mi ti ti valala ngu mipimiso ni mithumo yanu yo biha yi nga txi kombisa wulala wa hombe,

²²se konkuwa txona Txizimu txi mahile ti to mi txi wuyelelana natxo ngu Mwanana wa txona, a nga hanya mmidini ka m'thu e tshumela efa, kasiku mi txi yiswa masoni ka Txizimu mi di vo sawuleka, mi si nga ni txisolo,

²³kambe mi fanete kutsana amu ka likholo, mi si hambuki amu ka txithembo txa Evhangeli yi mi nga yi amukela, ayi yi nga nuwelwa ka sotshe sivangwa si si ku hahatshi ka nzuma, Evhangeli yoneyo nani Paulo ni nga mahwa txithumi txa yona.

²⁴Se ani na tsaka, ni tsakela sixaniso si ni si amukelako ngu mhaka yanu, ni txi eneta nyamani kwangu ati ti nga ti sate kuxanisekani ka Kristu, ni mahela Mmidi wakwe, i ku Dibanza.

²⁵Ni ti mahile mthumeli wa dona ngu kurumwa ngu Txizimu, txi nga ni ninga mthumo wuwa ngu mhaka yanu, mthumo wa kutxhumayela Dipswi da Txizimu;

²⁶i ku txikungo txi txi nga ti sisilwe, malembe ni malembe, ka totshe tixaka ta vathu, kambe se txi nga tulelwa ka vasawuleki va txona.

²⁷Ka vonavo, Txizimu txi ti lavile kuvaninga kuziva lisima la thomba ni wudhumo wa txona txikungo txiya hagari ka vamatiko: Kristu hagari kwanu i txithembo txa kupfaliswa kwanu.

²⁸Hi txhumayela ngu ngene, hi txi laya vathu ni ku va gondisa ngu wotshe wuzivi, kasiku hi kombisa votshe vathu na va di hetisekile ngu ka Kristu.

²⁹Ngu toneto, ni ti karatelako tona, na ni txi lwa ngu mtamo wakwe, awu ene a ni ningako wona.