Read chopi Vakolosa 3 Bible Online

Vakolosa 3 - chopi bible

Vakolosa 3

¹ Ngako mi di wukile ka vo fa kumweko ni Kristu, lavani asi i ku sa txitimwi, ahawa a zumbako kona Kristu, awu a nga khalahatsha txineneni ka Txizimu.

²Alakanyani simaha si i ku sa txitimwi, i si nga asi i ku sa ha mafuni,

³nguko anu mi fite, se wutomi wanu wu sisilwe kumweko ni Kristu, ka Txizimu.

⁴Se Kristu, Ene i ku wutomi wanu, mbimo yi a nota ti wonekisa, na nanu mi nata humelela kumweko nayo kuwonekelani ka kupfaliswa.

⁵Ngu toneto, ha mmidini kwanu, dayani asi i ku sa mafu: Wugango, mahanyelo a nzambwa, makolo, mixuvo yo biha, likungo, li fanako ni kukhozela siwumbwa.

⁶Asiya ngu sona si dhanako kuhenya ka Txizimu, ka va va eyisako,

⁷atiya ngu tona mi nga ti hanyisa tona kale, mi nga ti fumwa ngu tona.

⁸Se konkuwa na nanu si tshotsheni kule sotshe siya: Txitsikivi, kuhenya, wubihi, kuruka, mawombawombelo a nzambwa.

⁹ Mi nga hembelaneni, nguko mi xivite m'thu wa kale ni hanyelo yakwe;

¹⁰mi ambate m'thu wamphya, awuwa se a kulako ka wona wuphyewo, ngu kulondetela nzila ya m'vangi wakwe, kasiku e mana wuzivi wa kuhetiseka.

¹¹Konaho, kha ku nga ngadi ni Mugriki mwendo Mujudha, awu a nga ya wukwerani mwendo dikhutu, wa matiko, mwendo mukita, khumbi mwendo mthuseki, aniko ku na ni Kristu dwe, i ku sotshe ka votshe.

¹²Nga ti mi nga sawulwa ngu Txizimu, mi manekako mi di basile ni kurandeka, ambalani moya wa wumbilu, wa wunene, wa kutiveka hahatshi, wa kuthutha ni wa kutimisela;

¹³ mi timiselana ni kudivalelana mmwani ni mmwani, ngako m'thu a di ni txisolo ka mmwani, nga kule Kristu a nga mi divalela, na nanu mahisani toneto.

¹⁴Kambe txitimwi ka sotsheso, ambalani lirando, i ku txitsaniso txo hetiseka;

¹⁵Timbiluni kwanu ku na fume kudikha ka Kristu, eko mi nga dhanelwa kona; kasi ku ta maha mmidi wumwewo; kombisani kubonga kwanu.

¹⁶Dipswi da Kristu di na ake timbiluni kwanu ngu kutatiseka, na mi txi gondisana ni kulayana ngu wotshe wutxhari, ni kukombelelana ngu masalmo ni mizeno ni tindanto ta moya; embelelani ngu yotshe mbilu ka Txizimu, mi txi komba kubonga kwanu.

¹⁷Ani totshe ti mi ti mahako ngu mapswi ni mithumo, ti maheni ngu ditina da Mkoma Jesu, na mi txi bonga ngu ngene ka Txizimu Tate.

¹⁸Anu vavasikati, ti vekeni hahatshi ka vamna vanu, nguko ti ni fanelo ka vale i ku sihango sa ditshuri sa Mkoma.

¹⁹ Anu vavamna, randani vasikati vanu, mi si zumbi ngu ku va xupha.

²⁰ Anu vanana, engisani vaveleki vanu ka totshelele, nguko ta tsakisa ka Mkoma.

²¹Anu vaveleki, mi nga henyiseleni vanana vanu, kasiku mi si va theli dikhodho.

²²Anu sithumi, engisani vakoma vanu va ha mafuni ka timhaka totshe, va thumeleni, i si nga ngu mhaka ya ku mi woneleta, nga mo lava kutsakisa vathu, aniko thumani ngu mbilu ya yinene, ngu kuthava Mkoma.

²³Totshe ti mi ti thumako, ti maheni ngu yotshe mbilu yanu, ngu kuziva ti to mi thumela Txizimu, kha mi thumeli m'thu.

²⁴Na mi txi tiziva kambe ti to Mkoma a na mi hakela ngu ku mi maha vadyi va thomba yakwe. Mkoma ngu Kristu, anu mi sithumi sakwe.

²⁵ Ngu toneto, awu a mahako to wekela a na amukela hakhelo yo wekela wakwe. Txizimu kha txi yi ngu khohe ya m'thu.