Read chopi Vakolosa 2 Bible Online

Vakolosa 2 - chopi bible

Vakolosa 2

¹Ni dhunda ti to mi txi ziva yimbi yi ya hombe ngutu ni lwako ngu kota yanu ni va niya Laodhikheya ni votshe vava va si ni ziviko ngu khohe,

²kasiku timbilu tawe ti txi tsaniswa; se, ti di tshanganisilwe ngu lirando, ti na ningwa kutalelwa ngu kupfisisa ko hetiseka ni wuzivi wa misisalo ya Txizimu, i ku Kristu apune;

³awu i ku kwakwe txi nga siswa txotshe txuma txa wutxhari ni wuzivi.

⁴Ni womba tiya kasiku ni wammweyo asi mi kanganyisi ngu mapswi o dyelela.

⁵Kha ditshuri, hambiko ni ku kule ni nanu ngu ka nyama, kambe ni hafuhi ni nanu ngu ka moya, ni tsaka ngu kuwona mahanyelo anu amanene, ni kutsana ka likholo lanu ka Kristu.

⁶Ngu toneto, kufana ni ku mi nga amukela Mkoma Kristu Jesu, hanyani mi di txilo tximwetxo nayo;

⁷zimani mikoloti kwakwe, mi txi akwa txitimwi kwakwe, mi txi tsaniswa amu ka likholo, nga ti mi nga gondisiswa tona, mi txi tala ngu kubonga.

⁸Ti woneleni kasiku ni wammweyo asi mi mahi tikhumbi ngu mawombelo a marindi a wutxhari wa vathu, ngu kulondetela siheno sa vathu ni mtumbuluko wa mafu, i si nga ngu Mlayo wa Kristu.

⁹Nguko wuzimu wotshe wu akile ngu kutala mmidini kwakwe,

¹⁰se anu mi mani kuhetiseka ko tala kwakwe Kristu, i ku Msungo wa sotshe si si ku ni wunduna ni kufuma;

¹¹kwakwe kambe, mi yisilwe wukwerani, i si nga wukwera wo mahwa ngu manza a vathu, aniko mbukwera wa wukristu, wu wu hi thusako ka nyama yi yi onhako.

¹² Ngu kubhabhatiswa anu mi keletwe kumweko ni Kristu, mi tshumela kambe mi wuswa kumweko nayo ngu kuwa mi nga kholwa ka mtamo wa Txizimu, txi nga mu wusa ka vakufa.

¹³Kale mi ti vathu va kufa ngu mhaka ya sionho sanu ni mhaka ya wukhutu wa nyama yanu, se Txizimu txi mi hanyisile kumweko ni Kristu. Txona txi hi divalete yotshe minandu yathu;

¹⁴ txi pfhutile mibhalo ya dipapilo da minandu yathu, adi di nga ti bhaletwe ku hi mangalela masoni ka mlayo; di fuvisilwe dipapilodo ngu ku di bethela ha txihambanoni.

¹⁵Kristu a fuvisile mtamo wa mimoya ya wunduna ni wukoma, e yi xowokisa masoni ka vathu, e yi xula ko gwitisa ngu txihambano.

¹⁶ Ngu toneto, m'thu a nga thuke a txi mi abanisa ngu mhaka ya kudya mwendo kusela, mwendo mibuso, kutsakela kumeka ka mtxima mwendo Masabbata.

¹⁷Sotshe siya i mtsudi wa si si tako, aniko ditshina da sona i Kristu.

¹⁸M'thu a nga thuke e mi tekela hakhelo yanu ngu kutsakela wukhozeli wa makuhu ni kukhizamela tingelozi ngu kukholwa ngutu ka miloro yakwe, a txi ti guleta ngu sa walo, ngu mialakanyo yakwe ya ta mmidi;

¹⁹m'thu wo ngeto kha tshanganiswa ni msungo, awu i ku ka wona, mmidi wotshe, wu di tshanganisilwe ngu madingo ni misiha, wu manako kukula kuwa wu ningwako ngu Txizimu.

²⁰Ngako mi di fite kumweko ni Kristu, mi maneka mi di ponisilwe ka sa ditikoni muwa, nji txani mi tumela kusungwa ngu milayo ya dona nga mo va va ditiko diya?

²¹Ti to “U nga teke, u nga danze, u nga gwese!”

²²Sotshe nzimaha si si lovako ngu kuthumiswa nga sileleto ni tigondo ta vathu.

²³Kha ditshuri sona si woneka nga wuzivi, nguko si tsimbilelana ni wukhongeli wo ti lavela, kutiveka hahatshi, ku ti tsayisa mmidi, kambe totsheto kha ti vhuni txilo, i si nga kutsakisa nyama dwe.